ورقہ 337

6313
ایسا دیو زوراور مارے آدم دی کے طاقت؟
عرض کیتی امراواں شاہا پئی اسمانی آفت
6314
اسفند باش قلعے وچ کیکر آدم ہے جا سکدا
سو عفریت بہادر اُت ول جاون کولوں جھکدا
6315
پھر بہرام تساڈا بیٹا جو مویا اُس جائی
اس دا ثانی ہور زورا ور کیہڑا وچ لوکائی
6316
آدم شُوہدے دی کے طاقت نہ کوئی دیو اُجالا
اس بہرام بہادر اگے ہتھ اٹھاون والا
6317
اینویں نال غمی دے تیرا فکر ہویا سودائی
آدم عاجز مُٹھ مٹی دی کرسی کے کمائی
6318
ہاشم آہا نام اس دیوے قلزم دی جس شاہی
اُمراواں نوں آکھن لگا خبر مینوں ایہ آہی
6319
پکا پتہ کتابوں آہا لکھیا وچ کلامے
آدمیاں دے ہتھوں ہوسی موت میرے بہرامے
6320
آدمیئ بِن کسے نہ کُٹھا لوڑو چا جگ سارا
سخت سزا دیاں جد لبھے اوہ دشمن ہتیارا
6321
پریاں دیو اکابر دانے عاقل سگھڑ سیانے
چھ ہزار روانے کیتے ہر پاسے ہر تھانے
6322
اُس آدم نوں لوڑ لیاؤ خون کیتا جِن میرا
لہندے چڑھدے دکھن پربت لوڑن چڑھے چوپھیرا
6323
ٹاپو تے کوہ قاف سمندر جنگل بار اُجاڑاں
ندیان بیلے خیبر غاراں وچ پنجال پہاڑاں
6324
لوڑ رہے ویرانے سبھے خونی ہتھ نہ آیا
پھیر آبادی بھالن لگے مُلکیں پھیرا پایا
6325
شہر ولایت جوہ جوہیرے چشمے حوض سرائیں
رُکھ بغیچے کھوہ بنھوڑے ڈھوکاں کھیت گرائیں
6326
جس جس جائی سُجھدا آہا آدمیاں دا واسا
پریاں دیو لگے سبھ لوڑن مل لیا ہر پاسا
6327
کوئی کدھرے کوئی کدھرے لوڑے کِڑک دیواںنوں بھاری
اوس دہاڑے چالیھ پریاں آیاں وچ اڈاری
6328
باغ ارم دے اتوں لنگھیاں نال قضاء الٰہی
ہیٹھ درخت ڈٹھو نیں سُتاّ آدم زاد سپاہی
6329
اوس درخت اُتے لہہ آیاں گوء مگوء مچائی
ویہہ وسوسے ایہ خونی ساڈا ہور نہ ہوسی کائی
6330
کن آواز اوہناں دا آیا جاگ پیا اوہ راہی
سبھو پریاں دبکا دے کے پچھن اوئے سپاہی
6331
کون کوئی توں کتھوں آئیوں تُدھ معلوم نہ ہویا
پریاں دیواں دے ایہ تھانے کیوں اس جائی سویا

لفظالی:
ُت ول = اوس پاسے، لوکائی= مخلوق ، اُجالا= بہادری وچ نام روشن کرن والا، سودائی = سود اوی مادے والا۔ وہم بھریا، امراواں=درباری امیراں ، کلامے= مقدس الہامی کتاب ، تھانہ = کسے پولیس سٹیشن وچ شامل علاقہ، خیبر= (١) قلعے (٢) پہاڑ دی اچی فصیل وچ گھریا دشوار گذار تھاں، پنجال=گجرات توں کشمیر جاندیاں ١٥ہزار فٹ اُچی برف ڈھکی چوٹی، بار = غیر آباد ان واہی دھرتی،مُلک = مشہور علاقے ٹ ک کھڑی مُلک، رَکھ=سرکاری رقبہ جیہڑا کسے سرکاری کم لئی سانبھ کے رکھیا جاوے، جُوہ= قدرتی گھاہ بوٹ تے درختاں والی سر زمین، کِڑک = کرک ۔ غیرت ۔کند۔انتقامی جذبہ، جوہیرے= چھوٹی جنگلی چراگاہ، بنھوڑا= برساتی پانی دا بنھاں نال گھریا تھاں ، آدم زاد= آدم جنیا۔ آدمی دی جنس وچوں ، گومگومچانا= کانا پھوسی کرنا ہولی ہولی لُکاکے گل کرنا، ڈھوک = پہاڑی دامن وچ دسیا چھوٹا پنڈ اے، ویہہ وسوسے= سو فی صد ، وسوا= وگھہ زمیں دا بیسواں حصہ ، گراں = وڈا پنڈ، سُجھدا= نظر آوندا ، واسا = آبادی ۔ رہائش، جائی= تھاں تے ،