ورقہ 328

6145
کہیوس ایہو لکھیا ایتھے جس دی ہے ایہ مورت
نام بدیع جمال پری دا ہوسی سُندر صورت
6146
شاہپالے دی بیٹی ہوسی اوہ شاہرخ دا جایا
شاہ رُخ دا پیو نبی سلیماں ایہو لکھیا آیا
6147
تخت بدیع جمال پری دا باغ ارم وچ ہوسی
اک شاہزادہ عاشق ہوکے لوڑے چڑھ کھلوسی
6148
دوجی مورت جو مرداویں اس دے حرف سناواں
عاصم شاہ دا بیٹا ہوسی سیف ملوک اس نانواں
6149
عاصم بن صفوان ہووے گا والی تخت مصر دا
چار اک سے شہزادہ ہوسی اگے اُس دے بردہ
6150
جاں ایہ گل سُنی اس بی بی کیتوس ہتھ اُتیرے
سر اتے کوئی جا بنی سی اس اندر ہتھ پھیرے
6151
اوتھوں اک کتاب مُزخّم کڈھ بی بی نے پھولی
سیف ملوکے دے ہتھ دتی پڑھ سمجھائےں بولی
6152
سیف ملوکے سی اوہ اگے یاد صحیح زبانی
پھولدیاں ہی نکلی اگوں صفت ثناء نورانی
6153
احمد مرسل ختم نبیاں دو جگ دی جس شاہی
صلی اللہ علیہ وسلم ہوگ حبیب الٰہی
6154
مکی مدنی قرشی جیلی باعث خلق تماماں
آل اولاد سمیت اُوہناں تے ہون درود سلاماں
6155
نبیاں دا سرتاج ہووے گا آخر وچ زمانے
نام محمد عربی جمسی عبداللہ دے خانے
6156
جاں دنیا تے پیدا ہوسی بھجسی کفر کفاراں
کسریٰ دے گھر کسر پوے گی کنبسن کوہ دیواراں
6157
عالم تے رُشنائی ہوسی نور ہدایت کولوں
جُمل جہان ہووے گا تازہ عدل رعایت کولوں
6158
غفلت جہل ہنیرے جاسن شمس شریعت چڑھسی
کھُلسن راہ طریقت والے ہر کوئی اندر وڑسی
6159
وسسی شہر حقیقت والا جاسی ظلم مجازی
عرِفٰت بازار محمد رونق لاسی تازی
6160
دو جہاناں وچ دھروئی اوس نبی دی پھر سی
جو کوئی اس دا کلمہ پڑھسی دوزخیاں تھیں کِرسی
6161
مائی جی دے شکمے اندر ہوگ اجے پس پردہ
دین اپنے نوں ظاہر کرسی زور تروڑ کفردا
6162
اجے وجود شریف اوہناں دا پیٹوں ہوگ نہ ظاہر
مائی دائی نام اوہدے دا پڑھسن کلمہ طاہر
6163
اوہ محبوب الٰہی خاصہ سر افسر لولاکی
قدم مبارک اس دے چمسن نوری ناری خاکی

لفظالی:
جایا= پُتر ، لوڑے= تلاش وچ ، نانّواں = نام ، بردہ = زر خرید غلام ، مزخم= گلی سڑی ۔ فرسودہ ۔ پاٹی پرانی، قرشی جیلی=قبیلے دے لحاظ نال قریشی، باعث خلق تماماں=ٹ ک لولاک خلقت الافلاک حدیث قدسی، خانے= گھر، کفر= کافراں دا سارا طبقہ ۔ اسلام توں انکار کرن دا عمل ، کسریٰ = سیزر حضور دی پیدائش دے دن ایرانی آتش پرست بادشاہ نوشیرواں دے محل دے چودہ منارے ٹٹ بھج کے ڈگ پئے سن ، کسر= (١)ٹٹ بھج(٢) گھاٹا ۔ بیماری، جمل جہاں = سارا جگ، رعائت= رعایا دا دھیان رکھنا، شمس شریعت= شریعت دا سورج ، وسسی = وسے گا ، مجازی= غیر حقیقی ۔ کُوڑا، معرفت = اللہ تعالیٰ دی تے انسان دی اپنی پچھان، ہوگ = ہووے گا، پس پردہ= پردے پچھے،ماں دے شکم وچ ای ٹ ک روح العباد فی ذکر المیلاد ا ز مولوی عبدا لکریم قریشی قلعداری صفحہ٣٠، سر افسر لولاکی= سرتے لولاکی دا تاج ٹ ک باعث خلق تماماں،مائی دائی= ٹ ک معارج النبوت حصہ اوّل صفحہ745 اردو ترجمہ مطبوعہ مکتبہ نبویہ گنج بخش روڈ لاہور ، ناری = اگ دی مخلوق ۔ جن دیو۔