ورقہ 2

16
لے لے گئے سخن دی لذت پی پی مست پیالے
خالی رہ گئے مٹ محمد خانے مجلس والے
17
کدھرے نظر نہ آوے کوئی بھرے پیالے والا
جے دِسےّ تاں ورتے ناہیں نہ ہِک گُھٹ نوالا
18
کہے اساں تھیں اوہلے ہوئے ساقی مٹ پیالے
ہائے افسوس محمدبخشا کون کرے اُپرالے
19
یاراں باجھ شراب سخن دا ورتن تے کد جیوسی
سُچا میلا کڈھ محمد جو پیوسی سو پیوسی

باری تعالیٰ دی حمد

20
اوّل حمد ثناء الٰہی جو مالک ہر ہر دا
اس دا نام چتارن والا ہر میدان نہ ہردا
21
کام تمام میسّر ہوندے نام اوہدا چِت دھریاں
رحموں سُکےّ ساوے کردا قہروں ساڑے ہریاں
22
قدرت تھیں جس باغ بنائے جگ سنسار تمامی
رنگ برنگی بوٹے لائے کجھ خاصے کجھ عامی
23
ہکناں دے پھل مِٹھے کیتے پت اِنہاندے کوڑے
ہکناں دے پھُل کاری آون نفعے پھلاندے تھوڑے
24
ایس عجائب باغے اندر آدم دا رُکھ لایا
معرفت دا میوہ دے کے واہ پھلدار بنایا
25
رحمت دا جد پانی لگا تاں ہویا ایہہ ہریا
ہر ہر ڈالی نے پھل پایا سر دھرتی جد دھریا
26
واہ وا خالق سرجنہارا ملکاں جِن انساناں
اربع عناصر تھیں جس کیتا گُونا گون حیواناں
27
کُنہ اوہدی نوں کوئی نہ پُہتا عاقل بالغ دانا
درجس دے سر سجدے سٹے لوح قلم اسماناں
28
حکم اوہدے بِن ککھ نہ ہِلدا واہ قدرت دا والی
جِیا جُون نگاہ اوہدی وچ ہر پتر ہر ڈالی!
29
آپ مکانوں خالی اس تھیں کوئی مکان نہ خالی
ہر ویلے ہر چیز محمد رکھدا نِت سنبھالی
30
جُون ہزار اٹھاراں اس نے دنیا وچ بنائی
صورت سیرت تے خاصیت وکھو وکھری پائی
31
جُدا جُدا ہرجُونے جوگے جگ تے کیتے کھانے
اَنّھے لوہلے ماڑے موٹے ہر نوں نت پُچانے
32
جو جو رزق کسے دا کیتُس لکھیا کدے نہ ٹالے
لاکھ کروڑ تکے برُیایاں پھر بھی اونویں پالے

لفظالی:
مٹ = صوفیاں دیاں خانقاہاں ۔نوالا = کسے غیر حاضر پروہنے دا حصہ برُکی۔ اُپرالا= امدادی جتن اُپاء ۔ مصیبت وچ دستگیری۔ ورتن = اپنی ورتوں وچ لیاون۔کدجیوسی = دل نہیں سی کردا۔ ارادہ نہیں سی ۔چِتارن = چت چیتے وچ یاد کرنا ۔چِت دھریاں= تصور خیال وچ لیایاں ۔رحموں = رحم نال ۔ کاری آون = کار آمد ثابت ہوون ۔سرجنہارا = کسے مادے توں بِناں پہلی وار وجود وچ لیاون والا۔اربع عناصر = چارتت۔ ہوا۔مٹی۔پانی اگ۔گوناگون = ون سونے۔ طرح طرح دے۔کُنہ = وچلا بھیت۔ اصل راز۔جیاجُون = سب مخلوق ،ہر= شکتی والا کوئی دیوتا ۔ قدرت دا کوئی مظہر ، ہرمیدا ن= کسے میدان ، کیتا= بنایا، جوگے= واسطے ۔قابل،