ورقہ 331

6202
جن دیواں عفریتاں مَلیّ کئی کوہاں تک دھرتی
ہوئے ہجوم اجیہے گویا روز قیامت ورتی
6203
وچ ہوا نہ مِٹدے پنکھی تڑف تڑف کئی مردے
جنت دے دروازے کھلے دوزخ ہوئے سردے
6204
غل پیا اسماناں توڑی دُھر دَھر کجھ نہ رہیا
حضرت دی سُن صفت مبارک ہر کوئی آکھے ایہا
6205
اوّل آخر تیک جِنھاں دا شان نہ تھیندا بیہا
صلی اللہ علیہ وسلم دھن حبیب اجیہا
6206
جیؤں جیوںئ پڑھدا نام نبی دا سیف ملوک شہزادہ
تیؤں تیؤں ہووے آواز صفائی جوش خروش زیادہ
6207
جیؤں جیؤں کرے آواز اچیرا تیوں تیوں سنگھ صفائی
دم دم نال نبی دی برکت ہووے کلام سوائی
6208
صفت نبی دی پڑھے شہزادہ دھر کے خاص ارادہ
ہوندے جاون بول رسیلے روشن صاف زیادہ
6209
پریاں جنّ پکھیرو وحشی سب اکٹھے ہوئے
کیتا اثر کلام تماماں ہنجو بھر بھر روئے
6210
چھجیں کھاریں رُنیّ بی بی ہنجوں جھولیں بھریاں
ہئے ہئے کر کے رُنیاں اوتھے ہور تمامی پریاں
6211
جاں پھر سیف ملوک شہزادے کیتی چُپ کلاموں
ہر اک دا جیؤ جائی آیا کیا خاصوں کیا عاموں
6212
بی بی نے فرمایا بیٹا غرض تیری ہن ایہا
شاہ پری ہتھ لگے کیویں بنے سبب اجیہا
6213
ایہ مہم نہیں سر ہوندی ہے کم مشکل بھارا
توں آدم اوہ پری شہزادی وڈی بلند ستارا
6214
پریاں ناری لوک نیارے پورے قول قراروں
بے وفا تسانوں گِندے بھج ونجو تکراروں
6215
مکر فریب بہانے کر کے پری کسے نوں ٹھگو
ہتھ لگے تا اینویں کیویں چھوڑ کسے ول وگوّ
6216
صاف جواب شہزادے سُنیا لگ گیا غم کاری
دند کن وٹ ڈھہٹھا کھا گردی ہوش گئی بُھل ساری
6217
راوی کہندا مہر افروزے عشق اوہدا ازمایا
اگے ہی پیغام اس گل دا بی بی ول سی آیا
6218
ہور عفریت بدیع جمالے گھلیا آہا اگیرے
سبھ حقیقت لِکھ پُچائیوس کم دادی ہتھ تیرے
6219
حال احوال شہزادے والا نالے اپنا سارا
دادی اگے ظاہر کیتا کریں اساڈا چارہ
6220
ایس میرے پر عاشق ہو کے جھلے قہر نزولاں
مینوں بھی ہن عشق اس دے نے کیتا وانگ رنجولاں

لفظالی:
قیامت ورتی= قیامت بپا ہو گئی، عفریت= ڈراونے جن بھوت، نہ مٹدے= نہیں سماندے، سردے = ٹھنڈے ، نہ تھیندا بیہا= ہر دم تازہ رہندا، دھن= تعریف جوگا صد مبارکاں لائق، دُھر دھر= اُچائی دا حد بناّ ، ایہا= واقعی اجیہا سی، خروش= آواز دی اُچائی ، ارادہ دھرکے= عقیدت سودھ کے ، چھجیں کھاریں رُنی= اینی روئی کہ چھج تے ٹوکرے اتھرواں دے موتیاں نال بھر گئے، جیو جائی آیا= دل اپنے ٹکانے تے آ گیا ہر نوں سکون قلب نصیب ہویا، لوک نیارے= عجیب مخلوق ، بھج و نجو تکراروں = بار بار وعدہ کر کے وی تسیں وعدے توں نس جاندے او ۔ بے وفائی کر دے او، ایویں کیویں= کسے جھوٹھے بہانے نال ، کاری = کم کر جاون والا۔ مارو، رنجولاں = رنجوراں ۔ بیماراں ، دندِ کن وٹنا= دندن پینا، دھٹھا کھا گردی= بھونٹلی کھا کے ڈِگ پیا، اگیرے = اگے ای پہلاں ای ، چارہ = علاج ۔ اُپاء ۔ دارو، جھلے قہر نزولاں = قہر دے اُتارے سہے،ہئے ہئے = ہائے ہائے،