ورقہ 332

6221
جوڑی ساڈی جھب رلائیں میں مردی وچ سولاں
جے ایہ ور' نہ دیہو مینوں ہتھوں موت قبولاں
6222
چیتا دئیں جواب نہ اس نوں جے توں دادی میری
جے اک وار جواب دتوئی مر کے ہوسی ڈھیری
6223
اگے ہی ایہ ہے دُکھیارا پُر پُر سلّیا درداں
اندر اس دا پُرزے پُرزے باہر داعیا مرداں
6224
اتوں تُوں نہ بلدی اُتے پائیں تیل جوابوں
ساعت ڈھل نہ لگسی اونویں مرسی ایس عذابوں
6225
ایہ مویا تاں میں بھی مرساں گھڑی نہ پچھے رہساں
جے تدھ ایہ احسان نہ کیتا مہر تیری کے کہساں
6226
کر کے آس تیرے درگھلیا موڑیں نہیں نراسا
بیدل نوں دلبری بنھائیں دے کے غور دلاسا
6227
جاں جاں جان میرے تن ایہو خاصہ دل داجانی
جے جھڑکیں مر جاسی عاشق میں بھی ہوساں فانی
6228
اکھیں ڈٹھے باجھوں اس نے کیتی ایڈ اشنائی
دنیا اُتے کوئی کوئی ہوسی ایسا مرد وفائی
6229
آدم جنّ پری وچ کیہڑا اتنی ہمت والا
جو اس سفر قضیے کٹے پَین پرنگت شالہ
6230
نام نشان مقام ذُرّیت صورت رنگ جوانی
گھلیاں لِکھ بدیع جمالے صفتاں نیک انسانی
6231
بی بی سبھ حقیقت سمجھی گل نہیں ایہ کچی
شاہ پری دے سخن آزمائیوس کُوڑ لکھے یا سچی
6232
جیؤں جیؤں شاہ پری نے لکھی تیویں ڈِٹھی ساری
فکر پیوس ہن جے مر جائے ہوسی وڈی قہاری
6233
جے اس غش بے ہوشی وچوں بچ کے باہر آوے
دیاں دلاسا لاواں آسا ساک کراں رب بھاوے
6234
عنبر اشہب آن شتابی مغز اوہدے تے ملیا
سیف ملوکے ہوش سنبھالی اُٹھیا خاکو رلیا
6235
شکر گذار ہوئی اوہ بی بی کرن لگی دلداری
غور دلاسا بے وسواسا خاطر بے شماری
6236
آکھن لگی اے شہزادہ نہ کر غم نہ جھورا
کم تیرے وچ ہمت کرساں قسمت نال نہ زورا
6237
نال عنایت رب سچے دی مشکل حل کراساں
مطلب تیرے کارن ہُنیں باغ ارم وچ جاساں
6238
جے کجھ زور میرے وچ ہوسی لاساں جاں جاں سرساں
اللہ بھاوے ناتا تیرا شاہپالے گھر کرساں
6239
سیف ملوک ایہ گلاں سن کے ہتھ بنھ اُٹھ کھلویا
جھُک کے ست سلام کریندا جیؤ پیا سی مویا

لفظالی:
سُول= چْبھن والی ڈھڈ پیڑ، ور= بر۔ جوان کُڑی لئی چُنیا منگیتر ۔ لاڑا، چیتا= دھیان رکھیں ، داعیا= دعویٰ ، نراسا= بے امید، ایڈ= اینی،پُر پُر سلیّا درداں =عشق نے ایہدی پور پورونھی ہوئی اے،ڈھیری = قبر، مہر تیری کے کہساں = تیری محبت دا ذکر کیہ کراں گی، دلبری بنھائےں = حوصلہ قائم کریں ، غور= توجہ، پین پرنگت شالہ= اللہ کرے پورے گنے جاون ۔ قبول ہو جاون ، ذریت= نسل ۔ تخم ولدیت بارے اطلاع، قہاری = قہر دا کم، عنبر اشہب=کالے رنگ دی وڈمُلی وہیل مچھلی وچوں نکلی خوشبو دار موم جو دماغی تے قلبی روگاں واسطے لاہے وند اے،ہُنیں = ایسے ویلے، جاںجاں سرساں=جتھوں تائیں میری توفیق ہووے گی،