ورقہ 326

6107
جیکر حال اندر دا ویکھیں جو میرے پر ہوندا
ہووی محبت اگلی میں تے پِٹیں کھول پروندا
6108
جے کجھ جال بے چارہ تکدا جال اندر وچ جاندا
جال سٹے غم ماچھی تائیں جے اوہ تکے واندا
6109
شاہزادے دے درد وچھوڑے کیتی جان اضاعیں
نک وچ آئے ساس پیارے جھبدے پھیر ملائیں
6110
کُٹھی وانگ کبوتر پھٹکاں طاقت تاب نہ ریہا
تدھ ہوندے میں کیوں دکھ روندی حال خراب اجیہا
6111
توں بلائیں لیندی آہئییں جدوں بلا نہ آہی
ہُن بلا لگی بن دردی کر میری ہمراہی
6112
اک اک وال میرے دا صرفہ کر دی سیں توں اگے
اج نہیں آ تکدی مینوں اگ بلی وچ جھگےّ
6113
ماواں والی مہر محبت جے توں اج نہ کرسیں
میں مر جاساں نال افسوساں رورو آہیں بھرسیں
6114
اج علاج کریں کجھ میرا دیساں سدا دعائیں
ہور نہیں کوئی دارو چلدا سیف ملوک ملائیں
6115
درد دھیاں ماں ماسی ونڈے یا پھر نانی دادی
تاں میں درد ہجر دی ماری تدھ ول ہاں فریادی
6116
چیتا چیتا بھل نہ جائیں کریں ملاپ اساڈا
نہیں تاں کھا کٹاری مرساں لہسی لنگ تساڈا
6117
چٹی چادر داغ لگے گا شہرت تے بدنائیں
گھر گھر اندر قصہّ پوسی ملکیں شہر گرائیں
6118
پیؤ دادے دا نام گُمےّ گا دشمن خوشیاں کرسن
ساک شریک مریسن تاڑی خوفوں مول نہ ڈرسن
6119
وکیا چت رہاں نت ماندی وس نہیں کجھ میرا
رکھ امید توقع بہتی پھڑیا پلا تیرا
6120
جنس نا جنس نکھیڑیں ناہیں کُفو ناکفو نہ جانی
مذہب پاک عشق دے اندر کیا چوہڑا کیا رانی
6121
نامحرم اغیار نہ جانیں سیف ملوکے تائیں
نال حقارت ویکھیں ناہیں ڈاڈھا ہے رب سائیں
6122
مینوں نک نکیل اجیہی عشق اوہدے نے پائی
سے برساں دی قیدے وانگر دِسدی پلک جدائی
6123
ایہو عرض سوال بندی دا ایہو خواہش شادی
آس مراد نہ تروڑیں میری دئیں ایہو ور دادی
6124
نہیں تاں بہت افسوس کریسیں روسیں تلیاں ملسیں
ایہ ویلا پھر لبھسی ناہیں پچھو تاندی چلسیں
6125
مہر افروزے رقعے وچوں جاں سُنیا ایہ قصہ
دل وچ کہندی نال عشق دے پیش نہ جاندا غصہ

لفظالی:
پروندا= پراندہ ( جہلم دریا دے کنڈھے لُون میانی بھیرہ تحصیل بھلوال وچ اج وی پراندے نوں پروندا آکھدے نیں ، پراندا کھولنا= ماتم کرن واسطے سر دے وال کھلارے جاندے نیں ، جے =جو ، جالنا= بھوگنا۔جھلنا، واندا= اکلا ۔ لُگا، اضاعیں = ضائع ، پھٹکاں = تڑپاں ۔ نزع دم پر ماراں، بلائیں لینا = صدقے واری جانا، صرفہ= بچا دا جتن ہمدردی، جھگے =کُڑتے ۔ چولے، دارو چلنا= علاج دا موثر ہونا، چیتا چیتا= خیال کریں کِتے چیتا نہ بھل جائیں ، لنگ لہ جانا= بد نامی ہو جانا۔ لنگ پر دہ لتھ جانا، بدنائیں = بدنامی، گرائیں = پنڈاں وچ ، نام گُمنا= شہرت نوں داغ لگے گا، تاڑی مارنا= ٹچکر نال توڑیاں مارنا، وِکیا چت= دل دے بیٹھی ہاں ، ماندی = منجی تے پئی بیمار، کسے دا پلا پھڑ نا= مصیبت پئی وچ کسے نوں آگو سمجھنا، کُفو= ہر لحاظ نال برابری کرن والا رشتہ ، اغیار = پرایا ۔ اجنبی، نال حقارت۔۔۔۔۔۔= حقیرسمجھیاں کتے رب سزا نہ دے دئی، پلک= اکھ جھمکن تے لگا سماں، ور = عورت لئی چنیا جیون ساتھی،