ورقہ 305

5710
حدوں بہت اگے بھی آہی چہرے تے رُشنائی
نال تراوت مدھ دی ہوئی اگلیوں ہور سوائی
5711
ہور کوئی مدھ پیوے جیوں جیوں کھڑدا ہوش دماغوں
عاشق دا بھیں ہووے زیادہ روشن عقل چراغوں
5712
دلبر کول تے مہریں آیا نالے نشہ شرابوں
ساقی سجن دئے پیالے ہتھیں نُقل کبابوں
5713
مجلس خالی نا محرم تھیں نغمے چنگ ربابوں
سُچی سیج محمدبخشا رنگی عطر گلابوں
5714
صاعد بدرہ بی سن اوتھے عشق کماندے چوری
نیویں نظر تکن اک دوجے ساورڑا تے گوری
5715
صاعد بدرہ دے ول تک کے جھکھڑ آہیں بھردا
پتر رُکھ صبر دے والے زیر زبر سی کردا
5716
کہندا سی شاہزادہ اس نوں نہ کر بے قراری
رکھ تحمل صاعد بھائی پکن دے کھاں یاری
5717
اگ سلگی نوں مارنہ پھُوکاں مت دیوے بھڑکارے
لگی اگے مینہ نہ برہدے پیش نہ جاون چارے
5718
عشق بپار سُکھلا ناہیں ہُن سِکھیوں بنجارا
اس سودے وچ عمر ونجاندا جس نے سود پیارا
5719
سو دا کر کے سودا کرئیے سودا ہے کے لیکھا
لکھ سودا لئیے دے ہوشاں سردی بھی کر ریکھا
5720
سجن کول نہ دور کوہاں تے کے ایسی بے صبری
حرص تیری دا اثر اوہنوں بی نہ بدرہ بے خبری
5721
صاعد کہندا سُن شہزادہ توں ایہ کم ازمائے
ترہائے نوں پانی تک کے صبر نہ کیتا جائے
5722
پھیر جواب شہزادے دتا نال حلیمی نرمی
سُتاّ جاگے تردا آوے جُثّے ہووس گرمی
5723
جلدی جان ندی تک جل دی جلدی پیوے نہاوے
مغز زکام اندامے سستی تن دُرستی جاوے
5724
بھارا مغز اتے سردردی نک اکھیں جل وگدا
چِردا سنگھ آواز نہ پھردا اچمی پالا لگدا
5725
نِچھاں کھنگ ہلاوے چھاتی چیرے جیونکر آری
بورے وانگ کھنگار نکلدے رنگ کیتے نسواری
5726
سینڈھ کھنگھا ر چوپھیرے کردے ہر جائی ترکیرا
منہ کھُر اَتے کنارے وانگر رلیوں مارے ویرا
5727
منہ پر ہتھ مریندے تھکن مکھیاں دے بھنکاروں
گوشت پوست دا ایہ دشمن ایہو اس دا داروں
5728
شربت مٹھے دین نہ لذت نہیں سواد طعاموں
عطراں دی خوشبو نہ آوے رکھے رب زکاموں

لفظالی:
مدھ= شراب، رُشنائی= نور ۔ تجلیٰ ، تراوت= تری تازگی، بھیں = سگوں،نُقل = شراب مگروں پیش کیتی گئی مٹھیائی یابھُجا گوشت۔ کباب وغیرہ، عشق کمانا= عشق دے سارے تقاضے پورے کرنا، ساوڑا تے گوری= عاشق تے معشوق ، جھکھڑ آہیں = ھنیری جِنّے تیز ٹھنڈے ساہ، پکن دے کھاںیاری= یاری دے مِٹھّے پھل دا انتظار کر ، زیر زبر کرنا= ہیٹھلی اتانہہ کر دینا۔ ہوکے نال۔ ہلا دینا، بھڑکارے= بھانبڑ مچن دی آواز ، بَرہدے=ورھدے ، صبر دے والی= صبر دے مالک، سودپیاریا= نفع پیارا کِیتا ( پیارنا مصدر اے)، دا= داؤ پیچ ، سردی ریکھا کرنا=سِرویچن دی تحریر کر دینا، ندی تک جل دی= پانی دی ندی تک کے ، اندامے= سریروچ ، ترکیرا= گند ۔ ترک ، مُنہ کھُر= ڈنگراں دا روگ جس وچ اوہناں د ے منہ تے کھر زخمی ہو جاندے نیں ، کنار= ڈنگراں دا کھنگھ زکام ، رلیوں مارے ویرا= اے ابھرا روگی ناللگ کے روگی ہو جاواں گے، ایہہ =عشق ، داروں = علاج، زکام = عشق توں محرومی تے بے حسی دی حالت،ساورڑا= سانول ۔ شام رنگ محبوب،