ورقہ 339

6351
ست دن تے ست راتیں اُڈیاں کرکے تیزا ڈاری
اکس پہاڑ اُچے تے لتھیاں کِلک اوہناں نے ماری
6352
آن ہجوم اکٹھے ہوئے پریاں دیو مریلے
آکھن نس ڈٹھوئی شخصا اگے ہی بہوں ویلے
6353
ہن جاسیں تاں پُچھساں ایتھوں آئی شامت تیری
مدّت ہوئی اساں بھی چڑھیاں کیتی لوڑ بتیری
6354
قلزم دے درباروں آئے اسیں لوڑاؤ تیرے
اس سلطانے گھلیا سانوں پکڑو دشمن میرے
6355
ڈھونڈھ تھکے کل عالم تینوں مساں مساں ہتھ آئیوں
چڑھیا خون اکھیں وچ تینوں اوسے آن بہائیوں
6356
بے گناہ شاہزادہ ساڈا کیوں تدھ مار گُمایا
مار اضاعیں کرساں تینوں اج بدلہ ہتھ آیا
6357
سُن گلاں شاہزادے تائیں بہت آئی غمناکی
کہندا ہے کے مارن میرا عاجز بندہ خاکی
6358
کے ہویا مرویساں شوہدا کے جیون داجھورا
دو افسوس رہے دل اندر ڈاڈھے نال نہ زورا
6359
اک تے مائی بابل سنگیاں مردیاں منہ نہ ڈٹھا
دوجا چھیکڑ وار نہ ملیا یار پیارا مِٹھاّ
6360
اوڑک اک دن مرنا بندے کیا پچھے کیا اگے
نیت پریت تیری وچ مویا پتہ سجن نوں لگے
6361
جان ہووے قربان سجن توں عشق ایمان نہ ہاراں
اپنی توڑ نباہ محمد کجھ پرواہ نہ یاراں
6362
سیف ملوک ایہناں بنھ کھڑیا سنگلدیپ شہر وچ
پریاں دیو عفریت بتیرے ویکھن آئے در وچ
6363
جو ویکھن سو ہئے ہئے کردے ہتھ مروڑن سارے
ایہ جوان نہ مارن جوگا کے کرسن ہتیارے
6364
اوڑک کوٹ اندر پھڑ کھڑیا وچ حضور شہانے
سیف ملوکے ڈٹھے اگے بادشاہی سمیانے
6365
سُچے فرش فروش وچھائے کرسی سے سنہری
تخت جڑاؤ تے شاہ بیٹھا دیواں بھری کچہری
6366
سیف ملوکے نظری آیا تخت اُتے اک تودہ
سٹھ گز لّماقد دیوے دا چہرہ غضب الودہ
6367
سیف ملوک سلام پُچایا جیونکر رسم شہانی
جھل سلام تخت پر گجیا کہندا ہے نقصانی
6368
توہیں میرا بیٹا کُٹھا اسفند باش جزیرے
گھائل کریں جوان اجیہے چایا سئیں تقصیرے
6369
تینوں کُجھ نہ سُجھدا آہا اس دا بھی کوئی ہوسی
جیونکر میں اوہدے غم رُناّ باپ تیرا ہن روسی

لفظالی:
کِلک = خوشی دی چیک ،بہوں ویلے= کئی دفعہ ، لوڑ = تلاش ، لوڑاؤ= ڈھونڈا ؤ، آن بہائیوں= لیا بٹھا یا سی ، گُمایا= گوایا، جھورا=افسوس، جیون=زندگی، شوہدا = عاجز مسکین، چھیکڑوار= آخری مرتبہ، مِٹھا = محبوب Sweet heart، اوڑک = آخر کار ، نیت پریت= پریت دی نیت ۔ پریت دی حالتے (بے ایمان بے وفا نہیں ہویا) در= شہر وچ وڑن دا دروازہ، ہتھ مروڑن= افسوس نال تلیاں ملن پچھتاون، کوٹ = قلعہ، سمیانے=سازو سامان، سے= سو ، شہانی = شاہانہ، جھل سلام= سلام قبول کر کے ، نقصانی= نقصان کرن والا ۔ مجرم ، کُٹھا = کوہیا۔ قتل کیتا، ہے نقصانی= اوئے مُجرما!، چایا سین تقصیرے= تینوں کسے تقصیرنے چُکیا ہویا سی، سُجھدا = نظر آوندا،