ورقہ 341

6389
کیتے اپنے دا دل اندر بہت افسوس کیتا میں
ظلم بُرا ایہ متھےّ لگا ہتھیں زہر پیتا میں
6390
ہائے ہائے ڈب مراں وچ ندیاں نج آیا اس رستے
ٹُٹا شیشہ پھیر نہ جڑیا نال کچے بند بستے
6391
ڈاڈھی ہے تقدیر الٰہی منہ مارے تدبیراں
کس سر دوس محمد پھڑیوس اپنیاں تقصیراں
6392
کیتا عذر خطائی منیّ سیف ملوک شہزادے
ہاشم دا کجھ غصہ گھٹیا رہیا کمی زیادے
6393
گنتریاں وچ آیا کہندا مارسٹاں کہ چھڈاں
اوڑک ورم پتر دا آکھے بہتر جے سر وڈھاں
6394
کدی کہے چا قید کرائیے کدی کہے جے ماراں
کدی کہے بہرام نہ مُڑدا نال اجیہاں کاراں
6395
لِلّٰہ خون پتر دا بخشاں مت میں بھی بخشیواں
گرم پیالا غصےّ والا اندر و اندر پیواں
6396
رہ رہ کے پھر رہ نہ سکیا کیتوس حکم قتل دا
گچ پچاوے کون غصے دا اُچاّبھانبڑ بلدا
6397
ہاشم شاہ فرمایا اوڑک معلم ہویا مینوں
توں دلبند اساڈا کُٹھا قتل کراواں تینوں
6398
جلاّدے ول شارت کیتی ترت اوہ حاضر ہویا
جیوں بدکاراں دے سر آکے ملک الموت کھلویا
6399
بلّیاں اکھیں تے منہ کالا ککیاں داڑھی مچھّاں
چٹے دند لباں تھیں باہر وال موہیں پر لُچھّاں
6400
پھِکی خوء ترشرو دِسے تلخ زبان رنجانی
کَپّوں کھاؤں کردا سُجھے چہرہ مثل سوہانی
6401
رنگ دیدار زُحلّے والا وانگ مریخ صلابت
ویکھن سات دلیری بھجے کھاون آئی آفت
6402
خونی سُرخ پُشاک لگائی باہر تیغ میانوں
تیز اتے خوں ریز زیادہ باشک ناگ زبانوں
6403
مریخی دل ہوئے شکستہ تیغ اوہدی تھیں ڈرکے
جوز ابُرج کرے دو پھاڑاں سر نیزے تے دھرکے
6404
دہشت دس البرز کنباوے پئے پہاڑ تریلی
لرزہ پوے زمیناں تائیں جاں اس نوں شاہ پیلی
6405
توبرہ ریتو بھریا گل وچ خونی نطع بغل وچ
سینکڑیاں نوں ذبح کریندا وانگ قصائیاں پل وچ
6406
رتی رحم تے سہم دلے نوں ترس نہ وچ سرشتے
خونی کم ہمیشہ وانگر ملک الموت فرشتے
6407
اوّل نطع زمیں پر دھریا اُپر ریت کھلاری
پریاں دیو وڈیرے نٹھے ویکھ اوہدی ہتیاری

لفظالی:
کیتا= عمل ۔ فعل ، نج آیا= اللہ کر کے میں نہ ای آوندا، بند بستے= بندو بست۔ انتظام دے ، منہ مارے= ساڈیاں تدبیراں نوں ساڈے مُنہ تے مار دیندی اے ، ( بے اثر کر دیندی اے) دوس= دوش ۔ الزام،خطائی= گناہ ۔ قصور، رہیا کمی زیاوے= تھوڑا بہت رہ وی گیا، گنتریاں وچ آیا= نفع نقصان دا حساب کرن لگا، ورم= سوج ۔ دِلی دُکھ ، لِلّٰہ = اللہ واسطے، گچ= اوڑک دا غضب ، شارت= اشارہ سینت، لُچھاں= کنگھی نہ کتیے بے ترتیبے وال، کپوں کھاؤں= وڈھوں ٹکوں ، سُجھے = نظرآوے، سوہانی= ریتی ورگا کھردرا، زحلے= زحل ستارے نوں المقاتل وی آکھدے نیں ، صلابت= سختی ۔ مضبوطی، مریخی دل = سخت دل والے، جوزا= اسمانی برج جیہڑا دو جوڑے منڈیاں دی شکل دا اے ، البرز= نام ایرانی پہاڑ ، ہتیاری= ظالمانہ روش، نطع =چم دا میزپوش جہدے اُتے سزا ئے موت دے مجرم دا سر رکھیا جاندا اے، پیلی= کھچ دھر وہ کے اگے لے آوے،