ورقہ 302

5655
پلکاں تیر کماناں ابرو غمزہ وانگ بندوقے
گولی وانگر خال محمد لگدا سیف ملوکے
5556
شاہزادے جد نین پری دے ڈٹھے نین لگا کے
بیدل کیتا جوش حسن دے ڈھیہن لگا غش کھا کے
5657
پھیر دلیری ہمت کر کے ہوش رکھی وچ جائی
نال عشق دی برکت بچیا ہور مجال نہ کائی
5658
جاں اوہ شکل شہزادے ڈٹھی حسن بھری متوالی
بہت پسندی آئی کہندا بخشے آپ دوالی
5659
جوبن دی اک پُتلی سوہنی وانگر پُھل بہاری
کالے وال معنبر سوہنے جیونکر مُشک تتاری
5660
سرو ازاد سفیدا نازک نال لگے انب پکے
صورت گر کوئی چین چگل دا نقش نہیں کر سکے
5661
صورت تک کے دونا ترینا مائل ہویا شہزادہ
دس حصے اس راتی نالوں آہا حسن زیادہ
5662
ملکہ بدرہ ماں اوہناں دی بہت ہوئی دلشادی
قولوں پاک کیتا رب سچے مشکل ہوئی کُشادی
5663
اس ویلے پھر مجلس تازی کیتی خاص شرابوں
پین پیالے تھین سُکھالے چھیڑن تار ربابوں
5664
پر شاہزادے نوں حیرانی ویکھ جمال سجن دا
صورت حسن اندر گم ہویا نہ چِت چیتا تن دا
5665
ہنجوں رووے کرے دلیلاں اوہو میں نمانا
نال پری دے ہانہہ رل بیٹھا عیش وصل دی ماناں
5666
مت ایہ خواب خیالوں ہووے یا مرجنت آیا
میں دکھیارے نے سُکھ ایسا جیوندیاںکد پایا
5667
دس حصےّ شاہزادے نالوں ودھیاعشق پری نوں
چوری چوری تکدی آہی اس دی شکل کھری نوں
5668
مشکل مشکل گلاں پُچھے عقل اوہدا ازمائے
شاہزادہ سی مستی اندر پھر بی دسدا جائے
5669
دس دس طرح جواب سناوے اکس سوال اوہدے دا
کیتا انت حساب نہ جاوے عقل کمال اوہدے دا
5670
شاہ پری نے کہیا بھینوں سیف ملوک شہزادہ
اج مہمان میرا میں کرساں خدمت حُب زیادہ
5671
خدمت اس دی لازم مینوں ہتھیں دیاں پیالے
ٹر آئے دی کرن تواضع ایہ بھلیاں دے چالے
5672
جے سو نوکر چاکر ہووے خدمت والا اگے
ہتھیں خدمت کرئیے آپوں جاں ساجن ہتھ لگے
5673
اپنی خدمت بیشک کہیے خدمتگاراں تائیں
خدمت گار رہیے بن آپوں پاس پیارے سائیں

لفظالی:
غمزہ = اکھ دا معنی خیز اشارہ، خال= تل (سیف الملوک نوں گولی وانگوں لگدا اے) ، ڈھیہن = ڈِگن ، ہوش رکھی وچ جائی= ہوش ٹکانے سر رکھی ۔ہوش قائم رکھی، دوالی = اک گورنر دا ناں جہنوں سکندر نے بروع دی ملکہ نوشابہ بخش دتی سی سیف الملوک دل وچ کہندا اے کہ اللہ مینوں وی دوالی وانگوں ملکہ بخش دیوے، معنبر= عنبر دی خوشبو والے، پکے انب = بُبّے ممے واسطے تشبیہ اے، صورت گر= بُت تراش ،ترینا=تِگنا،چگل= ترکستان دا شہر جیہڑا سوہنے مرداں تے تیر اندازاں لئی مشہور اے، تن دا چِت چیتا= اپنے وجود دا احساس،دلشادی= دلوں خوشی، کھری= بغیر کسے سجاوٹ دے، ہتھ لگنا= دستیاب ہونا۔ مل جانا، نین =اکھ،