ورقہ 330

6183
آدم جن ملائک حوراں سبھ طفیل اوہناں دے
اوہ سلطان نبیاں سندا ہور پٹیل اوہناں دے
6184
آدم اجے نہ ہویا آہا جان اس نبی کہایا
انبر دھرتی دوزخ جنت خاطر اس دے پایہ
6185
مہتر نوح سلیماں موسیٰ جھنڈا اسدا چاندے
اوس عزیز اگے ہو بردے یوسف جیہے وکاندے
6186
کرسی عرش نہ لوح قلم سی نہ سورج چن تارے
تاں بھی نور محمد والا دیندا سی چمکارے
6187
کُل نبی محتاج اوہناں دے اوہ سرتاج تماماں
آل سمیت محمدبخشا ہون درود سلاماں
6188
آفرینش حضرت جی دا کھلا ذکر کتابوں
خوش آوازے نال شہزادہ پڑھدا جگر کبابوں
6189
خوب آوازہ تن من صافی عشقوں روشن چھاتی
نالے دُکھیا پڑھنے والا ہور عنایت ذاتی
6190
سبھ صفتاں تھیں صفت وڈیری ہویا فضل حضوروں
کھُلیّ عالی صفت مبارک پاک نبی دے نوروں
6191
جیؤں جیؤں پڑھے شہزادہ اُچا نال ادا صفائی
یُمن نبی دا اثر کریندا ہر سینے ہر جائی
6192
ہر پتر ہر ڈالی کمبے ہر ہر محل چبارے
ہر ذرے نوں رقص عشق دا چمکن وانگ ستارے
6193
شاہزادے دے سر تے کیتا لکھ پریاں آ سایہ
جتھے تیک آوازہ پُہتا جیؤ جنتر ٹُر آیا
6194
مِرگاں مَرگاں دا غم چھڈیا شیراں زورا وریاں
تتر باز سبھو رل آئے کٹھیاں ہویاں پریاں
6195
سُن کلام کڈھے سر باہر مچھ سنسار ندی دا
مجلس اندر ظاہر ہویا معجز پاک نبی دا
6196
شور شہر وچ ظاہر ہویا اُٹھیا شعلہ نوروں
تڑ فڑاٹ پیاوچ خلقاں کیا نیڑے کیا دوروں
6197
حالت وچ بیہوش ہوئے سن پیر جوان ایانے
اک دوجے پرڈھہندے اٹھدے جیوں بھٹھی وچ دانے
6198
حوراں دوڑ بہشتوں آیاں جیوں ڈولی ول سیّاں
صفت نبی دی سُن سُن روون آکھن صدقے گیاں
6199
چھوڑ اسمان فرشتے آئے سُن سُن ہوئے دیوانے
شاہزادے پر ڈھہندے جیونکر شمع اُتے پروانے
6200
کوہ قافاں دے پنکھی آئے ہور حیوان چرندے
سنن کلام زمیں تھیں باہر نکلے سبھ خزندے
6201
روون تے کرلاون سارے شوق کنوں دل تپے
پڑھن درود شہزادہ جس دم نام نبی دا جپےّ

لفظالی:
سندا= دا ، پٹیل = شاہی فرمان نال بنایا سردار ۔ پٹہ یا ٹھیکہ تارن دا کاغذ لکھوا کے بنیا معزز سردار، انبر دھرتی= اسمان زمین، پایہ = مرتبہ ۔ درجہ شان ٹ ک لولاک۔۔۔۔۔۔ حدیث قدسی ، آدم اجے۔۔۔۔۔۔= ٹ ک کُنت نبیً والْاٰ دَمَ بَیْنَ الْمَاءِ طین ۔ الدررمنتشرہ امام سیوطی، یُمن = برکت Blessing ، آفرینش = پیدائش، جیؤ جنتر= جیا جنت۔ عام لوک ۔ سب مخلوق،مِرگ = ہرن ، مَرگ= موت ، معجز = معجزہ ، تڑ فڑاٹ= تڑپ ۔ بے چینی، حالت=صوفیانہ حال ۔ وجد، خزندے= ڈنگ مارن والے جانور ، سنسار = مگر مچھ، کنوں = پاروں ۔ وجہ توں ، چرندے = گھاہ بوٹ چرن والے جانور، ڈھیندے = ڈگدے، آوازہ= لَے،کُرسی = اٹھویں اسمان تے تخت الٰہی دا مقام ، پڑھدا جگر کبابوں= بھر پور سوز نال پڑھدا ، لوح= لوح محفوظ،