ورقہ 307

5748
سوہنی صورت حسن نرالا جوبن دے متوارے
دُونا روپ دئیے وی لوئے کجلا لہراں مارے
5749
چودھیں دا چن رہیا کھلوتا بدرہ دا منہ تک کے
دھرتی ہیٹھ گیا چھپ سورج صاعد توں شرمک کے
5750
راتیں لو دیئے دی اندر روپ زیادہ دِسدا
دیہیں نالوں ودھ صفائی ویکھو سوہنے جِس دا
5751
ناگ ڈنگالے زلفاں والے بہت دِسن کٹ کالے
بن پیتے متوارے دیدے اوٹھیں سرخی نالے
5752
نہ گورا نہ کالا چہرہ دسدا رنگ گلابی
راتیں دا رل بہنا یاراں نعمت بے حسابی
5753
وانگ کبوتر چوگ وٹاون پِھرپِھر صدقے ہوندے
مِٹھیاں گلاں سنبھن ناہیں کر دے خوشی نہ سوندے
5754
لاڈ پیار محبت کر کے پاون ٹھنڈ جگر نوں
کرن دعائیں جے اج سائیں رکھے دفع فجر نوں
5755
سیف ملوک اکلا رہیا مجلس اُٹھ کھلوئی
سر عاشق دی جھولی دھر کے شاہ پری بھی سوئی
5756
عاشق وہلا کرے نظارہ تکدا حسن پری دا
نال ادب دے لئے نہ بوسہ نہ جو لاڈ کریدا
5757
باغ بہار حسن دی اندر ہرن نیناں دے چردے
رجن کد محمدبخشا بھُکھے سان عمر دے
5758
اچن چیت بدیع جمالے نین متے نندرائے
نیند مٹھی تھیں باہر آندے عاشق نال بھڑائے
5759
ڈٹھا یار سرہاندی بیٹھا کردا روپ نظارا
حُسن اندر حیران پشیماں روندا زار بے چارہ
5760
ناز نیاز رلے اس ویلے رنگ عجائب بنیا
جیونکر وقت بہار چمن تے بدل نکا کنیا
5761
مثل گلاب پری دا چہرہ بھنےّ وال پھلیلوں
آنسو نال شزادے کیتا جیونکر پھُل تریلوں
5762
جدوں بدیع جمال پری نے حال ڈٹھا دُکھیارا
عاشق تائیں دے دلاسے ہے جانی دلدارا
5763
سینے ٹھنڈ مینوں تدھ ڈٹھیاں سِکدے جیوں ملیدا
توں میرا تعویذ گلے دا منکا ہول دلی دا
5764
قسم کراں میںروح نبی دی نام سلیماں جس دا
پھر سوگند پیو دی چاواں جے توں گھڑی نہ دِسدا
5765
جان کندن دی تلخی وانگر روح رہی وچ تنگی
دو جگ اندر چیز تیرے تھیں کوئی نہ دسدی چنگی
5766
دل اندر وسواس نہ رکھیں نہ کجھ خفگی تنگی
جے میں پریاں دے وس آئی کار ہوسی کد چنگی

لفظالی:
جوبن دے متوارے= شباب دی مدھ وچ ، شرمکنا= شرم کھانا، کٹ = کالا رنگ جیہڑا چھیٹا ں چھاپن والے ورتدے نیں ، متوارے = مدھ والے، اوٹھیں = ہوٹھاں تے، چوگ وٹاون= اک دوجے دا منہ چُمن ، سنبھن =مکن، ہرن نیناں دے چردے= اکھاں اک دوجے دا آزادی نال نظارہ کر رہیاں سن،دفع رکھنا= دھک کے پرانہہ کیتی رکھنا ، وہلا= چھیتی چھیتی ۔جھبدے، متے= نشی ۔ سُرخ ڈوریاں والے، نند رائے= نیندر دی حالت وچ ہو گئے، بھڑائے =لڑائے، نکا کنیا= چھوٹی چھوٹی پھُوہر پئی، سِکدے = ملن دی اڈیک وچ تڑفدے ، منکا= زہر مُہرے دا پتھر جو دل نوں ہول پین دے علاج لئی سونے وچ مڑھا کے گہنے وجہوں گل وچ پا لیا جاندا اے،سوگند= قسم ، جان کندن= نزع دے عالم دی ، خفگی= غم غصے دی گھُٹن، تنگی = اذیت Torture، کد = کدوں ۔ استفہام انکاری ( چنگی نہیں ہووے گی)،دیہیں= سورج،