ورقہ 316

5919
پھر اک قسم دیواں دی وچوں سد عفریت وڈیرا
دے انعام اس نوں فرمایا کم کریں اک میرا
5920
بہتی دولت دنیا دتی خلعت تے وڈیائی
نالے اگوں ہور دیون دی آس اوہدے دل لائی
5921
عفریتے ہتھ بدّھے کردا بندگیاں تعظیماں
عرض کرے فرماؤ خدمت کرساں سر مہیماں
5922
جے کر حکم خدا دا ہویا نبیاں مدد پہنچائی
مشرق مغرب توڑی پجساںآکھو جیہڑی جائی
5923
شاہ پری نے کہیا اس نوں سن فرمان اساڈا
بہت مِٹھا ایہ آدم زادہ ہے مہمان اساڈا
5924
ہر ہر وال اوہدے وچ میری ہے جند جان پروئی
درسن اس دے جیہی میرے دل ہورمراد نہ کوئی
5925
خیر خواہی دا ظن تیرے تے توں جاتوں اعتباری
تاں ایہ کم تیرے پر سٹیا چھوڑ لوکائی ساری
5926
نبی سلیماں جی دی تینوں قسم گھتاں سو واری
دغا فریب نہ کرنا کوئی کرنی خدمت داری
5927
والے جتنا فرق نہ کرنا میں جے کجھ فرماواں
شاہزادے نوں پیارا جانِیں سکیاں وانگ بھراواں
5928
اٹھے پہر حکم وچ رہنا وانگ غلام حلالی
آپوں اوکھا ہوکے رکھیں اس دی جان سُکھالی
5929
سیمیں شارستانے اندر چا اس نوں لے جانا
دادی میری کول شتابی امن امان پُچانا
5930
جاں جاں پھیر میرے تک پجُدا ایہ آدم دا جایا
خدمت اس دی حاضر رہنا بن کے گولا دایا
5931
بدھاّ لک حکم وچ رہنا درد اس دا بہوں کرنا
دیوں پریاں دے شراں کولوں راکھی کرنی ڈرنا
5932
جاں ایہ پھیر میرے سنگ ملیا صحیح سلامت خیری
اس خدمت دا بدلہ تیرے دور کریساں ویری
5933
جس پری پر توں ہیں عاشق نہیں تینوں ہتھ لگدی
اوہ حوالے تیرے کرساں جلدی وہندی وگدی
5934
ایہو شرط اساڈی تیری ایہو عہد مسلّم
آنیں کھڑیں سکھلاّ رکھیں ایہ اساڈا آدم
5935
عفریتے ایہ گلاں سُن کے لگی آس مرادوں
دھرتی اتے بل بل پوندا خوشےوں تے دلشادوں
5936
شاہ پری ول سیس نماوے آکھے'' حکم قبولے''
شاہزادے دی خدمت اندر فرق نہ کرساں مولے
5937
ساہ وساہ نہ بھناں بی بی کیتے قول نہ ہاراں
اِک اک وال اوہدے دی جائی توڑے سرد ھڑواراں

لفظالی:
عفریت = چوکھا ڈراؤنا جن، وڈیائی = وڈا درجہ خطاب وغیرہ، مہیماں = مہماں ۔ اوکھے مصیبت بھرے کم، جائی= تھاں تے ، درسن = درشن ۔ دیدار ، لوکائی = خلقت، خیر خواہی دا ظن = بھلا سوچن بارے، نیک گمان اے، غلام حلالی= نمک حلال ملازم ، دایا= آیا دا کم کرن والا مرد، گولا= غلام ، بدھالک= کمر بستہ ، شراں =شرارتاں ، وہندی وگدی = ہر کم کر دی ہوئی جسمانی طورتے صحت مند، مِٹھا = پیارا، آنیں = لے آویں ، آدم = آدم زادہ ، بل بل پینا= ادب نال زمین تے وچھ وچھ جانا، سیس نماوے= سر جھکاوے ، توڑے = بھانویں ،جائی= تھاں تے۔ بدلے، ساہ = اک دم لئی وی ،وساہ نہ بھننا= اک دم لئی وی راکھی توں غافل نہ ہونا،