ورقہ 329

6164
سائے اس دے ہیٹھ ہوون گے دھرت انبر جگ سارے
سایہئ نال شریک نہ ہوسی نوری بدن پیارے
6165
لکھ یوسف اس وال نہ جیہا ہوگ جوان اجیہا
دن دن روپ زیادہ چڑھسی کدے نہ تھِیسی بیہا
6166
حور فرشتے عاشق ہوسن صورت ویکھ پیاری
سبھ تھیں بے پرواہ ہوویگا نال ربے دی یاری
6167
سورج ساہواں مول نہ تکسی سیس نماکے چلسی
بدلی وچ رہے گا چھپیا ہر گز جھال نہ جھلسی
6168
اللہ اس نوں کول بلاسی عرشوں چاڑھ اگیرے
یاراں ہار کلام کرے گا تم میرے ہم تیرے
6169
متھے داغ غلامی والا چودھیں دا چن لاسی
آء ملسی دو ٹکڑے لے کے خدمتگار کہاسی
6170
دوہیں جہانیں خوشیاں ہوسن حوراں منگل گاسن
کرسن ملک مبارک بادی صدقے ہو ہو جاسن
6171
باغ بہار ہوسی کل عالم وسسی رحمت باراں
سبھ پیدائش اس نعمت دا کرسن شکر ہزاراں
6172
جو کوئی تابعداری کرسی سو مقبول ہووے گا
جو مُنکر اس پاک جنابوں سو مقتول ہووے گا
6173
دوہیں جہانیں نامی کرسی چارے یارپیارے
پنج جُثّے اک جندوں ہوسن رحمت نال سنگارے
6174
اک صدیق اک عادل ہوسی اک سخی لکھ داتا
چوتھا شاہ مرداں دا ہوسی نال عشق مدھ ماتا
6175
غالب شیر اللہ دا ہوسی بھائی پاک نبی دا
گِنتر وچ نہ آوے ہر گز رتبہ شاہ علی دا
6176
نام اوہدا سن زور گھٹے گا دیوتیاں عفریتاں
نعرہ سُن کے کوٹ گرن گے پوسی بھانج پلیتاں
6177
دُلدُل دا اسوار ہووے گا خیبر دلدل کرسی
دَل دَل سٹسی لکھ کفاراں جت پاسے مُنہ دھرسی
6178
چوٹ اوہدی کوئی کوٹ نہ جھلسی دشمن مَلسن منجا
سے رستم لکھ بہمن ثانی جھل نہ سکن پنجہ
6179
زور اوہدا کوئی ہور نہ جھلسی فتحیا ہر میدانوں
دین اسلام کریگا پکا کڈھسی کُفر جہانوں
6180
حیدر صفدر شیر بہادر ' شاہ دلیر سپاہی
سے سورج تھیں روشن ہوسی کرسی دور سیاہی
6181
زمیاں تے اسماناں اُتے نوبت اس دی گھُرسی
حوراں ملک نقیب ہوون گے جس پاسے اُٹھ ٹرُسی
6182
نوکر جس دے ایسے ہوسن واہ سلطان اُوہناں دا
نوری بدن مبارک ہوسی سرور شاہ شہاں دا

لفظالی:
دائی= ٹ ک معارج النبوت حصہ اوّل صفحہ745 اردو ترجمہ مطبوعہ مکتبہ نبویہ گنج بخش روڈ لاہور ، ناری = اگ دی مخلوق ۔ جن دیو۔
دھرت= دھرتی ، انبر= آسمان ، کدے نہ تھیسی بیہا= ہمیشہ تازہ رہے گا، ساہواں= مقابل ہوکے، سیس نما کے= سِر جھُکا کے، جھال نہ جھلسی = جلوے کی تاب نہ لاسکے گا، منگل گاون= آمد تے مبارکبادی دے گیت گاون گیاں، ملک= فرشتے ، باراں = بارش ، پیدائش= مخلوقات، مقبول = اللہ دا پیارا ، نامی= مشہور ، پنج جُثے= پنج تن پاک،صدیق = مخلص دوست حضرت ابو بکر صدیق ،عادل = نیاں کرن والا حضرت عمر فاروق، سخی لکھ داتا= حضرت عثمان ، شاہ مرداں = حضرت علی ، مدھ ماتا= عشق دی شراب وچ مخمور، کوٹ گرن گے = فتح خیبر قلعہ قاموص ول اشارہ اے ، بھانج پویسی پلیتاں=کافراں نوں بھجنا پے جاوے گا ، دُلدُل = سیاہی مائل خچر جو حاکم سکندر یہ مقوقش نے رسول اکرم نوں پیش کیتا سی مگروں ایہو حضرت علی نوں عطا ہو گیا سی ، دلدل کرسی= چکرگارا بنادے گا ، کوٹ= قلعہ ، دشمن منجا ملسن = ویری ماندے پئے جاون گے ، حیدر = شیر ، صف در = دشمن دیاں صفاں چیرن والا، گُھرسی= وجے گی، نقیب = آمد تے پورے القاب ہو کرن والا،زِمیاں=زمین اُتے سارے مُلک،