ورقہ 338

6332
احمق ہیں یا جھلاّ خفتی یا مغرور جوانی
کیہڑی جائی آکے سُتوں مار کرے کوئی فانی
6333
سیف ملوک دلیر جوانے خوب جواب سنایا
باجھ رضا ربے دی کیہڑا مارن والا جایا
6334
جدوں قضا الٰہی آسی مُول نہ رہسی ڈَکیّ
حُکمے باجھ نہ مراں کسے تھےں معلم ہے گل پکی
6335
بے گناہ میرے ول جیہڑے بُریاں اکھیں کرسن
ہتھوں ہوگ جنہاں دی آئی میرے ہتھوں مرسن
6336
پریاں نے تد معلم کیتا ایڈ دلیری جس دی
قلزم رنڈی اِسےّ کیتی سچ ایہو گل دسدی
6337
شاہزادے تھیں پچھن لگیاں بن کے وانگ حلیماں
اسفند باش جزیرے تدھے کیتیاں سر مہیماں؟
6338
قلزم دا شاہزادہ اوتھے تدھ ہی مار گُمایا
سراندیپے دی شاہزادی توں چُھڑکا لیایا
6339
جے اوہ شیر بہادر توں ہیں سندر شکل سپاہی
تاں سو شکر اساں بھی ڈِٹھیوں چاہ تکن دی آہی
6340
سیف ملوکے ایہ گلسُجھی ہین ایہ پریاں ایتھوں
سراندیپوں سُنیاں گلاں رہ رہ آئیاں جتھوں
6341
جیکوئی دور ملک تھیں ہوون کد واقف دستانوں
باغ ارم وچ آیاں ہوسن زریں شارستانوں
6342
آہو مہیّیں کُٹھا آہا شاہزادے فرمایا
ملکہ خاتوں قیدوں کڈھی جاں رب کرم کمایا
6343
اوسے دل نوں ہمت دتی اوسے یاری کیتی
نہیں تاں اینویں کد مریندا ایسا دیو جمعیتی
6344
پریاں کہیا دس اسانوں کیکر کُٹھا آہی
جیؤں جیؤں گذری سبھ دسالی سیف ملوک سپاہی
6345
ویکھ اقبال دلیری اس دی ہتھ نہ پاون پریاں
ایڈ بہادر دیواں مارے زور اوہدا سُن ڈریاں
6346
حکمت مکر فریبیں کر کے قلزم کھڑیا لوڑن
سیف ملوک بھلاون کارن جُھوٹھ مَسَبدا جوڑن
6347
شارستان سنہری وچوں کہن اسیں ہن آئیاں
شاہ شاہپال تیرے ول گھلّیاں خوشیئں خوشیئں دھائیاں
6348
شاہزادے نوں چا لیاؤ حکم دتا شاہپالے
جے آکھیں تاں چاء لے چلیےئ کول بدیع جمالے
6349
شاہزادے شکرانہ پڑھیا بہت دلوں خوش ہویا
پہن لئے ہتھیار پوشاکی اوّل منہ ہتھ دھویا
6350
پریاں نوں فرمائیوس جھبدے چاء لے چلو مینوں
نال شتابی چایا پریاں ایہہ ہُن کھڑساں تینوں

لفظالی:
خفتی= خبطی، جائی = تھاں تے ، جایا= جمیا، ہتھوں = سگوں ، قلزم رنڈی= ریاست قلزم دا مالک خصم سی ایہدے مرن نال قلزم رنڈی ہوئی، مہیم=مُہم۔ جنہوں فتح کرنا اوکھا ہووے، گُمایا= گنوایا، چھُڑکانا= رہائی دلانا، چاہ= خواہش ، آہو= ہاں ، جمعیتی، چوکھے ساتھیاں والا۔ گروپ لیڈر ، دسالی = دسیّ ، بھُلاون خاطر= بہلانے کے لئے ، مسُبدا= مُسودا۔ طبع زاد مضمون، دھائیاں = نس دوڑ کے آیاں ، پوشاکی = لباس دے نال پاون والے ہتھیار، شتابی=جلدی چھیتی،