ورقہ 343

6427
آدمیاں دے مُلکے اندر باپ اوہدے دی شاہی
چاراک سے شہزادہ اس دا خدمتگار سپاہی
6428
دیو پریاں دے مُلکے اندر کد بَچسیں شاہپالوں
ادھر نٹھوں اوہ مریسی ڈاڈھا اے تیرے نالوں
6429
ایس جوانے خون تساڈا کیتا نال نادانی
عشقے سی مت ماری اس دی کر بیٹھا دیوانی
6430
زوری خون کرایا اس تھیں چا چُکا زنانی
موت اوہدی سی اس دے ہتھوں لکھی قلم ربانی
6431
جٹ فقیر مقدم ہویا موضع وچ پلاکے
کہندے بھینو قتل کرایا ویری چا چُکاکے
6432
ویری کولوں ویر کوہاون بُرے رناں دے کارے
ہتھیں زہر پلا کھپاون خاوند یار پیارے
6433
کد کسے دی سکیّ ہوئی جس نے نار سدایا
سے برساں اگ پُوجے کوئی پھر ساڑے ہتھ لایا
6434
نور حیا ہدایت والا بُرقع گرد جِنھاں دے
سو کیوں ناریں گنئیے بھائی مرد ایمان تنہاں دے
6435
کے ہویا جے چہرہ ساڈا ہو گیا مرداواں
جس دی نیت مرداں والی سوئیو مرد سچاواں
6436
ناریں سو جو شہوت بھریاں تاڑن ڈنڈ جواناں
اک چکھن پھر دوجا رکھن لکھّن بُرا پُرانا
6437
کھیکھن تھیں کر خوف محمد باہر نکل اس گلیوں
بُریاں تھیں بریائی نکلے ہے بھلیائی بھلیوں
6438
اینھاں گلاں تھیں ہے کے لبھدا عیب کسے دا کرنا
اپنا آپ سنبھال محمد جو کرنا سو بھرنا
6439
عرض کرے جلاد بے چارہ مُڑ مُڑ نال تاکیداں
نام جلاد تے کم شفاعت راہ دسے بے دیداں
6440
کہندا آہی خبر تسانوں بِھیں بہرام جوانے
آدمیاں دے ہتھوں مرنا اوڑک اکس زمانے
6441
جیونکر توڑوں لکھی آہی سرپر اوہو ہوئی
نہیں تاں اس بہادر دیوے مار نہ سکدا کوئی
6442
ایسا رستم دستاں آہا دیو پریاں وچ نادر
جیؤں اجڑ وچ شیر تیویں سی لشکر وچ بہادر
6443
دس ہزار نرہ دیو جنگی چہل ہزار عفریتے
اکسے حملے نال ہلائے مار گُما پِڑ جیتے
6444
ایہ کمزور جوان بے چارہ کے آہا اس اگے
پر جاں گھڑی برابر ہووے ساعت ڈِھل نہ لگے
6445
کرو قیاس دلے وچ آپے کے کجھ اس دا بادر
نال اوہدے کے قدرت دھردا توڑے لکھ بہادر

لفظالی:
چار اک سے= چار کو سینکڑے، ڈاڈھا= جابر ۔ غالب، دیوانی= دیوانگی، موضع پلاکے= میر پور کوٹلی سٹرک ڈڈھیال پُل کول جٹاں دااک پنڈ، جٹ فقیر مقدم= ٹ ک تفصیلاں، وِیر= بھرا، کھپاون= دفناکے ختم کر دیون ، نار= (١) ناری عورت(٢) اگ ، لکھن = لکشن لچھن ۔ بھیڑی وادی بری علامت، سچاواں = اصلی۔ سچ تے قائم ، تاڑن= للچا کے ویکھن، کھیکھن= جھوٹھے مکر۔ بہانے ، بے دیداں = انھے لوکاں نوں ، اوڑک = آخر کار، سر پر = لازماً Definitely، نرہ دیو=دیو تے انسان دوہاں دے گُن رکھن والا دیو مالائی اکھڑ مردِ میدان ، چہل= چالیھ ، گھڑی برابر ہووے= مقررہ وقت پورا ہو جاوے، توڑے = بھانویں ، قدرت دھرنا= طاقت دا مظاہرہ کرنا،