ورقہ 15

خواب دیدن یوسف مرتبہء دُوم بہشتم سالگی از عُمر شریف

اَٹھ برساں دا ہویا یوسف پھِر سُفنا دسیایا
ہتھ اپنے وچ عاصا ڈِٹھس اَندر دَھرت دَھسایا
چلیاں جڑاں تے نکل شاخاں ودھیاں وانگ دَرختاں
گُزر گیاں وچ سبھ زمیں دے اِس دیاں بیخاں سختاں
وڈا رُکھ ہویا پُر سایہ نال میوے پُر بھریا
برگ عجب تے شاخاں نازک اصل فروعوں ہریا
عیسیٰ مُوسیٰ پاک محمد تے یعقوب پیارا
ایس درختوں میوہ کھاندے حال ڈِٹھا ایہہ سارا
ہر ہر بھائی عاصا اپنا اندر زمیں دھسایا
لکڑ خُشک رہی اوہ اوویں شاخ نہ پتا آیا
وَگے واؤ جھڑے سبھ دھرتی رہیا نہ نام نشانوں
ایہہ کجھ یوسف سُفنا ڈِٹھا فضل کرم رحمانوں
ایہہ بھی یوسف پاس پِدر دے سُفنا آکھ سُنایا
سُن یعقوب نبی نے اس دا جاتا عالی پایا
شوق پیار پدر دے دل دا وَدھ ہو گیا دو چنداں
یوسف دِل دا مقصد جاتا وچ سبھناں فرزنداں
یوسف نے وِچ بھائیاں ایہہ بھی خواب سُنائی ظاہر
اگ حسد تھیں دِلوں اوہناں دے لاٹاں آئیاں باہر
آپس وچ کریندے گلّاں اسیں نہ ہوئے کائی
پاس پدر ایہہ خوبی اپنی جھُوٹھ کرے وڈیائی
ویکھو کیڈ دلاور دِن دِن ودھیا جاوے
سانوں خود تھیں نیویں کروا تے بے قدر بناوے
بے قدراں وچ نام اساڈے اپنا قدر ودھاوے
پاس پدر سے جُھوٹھیاں خواباں جوڑے طفل سُناوے