ورقہ 301

5636
لال جڑاؤ تاج سرے دے گوہر قیمت داراں
دل دے دیدے بی تک ساہنواں جھلن نہ چمکاراں
5637
موتی مروارید زمرد لعلاں نال لپیٹی
شاہزادے دے لک بنھائی خوب جڑاؤ پیٹی
5638
کیتا زیور زیب شہانہ جے کجھ ہوندا سارا
زینت حسن اوہنوں بس آہی نہ کر بہت ککارا
5639
عقل علم ادراک صفائی صفتاں سبھ کمالاں
خوب پوشاک نورانی صورت ہویا شاہ جمالاں
5640
بیٹھی پری اکلی جائی کر کے تھاں امادہ
ملکہ بدرہ ماں اوہناں دی نال لیا شاہزادہ
5641
جیہڑے رنگ محل اندر سی دلبر پلنگ دچھایا
سیف ملوکے نوں اس جائی ونج حضور پہنچایا
5642
کر تسلیماں تے تعظیماں جو کجھ حد ادب دی
عاشق جاء سلامی ہویا آس لگی مطلب دی
5643
جھلیا اُٹھ سلام پری نے کر عزّت تے پایہ
بِسْمِ اللّٰہ بِسْمِ اللّٰہ کہندی جیؤ آیا جیؤ آیا
5644
میں صدقے میں صدقے کیتی نال تواضع بولی
جس رستے توںٹُرکے آئیوں اس راہے توں گھولی
5645
نہ ملیے تاں ملیے ناہیں جے ملیے تاں ہس کے
مٹھا بول اندر وڑ لیے عاشق دا دل کھس کے
5646
پچھوں جے کجھ کرنا ہووے کرئےے اپنا کر کے
اوّل نال محبت رہیے اگے اس دے مرکے
5647
نال تواضع کر اشنائی جیو جدوں وس کرئےے
لاڈ مخول تکبرّ جھلے جو اس دے سر دھرئیے
5648
جاں اس روز شاہزادے ڈٹھی سندر شکل پری دی
چودھیں دا چن پھل گلابی اصلوں نقل پری دی
5649
خوبی حسن شماروں باہر گل نہ کیتی جاوے
جوبن روپ ادایوں بھریا ہر ہر نقش سُہاوے
5650
کڑی کواری نظری آئی نازک پھُل گلابوں
عمر اوائل شکل شمائل وافر انت حسابوں
5651
چہرہ سورج ہار نورانی ابرو مثل ہلالاں
دو رُخسارے رب سنوارے چمکن وانگر لعلاں
5652
آب حیات موہیں دا چشمہ ظلمت زلفوں سایا
خال مثال خضر دی سوبھے سبز پیراہن لایا
5653
دند سفید چنبے دیاں کلیاں سُچے موتی لڑیاں
ندی سمند حقانی وچوں جوبن کانگاں چڑھیاں
5654
ظالم نین کٹاراں والے مار گواون جانوں
نک کھناّ سی سان چڑھایا دھریا باہر میانوں

لفظالی:
ساہنواں = سامنے ، جے = جو، ککارا= شور ۔ شاعرانہ مبالغہ، اکلی جائے= نویکلی تھان تے، امادہ= ساز سامان نال تیار ، رنگ محل = عشرت کدے، جائی = تھاں تے ، سلام جھلنا= سلام دا جواب دینا، کر عزت تے پایہ= شہزادے دے درجے پدوی دا لحاظ رکھ کے، تواضع = عاجز ی مسکینی، گھولی= قربان ہوواں، اصلوں = بالکل ، سُہاوے= سوہنا لگے، اوائل عمر= جمع اول دی ۔ جوانی دے پہلے سال Teen age، شمائل = جمع شمیلہ ۔ قدرتی سُبھا۔ چنگی خُو دے جماندرو گُن ، سوبھے = زیب دیوے، مثل ہلال= نویں چن وانگوں باریک قوس وانگوں ، سمند حقانی= حقانی سمندر ، کانگ= بے اوڑکا ہڑھ، کھنا=کھنڈا ۔دو طرفہ دھار والی چھوٹی تلوار،