ورقہ 324

6071
باجھ بلائے بولن ناہیں مجلس وچ سیانے
ناہیں قُرب اوہناں نوں جیہڑے سخن کرن ان بھانے
6072
کر تعظیم چُپیتا بیٹھا نہ کوئی گل زبانی
مہر افروز شزادہ ڈٹھا صورت چن اسمانی
6073
سر پیراں تک تکدی جاندی ویکھ تعجب ہوئی
سوہنی بنھنّنی نقش شکل دے جوبن انت نہ کوئی
6074
چہرے اُتےّ اقبالاں دا نور دئے چمکارے
مجلس اُتے سایہ پھریا کوئی نہیں دم مارے
6075
نیویں نظر سبھس دی ہوئی کوئی نہ ساہواں ویکھے
عجب سرشتے مثل فرشتے سُچا سی ہر لیکھے
6076
ویکھدیاں ہی مہر افروزے مہر پئی وچ سینے
ایسا آدم زادہ ہوسی گھٹ گھٹ وچ زمینے
6077
جھل سلام لگی فرماون نال زبان رسیلی
کون کوئی سچ کہو کھاں میاں جائیوں کس اصیلی
6078
پریاں دا ایہ ملک تمامی سے کوہاں دے توڑی
آدم زاد نہیں اس دھرتی ہر گز لبھدے لوڑی
6079
نبی سلیماں جی تھیں پچھوں اندر ایہناں مکاناں
آدم زاد نہ آیا کوئی تیرے باجھ جوانا
6080
کتھوں ہیں توں مرد سپاہی کس مطلب نوں آئیوں
کس آفت نے چاء لیاندوں ایس مکان پچائیوں
6081
سیف ملوک رہیا چُپ کیتا پوند نہ ہویا جوابی
مہر افروز اگے چادھریا رقعہ کھول شتابی
6082
کمر بند لفافے اتے لکھیا نام پری دا
دادی دے ول پوتی لکھیا جو جو ادب کریدا
6083
منشی کھول رقعہ ہتھ پھڑیا پڑھ بیان سناوے
میں گھٹ جاناں کم خطاں دا مولیٰ راس لیاوے

بدیع الجمال دا خط

6084
سر نامے دا نام اسے دا جو دیندا انعاماں
روز بروز پُچاوے روزی کیا خاصاں کیا عاماں
6085
جے کجھ رزق خلق دا کیتوس انّوں ماسوں کاہوں
ہر ہر جائی آپ پُچاندا بند نہ ہوندا راہوں
6086
قسمت جوڑ بناندا آپوں جو جوڑی اس جوڑی
توڑے لکھ کرے چترائی ہر گز کسے نہ توڑی
6087
نور ظہور گُلاں دا کر کے رونق دے بہاراں
مست محبت نال کریندا طوطے بھور ہزاراں

لفظالی:
ان بھانے= غیر پسندیدہ، چُپیتا= چپ کر کے ، بنھنّنی = بناوٹ ۔ سریر دی کاٹھی، نقش شکل دے= شکل دے فیچرز وی سوہنے ، انت = آخری حد، سایہ پھُریا= رعب چھایاہویا سی ، کوئی دم نہ مارے= کوئی ساہ نہیںسی لے سکدا ، سبھس دی= ساریاں دی، سرشتے=فطرت ولوّں ، لیکھے= حساب ولوّں ، سلام جھلن = سلام قبول کرناسلام دا جواب دینا، جائیوس کس اصیلی= کس خاندانی ماں نے جمیا ای ،نہ لبھدے لوڑی= تلاش کیتیاں نہیں ملدے، پوند = پہلے ، جوابی= جواب دین والا سوالی دا الٹ، کمر بند لفافہ= اجیہا لفافہ جنہوں باریک فیتے دا اک بند، لمبائی دے رُخ تے دوجا بند چوڑائی دے رُخ پیا ہووے دوہاں بنداں دی ملنی تھاں تے مُہر لگی ہووے،مولیٰ راس لیاوے= اللہ تعالی سارے معاملے سِدھے کرے ،انوں ماسوں کاہوں=انا جاں ۔ ماساں تے گھاہ بوٹ دے ذریعے ، ہر ہر جائی = ساریاں تھاواں تے، جوڑی= زوجین دا اک جوٹاCouple،چترائی = چالاکی ، بھور= بھونرے، ہزاراں = بلبلاں،