ورقہ 335

6278
خوشیئں خوشیئں سیر کریندا نظر چوطرفے پھیرے
دریا تے کوہ قاف اس تھائیوں دسدے آہے نیڑے
6279
لکھ ہزار درخت پہاڑی بہت بلند شماروں
نال اسمان جِنھاں دی چوٹی دسن قاف کناروں
6280
سبز شعاع اوہناں دی کیتا انبر دا رنگ نیلا
رنگ برنگی میوے دِسن کوئی سُوہا کوئی پیلا
6281
بنگلے محل چبارے دھولر باغ اندر خوش جائیں
روضے ' مدرس ' مجلس خانے ' مسجد ہٹ سرائےں
6282
نقش نگار عجائب سوہنے ہر ہر طرح نیارے
ویکھ نقاش خیال اوہدے دے ہوش گئے بھُل سارے
6283
تک معمار ادراکے والا کُند ہویا تدبیروں
حکمت کاریگر دی دِسے چترّ کار منیروں
6284
ہر حیوان انسان پری دی صورت نقش بنائی
بہت کمال نہایت سوہنی زیور لاء سُہائی
6285
ہر پاسے خوشبو پھلاں دی مغز معطر کردی
ہر میوے تھیں باس بہشتی قُوت دے جگر دی
6286
شاہزادہ تک باغ ارم دا ہو تعجب رہیا
دل وچ کہے بہشت اصلیا ہوسی کد اجیہا
6287
بندر تے کوہ قافاں اندر باغیں تے صحرائیں
ایہہ عجائب رُکھ نہ ڈِٹھے نہ خوش آب ہوائیں
6288
جنت اعلیٰ کہندے جس نوں ہوگ متے اوہ ایہا
دنیا اُتے کتھوں ہووے سُندر باغ اجیہا
6289
کر کے سیر بہار چمن دا پھر چشمے پر آیا
جس پر آہو خاطف آہا اوّل آن بہایا
6290
خوش ہوا نہایت مٹھی بہت سکھاون والی
سے برساں دا ماندہ ماڑا کرے نروآ حالی
6291
وگن نہراں لہر بہ لہراں سچے تھاں کنارے
ٹھنڈیاں چھاواں کولے کولے سبزے فرش کھلارے
6292
نارونی دا رُکھ گھنیرا چشمے اُتے ہے سی
دریائی دی چھتری ساوی ہوگ نہ سوہنی ایسی
6293
جھُلیّ واء ہلن وچ شاخاں کرن اشارت راہیاں
آہو ہین تساڈے کارن خوب وچھائیاں ڈاہیاں
6294
چشمے وچوں آ پیاسے ٹھنڈا پانی پیو
چھام گھنی آرام کرو تے گھڑی اسودہ تھیؤ
6295
نارونی دی چھانویں جا کے ہویا دراز شہزادہ
باغ ارم دی واؤ سُکھائی مستی چڑھی زیادہ
6296
مدت دا نندرایا آہا نیندر گھُل مل آئی
سُتا ہو بے ہوش شہزادہ دشمن وار چلائی

لفظالی:
دِسن قاف کناروں = کوہ قاف دی انتہائی اچائی تے پدھر تے دِسدے نیں ، دھولر= شاہی رنگ محل ، خوش جائیں = سوہنیاں تھانواں ، روضے=پھُلاں دے باغ ، ہٹ = کریانے دی وڈی ہٹی، نیارے= انوکھے، مدرس= درس گاہ ،تدبیروں کند ہوون= تدبیراں سوچن توں عاری ہو جاون ، چترکار=نقاش، منیروں = روشنی دین والے ولوں ، سُہائی = سجائی ، اصلیا=اصل وچ ، بندر= در بند' دشوار گذار پہاڑی درّہ ، ہوگ متے ایہا= شایئد ایہہ ای ہووے ، آہو خاطف = چُک کے لے جاون والے ۔ دیو دا ناں، سُکھاون والی = خوش آئند Pleasing ، ماندہ= منجی تے پیا ہویا روگی، نروآ=بھلا چنگا۔ حالی= اوسے ویلے ، نار ونی= انار گھرانے دا اُچا تے گھن چھانواں رُکھ، دریائی = ہرے رنگ داریشمی کپڑا، اشارت= اشارہ سینت ، وچھائیاں ڈاہیاں = بستر وچھائے ، چھام = چھاں، آسودہ= باآرام ، دراز ہویا= لما پیا، نندرایا= نیندر دے غلبے وچ آیا،