ورقہ 311

5824
تیری کجھ صلاح ٹرے گی توں واقف اسراروں
دیو پریاں دی مرضے اتے تدھ معلم کوئی داروں
5825
خو مزاج طریقہ چالا بھاکھا تدھ اوہناں دا
عقل ہنر کجھ آدمیان دا ایتھے پیش نہ جاندا
5826
جے کجھ عقل تیری وچ آوے کھول دسال اسانوں
جو کم ساڈے وساّ ہوسی کرساں دین ایمانوں
5827
توڑے کم تساڈے لگن جانی سر گھرساڈے
والے جتنا عذر نہ کر دے مطلب ہون تساڈے
5828
ایہ صلاح میرے دل آئی شاہ پری فرماندی
کرساں عمل اسے پر جیکر تساں پسند لیاندی
5829
سیمیں شار ستانے اندر رہندی دادی میری
شفقت اتے محبت میں پر کر دی بہت ودھیری
5830
پاس اوہدے شاہزادہ جائے کر ہمت ہوشیاری
میں دادی ول عرضی لکھساں کر کر منت زاری
5831
عرضی پڑھ کے معلم کرسی خواہش میری ساری
نالے صورت سیرت اس دی لگسی ویکھ پیاری
5832
ہے امید مینوں رب سچا مہر اوہدے دل پائے
باپ میرا گل مندا اس دی جو مونہوں فرمائے
5833
دادی ول فریادی گھلاں داد مراد پُچائے
عاشق تے معشوق دوہاں دی جوڑی راس بنائے
5834
ہے توقع بہتی ساری آکھ نہیں کجھ سکدی
اللہ بھاوے آہر کرے گی عرضی میری تکدی
5835
ایت سبب ہوویگا مطلب ہور صلاح نہ پھبدی
سیف ملوک روانہ کرئیے آس پکی کر رب دی
5836
اک عفریت اعتباری اپنا نیت جس دی بھلیّ
حکم اوہدے دی تابع کرساں لے کے قسم تسلی
5837
ایتھوں چا اوتھے کھڑ لہسی امن امان سُکھالا
اگوں بھی اوہ مولیٰ حافظ پچھوں آنن والا
5838
رکھ توکّل آس ربے دی بھیج دَیے شاہزادہ
اگوں قسمت وَیہہ ملے گی جے کجھ رب ارادہ
5839
ایہ صلاح پسندی آئی سبھناں جیاں تائیں
اِسّے اُتے ختم کیتونیں کہہ کے خیر دعائیں
5840
پھیر پری فرماون لگی سیف ملوک صنم نوں
لے سجنا! میں ودعا منگدی چلی باغ ارم نوں
5841
تینوں رب سُکھالا رکھے روگ میرے تن لائیو
اچن چیت پرم دا بھانبڑ سینے بال جلائیو
5842
گھڑی ارام نہ تیرے باجھوں روندی دھوندی رہساں
وانگ زلیخا طلب یوسف دی ہو سووائن بہساں

لفظالی:
مرضے= مرض روگ، بھاکھا= بھاکھیا اے۔ بولی سمجھ کے جان لیااے، داروں = علاج ۔ تدبیر ، دسالنا = دسنا۔ دکھانا ۔ پیش کرنا، وسّا = وس ۔کنٹرول قابو وچ ، توڑے= بھانویں ، جانی= جاناں جنداں ، مطلب ہونا= مقصد پُورا ہونا ، سیمین= شارستان دو ملک سن اک دا ناں سیمین ( چاندی دا) دوجے دا نان زریں(سونے دا ) سی، راس= ہر طرحاں نال فِٹ، اللہ بھاوے = ان شا اللہ ، آہر = ضروری اہتمام ۔ انتظام ۔ سر بندھ، ایت= ات ۔ اس، عفریت=ڈراؤنا جن بھوُت، کھڑ لہسی= بے جاکے اتارے گا ، پرم = عشق ، آنن= لیاون ، ویہہ ملے گی= وگ بھج چھیتی ٹر کے ملے گی ۔ ہر صورت وچ ملے گی، جے = جو، کہ کے خیر دعائیں =جدوں کسے کم دا فیصلہ کرن دا طریقہ تاریخ طے ہو جائے تے اوس موقع تے دعائے خیرمِل کے پڑھی جاندی اے تاں جو مولا اوسے نوں ای توڑ چاڑھ دیوے ، وِدعا=جان دی اجازت،