ورقہ 323

6052
جے اس ایڈ قیامت چائی باجھ وروں نہیں رہندی
جنس اپنی وچ لوُہیےئ جلدی چا اسانوں کہندی
6053
آدمیاں دے کرے یرانے ویکھ جوان توانے
ننگ ناموس نہ تکدی تتی نج جمیّ اِس خانے
6054
باپ اوہدا شاہپال بہادر افسر بادشہاں دا
اج سلیماں نبی دی جائے شاہنشاہ کہاندا
6055
نہ ڈٹھیوس پگ داڑھی اس دی ایسی نِارتھی چائی
پریاں چھوڑ کریندی پھر دی آدم دی اشنائی
6056
ہر گز کوئی نہ سُجھدا اس نوں آپ پھرے خود طوری
خیر نہ منگدی مول نہ سنگدی نیونہہ لگاندی چوری
6057
دُور گئے جے نیڑے ہوندے اوہ لونڈا ایہ لٹی
ایسی کراں جیہی جگ جانے کھان عشق دی کھٹی
6058
عشقے دا کوئی ناؤں نہ گھنے نہ کوئی نیونہہ لگائے
دور گئی ہن وس نہ چلدا کے سردوس پرائے
6059
پُت بیگانہ کاہنوں ماراں بیٹی اپنی بِگڑی
چور کسے نوں کہیے ناہیں سانبھی رکھیئے تِھگڑی
6060
کر کے ادب سلام تمامی دیوے عرض گذاری
ہووے معاف بے ادبی میری سچ کہاں اس واری
6061
ڈٹھے باجھ کریں چترائی سُن توں بی بی رانی
اچھل اچھل بہو نہ اتنی بن کے بیٹھ سیانی
6062
نہ اوہ آدم ایسا ویسا جھبدے مار گواسیں
جس ویلے تدھ اکھیں ڈٹھا صدقے صدقے جاسیں
6063
خاطر خدمت لکھ لکھ واری اپنے آپ کریسیں
پھیر بدیع جمالے تائیں طعنہ مول نہ دیسیں
6064
گلّوں بند زبان ہوئے گی ٹُرسی نہ چترائی
ویکھن سات مٹی گا غصہّ بھُلسی عیب خطائی
6065
لاڈ گمان جھلیں گی اس دے کرسیں آپ لڈکاّ
ترت تساڈے اندر وڑسی جیوں کر بیٹا اکاّ
6066
جیکر بیٹھ لتاڑے اکھیں مول نہ لگسی مندا
جیؤ جیؤ کر دی رجسیں ناہیں فرزندا! فرزندا!
6067
مہر افروزے نوں سن گلاں حُبّ محبت اُٹھی
کیویں نظر پوے اوہ بندہ شاہ پری جس کُٹھی
6068
بی بی کہیا ہے اوہ کیسا ایڈ کرامت والا
حاضر کر کھاں ویکھ لواں گی ایہ دلیری چالا
6069
آہو خاطف نے آء کہیا سیف ملوکے تائیں
حاضر ہو بلائیوں بی بی تکڑا ہو کے جائیں
6070
سیف ملوک دلیری کرکے کول بی بی دے آیا
کیتے ادب سلام تمامی دیکھ قدر تے پایہ

لفظالی:
ور = کنت ۔ منگیتر، لُوہیے=( نفرت نال ) منگیے ویا ہیے، خانے= گھر ۔ خاندان، افسر = تاج ، نج جمی = نہ ای جمدی تے چنگا سی ، نِارتھی= نرارتھی ۔ بے اصولی ، خود طوری = بے مُہاری۔ اپنے طور طریقے تے ضد کرن تے کسے ضابطہ اخلاق نوں نہ منن والی ، کھان عشق دی کھٹی= عشق کرن دا نتیجہ بھوگ لین سواد چکھ لین، خیر نہ منگدی= عذاب نوں دعوت دیندی ، لٹی =لُٹر ۔ آوارہ، تھِگڑی =معمولی کپڑا ۔ دھجی ۔ ٹاکی ، دیوے = دیونے، چترائی= چالاکی ، خطائی = قصور ۔ گناہ، جیؤ جیو = شالہ جیوندا رہیں ، کُٹھی= تھاں ماری( پیار نال) پایہ = درجہ۔ سماجی مقام ،