ورقہ 342

6408
شاہزادے نوں باہوں پھڑکے ریتے وچ بہایا
اُگر تیغ سرے تے آندی مارن اُتے آیا
6409
قدرت ویکھ خداوند والی کردا کیڈ تماشے
پنجے وچوں تتر چھڈے رحم کیتے جد باشے
6410
مارن لگے شیر دنبے نوں گُرگ کرے اپرالا
بہے چڑی دا راکھا بن کے باشک ناگ ڈنگالا
6411
کھاون لگا باز کبوتر پنجہ مار غضب دا
لگڑ اس تھیں چھڑکاکے رکھے فضل پچھانوں ربدا
6412
ہاشم شاہ اگے جلادے اس دم عرض پکاری
شاہا تیز تیرے اقبالوں واڈھ میری تلواری
6413
ہمت تیری نال نروآ زور مینوں وچ باہاں
دوجا دم نہ لیندے مڑ کے تیغ جیہناں تے واہاں
6414
اج دن تیک نہ بچیا کوئی جو میرے تک پُہتے
کرگ شفاعت کون بندے دی پاپ کمائے بہتے
6415
شالہ خیر تساڈی دائم مانوں خوشےاں لاکھاں
دو تن سخن میرے دل آئے جند بخشو تاں آکھاں
6416
ہاشم کہیاکہہ توں بیشک جو تیرے دل آئی
نیک صلاح سبھس دی سُنیے کھائیے نہیں خطائی
6417
نیک نصیحت ہر دی منیے عار نہ کرئیے ماسا
جو آمناّ دے گھر آیا ہویا بے وسواسا
6418
ہاشم شاہ اگے جلادے عرض بنا سنائی
شاہ وڈا شاہپال اُچیرا نبی سلیماں جائی
6419
خویش قبیلے اس دے سارے میر وزیر تمامی
بھیناں بھائی ساک اشنایاں کیا خاصی کیا عامی
6420
سبھناں رل صلاح پکائی ایہ شاہزادہ کائی
شاہپالے دی بیٹی دے کے کرنا خاص جمائی
6421
سرو بانو ہمشیرہ شاہ دی مائی مہر افروزے
ویکھ پسند کیتا ایہ لڑکا اندر پہلے روزے
6422
ناتا کرن اوہدا اوہ گیاں شاہپالے دے گھر نوں
نبی سلیماں ایہ کُڑمائی کیتی ویکھ امرنوں
6423
ڈرکھاں روح نبی دے کولوں مت کو غیرت آوے
اُٹھے فتنہ شر اجیہا ایہ کم مشکل پاوے
6424
تیرے تے شاہپالے اندر ویر پویگا بھارا
ایہناں معاملیاں تھیں پچھوں ڈُھکدا مندا کارا
6425
خون اُدھالے کیکر پچدے ایڈ جنہاں اپرالے
شہر ولایت اندر شاہا بہسو نہیں سُکھالے
6426
تدھ جمائی اس دا کُٹھا کد اوہ کرسی تھوڑی
ایہ کم کر کے چھپسیں کتھے ہے کوئی جاگہ لوڑی؟

لفظالی:
اُگرنا= مارن لئی الارنا، کیڈ = کڈّے، باشا = باز توں چھوٹا گلابی اکھاں والا شکاری پنچھی، اُپرالا= امدادی جتن ۔ اُپا مصیبت وچ دستگیری، ڈنگالا= ڈنگ مارن والا، باشک ناگ= ایس جگت دا سبھ توں وڈا سپ، چھُڑکانا= رہائی دلانا، واڈھ= کاٹ، نروآ= صحت مند۔ اروگا ، ہمت = خیال ۔ ارادہ۔ جرت۔ بہادری، دم =ساہ، کرگ= کرے گا، عار = شرم۔ جھِجک، نبی سلیمان جائی = نبی سلیمان دا جانشیں ، آمّنا دے گھر آیا= جنہے آمنا صدقنا آکھ دتا ۔ جہنے ڈھڈوں ایمان لے آندا ، غیرت = حمیت ۔ کِند۔ گرمی ۔ غصہ، ڈھکدا مندا کارا= بھیڑا نتیجہ چھیتی نکل آوندا اے، ادھالا= رن اغوا کرن دا کیس ،ہے کوئی جاگہ لوڑی= کوئی جگہ لبھ ڈھونڈ ھ چھڈی آ۔کتھے لُکیں گا؟