ورقہ 293

5484
سیف ملوک کہیا ایہ رستہ مشکل پندھ سُنیندا
بِن ساتھی ہمراہ بندے تھیں کیونکر آساں تھیندا
5485
کہیا پھیر بدیع جمالے نہ کر خطرہ جھورا
نال تیرے عفریت دیاں گی چاء کھڑسی کر زورا
5486
اللہ بھاوے ونج پُچاسی صحیح سلامت تینوں
دادی میری خاطر کرسی ہے توقع مینوں
5487
اگے دانشمند اکابر عاقل سُگھڑ سیانی
آدم بچیاں نال محبت بہت کرے اوہ رانی
5488
آپوں بھی اوہ آدم زادی بھاوس آدم زادہ
تیرے نال ہتھوں کجھ کرسی حُب احسان زیادہ
5489
تدھ جے ایڈ قضیےّ جھاگے سفر مصیبت تکے
عشق میرے دے مارے ہوئے در در کھادے دھکے
5490
صورت سیرت تیری تکسی سُنسی ذات صفاتاں
بُجھ کشالے مہریں آوے جاں تُدھ کہیاں باتاں
5491
ایہ مشکل رب اس دے پَیروں متے آسان کریسی
ماں پیو میرا منسن اس دی جو فرمان کریسی
5492
شاہ شاہپال اوہدی گل مندا نالے میری مائی
مت تیرے پر راضی ہوکے چاکرے کُڑمائی
5493
پھیر بدیع جمالے کہیا سُن توں پیارے میتا
کتنے تھاں ڈٹھے تدھ اگے سیر عجائب کیتا
5494
پر جے سارے عالم لوڑیں تک مڑیں سبھ جائیں
شارستان جیہیاں کد لبھسن تھاں مکان ہوائیں
5495
لیکن رستہ خطرے والا سختوں سخت مہیماں
کے کجھ حد سناواں مونہوں مشکل پندھ عظیماں
5496
دریا جوشاں ٹھاٹھاں مارے حال اوہدا کے آکھاں
کالے پربت روئے زمیں دے اس وچ پین جے لاکھاں
5497
موج طوفان اوہدے وچ ڈبّن کدھرے نظر نہ آون
سارے گل کے مٹی ہوون ریت مثل رُڑھ جاون
5498
آتشین پہاڑ جو اگے اس دی حدّ نہ کائی
جے سیمُرغ اُڈے ہو اُچا نال اسماناں جائی
5499
تابش سخت اوہدی تھیں سڑ کے ہوندا مثل کباباں
اُچےّ ہو لنگھن اس راہوں نہیں مجال عقاباں
5500
کے گل کراں گلیم گوشاں دی اوہ ولایت بھاری
ذوالقرنین سکندر نے بی کر کر زور نہ ماری
5501
جو کوئی اوس ولایت وسدے سبھ ڈراون والے
وڈے قد حسابوں باہر بہت زوراور نالے
5502
سو قلاچ اُچے قد بعضے دو دوسے قلاچاں
بُہتا چھوٹا قد ایہناں دا چالیھ گز میں جاچاں

لفظالی:
جھورا= غم ۔ فکر ، عفریت= قد کاٹھ تے کم ولوں حیران کرن والی جناتی مخلوق ، اللہ بھاوے= ان شا ء اللہ ، آدم بچیاں = آدم زادیاں، قلاچ = کسے شے نوں ٹپن اُلنگھن لگیاں گھوڑے دی ماری چھال جنا فاصلہ،خاطر= اُچے درجے دی مہمان نوازی، بھاوس= اوہنوں چنگا لگدا اے، ہتھوں = سگوں، بُجھ=معلوم کر کے، کشالے= لمیاں بیماریاں ۔ دکھ مصیبتاں ، پَیروں = پیر پاون نال دخل دین نال، مت =متے شاید، کڑمائی= منگنی، مہیماں= اوکھے مصیبت بھرے کم ، دریا جوشاں= اُبلدا سمندر، سی مرغ = سب توں طاقتور متھہا سک پنچھی، تابش = سیک ، گلیم گوش= وڈیاں کناں والی قوم، نہ مارنا=فتح نہ کر سکنا، ذوالقرنین= ٹ ک ق م الکہف ٨٣فارس تے میڈیا دو بادشاہیاں دا مالک کیخسرو،