ورقہ 303

5674
جائز ہووے دوئے دی ہتھیں جے خدمت دلبر دی
بادشہاں دے بدلے سبھو خلق نمازاں کردی
5675
توڑے سینکڑیاں دے سر تے حاکم صاحب ہوئیے
آپ سجن دی خدمت اندر بدھے لک کھلوئیے
5676
دلبر دے گھر بے پرواہی کرے غریب نوازی
جس پر پاوے نظر محمد جِت جاوے اوہ بازی
5677
پُر کر کاسہ ہتھ وچ پھڑیا تختوں اُٹھ کھلوئی
اول آپ اوہدا گھُٹ بھریا پھر عاشق ول ہوئی
5678
شاہزادہ بی اُٹھ کھلوتا کیتی شرط ادب دی
نیڑے آ دوزانو بیٹھا خاطر حرص طلب دی
5679
بسم اللہ کر پھڑیا ہتھوں صاف بلوری کاسہ
جاں پیتا جند پئی نویں سر سُستی رہی نہ ماسا
5680
خالی کر کے ترت پیالا خدمتیاں ہتھ پایا
دلبر نے پھر ہور شتابی اوویں وت پلایا
5681
دوجا تیجا کاسہ دتا ہتھیں آپ پیارے
عاشق تے معشوق محمد پی ہوے متوارے
5682
پچھوں اس تھیں صاعد تائیں پُر کر دتے کاسے
نالے مجلسیاں نوں دتے جو جو آہے خاصے
5683
سیف ملوک پری رل بیٹھے نال محبت دل دی
جس چیزے نوں لوڑن چڑھیے اوڑک اک دن ملدی
5684
لوڑن والا رہیا نہ خالی لوڑ کیتی جس سچی
لوڑ کریندا جو مُڑ آیا لوڑ اوہدی گِن کچی
5685
سیف ملوک جہیا بن لوڑے لوڑ اوہدی تد پکے
اللہ چاہے مڑے نہ خالی مطلب دا منہ تکے
5686
شاہ پری نے شارت کیتی بدرہ خاتوں تائیں
بدرہ اُٹھی نال گماناں کے گل آکھ سنائیں
5687
جیونکر مور کریندا پائل سوہنے پر ہلائے
گردن کلغی راس بنا کے گِن گِن پب اُٹھائے
5688
جلوہ حسن گھنے دا دسدا ہر وچ ہر دا پھیرا
اینویں نہیں محمد بخشا دل دا حسن لٹیرا
5689
جے کر صورت وچ نہ ہوندا مالک آپ دلاں دا
غیبوں چِھک مہار دلاں دی کیہڑا جیو ملاندا
5690
ہر ہر وچ نہ ہوون جیکر ہر دے روپ سمانے
دانشمنداں دا دل ٹھگن کد معشوق ایانے
5691
کر تعظیماں بدرہ خاتوں لٹک لٹکدی آئی
کاسہ ہور پری دے ہتھوں شاہزادے ول لیائی
5692
اوہ بی سیف ملوکے پیتا منہ تھیں آکھ سنایا
شکر الحمد خداوند تائیں جس ایہ کرم کمایا

لفظالی:
دوئے = دوجے ، توڑے= بھانویں ، صاحب = مالک، بدّھے لک= کمر بستہ ۔ پیٹی بنھ کے ہر حُکم منن لئی تیار، دو زانو = گوڈے مُودھے مارکے( ادب دے قرینے نال)، خاطر حرص طلب دی= محبت منگن لئی، خدمتی = خادم ۔نوکر، پایا= دھریا ، وت= پھر دوبارہ، متوارے= متوالے ۔ نشئی، مجلسی=مصاحب گوٹھی، لوڑن = دھونڈن ۔ بھالن، لوڑ = تلاش ، گمان = فخر ۔ ناز، پائل کرنا= پیلاں پانا۔مور دا نچنا، راس بناکے= سدھا اُتا نہہ چک کے ، پب= پیر دا اگلا حصہّ ، ہر وچ ہر دا پھیرا= ہر انسان وچ حسن ازل پھیرا پا رہیا اے، نماز کرنا= نماز ادا کرنا ۔ ٹ ک نماز کرون، غیبوں چھک= اللہ ولّوں کھِچ کے ، سمانے= سمائے، ایانے= بے سمجھ ۔ معصوم،