ورقہ 309

5786
طاقت تاب تے آب نہ دیہی ہویا بے ترانا
سیف ملوکے پچھیا بھائی کے تدھ حال وہانا
5787
دس مینوں کے ہویا تینوں کس تھیں گریہ زاری
راتیں خیریں مہریں گھلیوں ہن دِسیں آزاری
5788
صاعد نے فرمایا اگوں اے صاحب شاہزادہ
ساری رات پیاّ سنگ گزری الفت نال زیادہ
5789
یار سنگوں ایہ ہن ساں کِریا وچھڑن دی حیرانی
صبح نہیں کوئی ظالم آیا کیتوس شہر ویرانی
5790
صاعد درد رنجانے تائیں شاہ دتیاں دلبریاں
رکھ دھیان میرے ول بھائی جس سودا سنگ پریاں
5791
اوہ جے ناری لوک نیارے آدم نال نہ مِلدے
آس ربے دی سفر سدھاواں رکھ تحمل دل دے
5792
یاری تیری نال انسانے جنس جنس نوں چاہے
نالے گھر سجن دے بیٹھوں مل رہسی ہر راہے
5793
میں جس بھاری مشکل سر تے اوہ بھی جھٹ گزاراں
اج بھلکے اُڈ جا سن پریاں جا لہسن گھر باراں
5794
کیونکر میرا پُہچن اوتھے کیکر پھیر ملیساں
باجھ دلیری سادھن اوکھا دیو پریاں دے دیساں
5795
صاعد نوں پکڑائی دلیری کر کے خوب تسلی
کیتا وضو شہزادے سوہنے جاء نماز اُٹھ ملیّ!
5796
آکھی بانگ نماز گزاری دوہاں یاراں رل کے
ورد وظیفے پورے کیتے مسند تسبیح مل کے
5797
ملکہ خاتوں بدرہ خاتوں نالے ماں اوہناں دی
اوہ بی بہت حدوں خوش ہویاں لج پت رہی اساں دی
5798
سُرخرو کیتا رب سانوں سیف ملوکے ولّوں
قول قرار ہن پورا ہویا سچیاں اپنی گلوں
5799
شاہزادے دی شرموں چھُٹیاں تاں دنیا پر آیاں
واصل ہویا روح محمد دل نے خوشیاں پایاں
5800
جانوں دلوں بہوں خوش ہویا شاہ پری دے ملنوں
دم دم حمد ثنا گذارے دے دِلاہیاں دل نوں
5801
ست دن گذر رہے جد پورے کیتی پری تیاری
باغ ارم ول تُرنا آیا بنی مصیبت بھاری
5802
ہوئے تغیئر خوشی دے تھانے کوٹ دلے دا سٹ کے
مارے دھونسے ڈھول وچھوڑے چڑھ آیا لے کٹکے
5803
پری شہزادہ کول بلایا خبر نہ ہووے پریاں
غور دلاسا کرے مدارا دین لگی دلبریاں
5804
ملکہ بدرہ ماں اوہناں دی اوہ بھی سد بہایاں
نا محرم کوئی رہیا نہ اوتھے سنگ سیاں تے دایاں

لفظالی:
تاب= سریر دی نِگھ، تران= بچا ۔راکھی تے لگی طاقت ، بے ترانا= سکت توں بغیر، آ ب = چہرے دی رونق ، وہانا= بیتیا ۔ گذریا ، آزاری= روگی ، کِریا= وچھڑیا، دلبریاں دینا= ہمت ودھانا دلیری حوصلہ دینا، ہر راہے= کسے طریقے ، لہسن = اُترن گیاں ، سادھن = کُجھ کر کے دکھانا ۔کم نوں توڑ چاڑھنا، ہر راہے = کسے طریقے ،جا نماز= مصلےٰ ، لج پت= شرم۔ عزت ، شاہزادے دی شرموں چھٹیاں = شاہزادے کولوںسرخرو ہو کے شرمندیاں ہوون توں بچ گئی ہاں،دلاہیاں = دلاسے، ہوئے تغیر خوشی دے تھانے کوٹ دلے دا سُٹ کے =دل دا قلعہ ڈھا ڈیگ کے خوشی دے فوجی ٹکانے تبدیل کر کے چلے گئے یعنی رخصت ہو گئے، مارے دھونسے۔۔۔۔۔۔ = وچھوڑے نے ڈھول نقارے مارے تے اپنے کٹک نال حملہ کر دتا، کٹک = دھاڑدیاں دا حملہ جس وچ انسانان توں علاوہ مال ڈنگر دی وی وڈھ ٹُک کیتی جاندی اے ، مدارا= خاطر تواضع ۔ ٹہل سیوا ، دایاں= کھڈاویاں ، سنگ سیاں= سکھیا ں سہیلیاں ،دلاہیاں = دلاسے،