ورقہ 344

6446
جو کجھ وچ کتاباں لکھی ہونی سی سو ہوئی
سر پر منّ رضا ربے دی دوس نہیں اس کوئی
6447
دوجا ہور سنو گل میری ترکھے کم شیطانی
اگے بھی تُدھ نالوں وڈے ہوئے شاہ جہانی
6448
جیؤں جیؤں دنیا تے اوہ ورتے سو ورتب بھلیرے
جے چلیں پھڑ چال اوہناں دی ایہ بہتر حق تیرے
6449
طوق سنگل جمشید بنا کے چھوڑ گیا اس گلّے
بند خانہ اسکندر کیتا تقصیری دُکھ جھلے
6450
زندہ مارن پھر بھی سوکھا جاں چاہیے مروایا
مویا گیا مڑ کیکر لبھسی جس دن دینا آیا
6451
ہاشم شاہ جلادوں سن کے گل پسند لیاندی
کہندا اس نوں توں ہیں دسیں ایہ اصلاح اساں دی
6452
جوتوں دسیں سوئیو کرئیے گل کہی تُدھ خاصی
پر اک بھاوے ناہیں اس دی مُڈھوں کرن خلاصی
6453
عرض کیتی جلّادے شاہا اس نوں قید کراؤ
شاہپالے دی جاں جاں توڑی مرضی نہ آزماؤ
6454
جے اس کجھ اپاؤ نہ کیتا بانہہ اسدی نہ لوڑی
اس ویلے بہرامے بابت مارسٹن گل تھوڑی
6455
جے اوہ زورا کرکے منگے دے جمائی میرا
قیدوں کڈھ کریسیں حاضر تاں کم چنگا تیرا
6456
ہاشم شاہ جلاّدے تائیں آفرین پکاری
ایہ صلاح پسند لیاندی نالے مجلس ساری
6457
جلاّدے نوں خلعت دے کے کیتا وچ امیراں
خونی قید کراون کارن کرن لگے تدبیراں
6458
قلزم کوٹ اندر سی کھوہا ڈُونگھا ودھ شماروں
بہت لماّ تے باطن وچوں کالا تار زناروں
6459
یا اوہ روز حشر دے والی آہی رات ہنیری
ویکھن سات کنارا اس دا جاندی بھج دلیری
6460
کے کجھ آکھاں تھلا اس دا دھئول مچھی تک پُہتا
پیروں سِرا نہ نظری آوے جے سو تکیے بہتا
6461
جے کر پتھر اُتوّں سٹیے رہے برس تک راہی
جیا جُون اوہدے وچ مر کے گندھی ترکیّ آہی
6462
جے سورج وچ جھاتی پاوے ویکھ ہنیرا نسدا
کالکھ بُری اُہدی وچ آیاں نور دہیں دا کھسدا
6463
بُرا دُرگ دیواں دا آہا دوزخ دنیا اُتے
سپ اٹھوئیں ہور خزندے وانگر کالے کتے
6464
پَیریں سنگل طوق گلے وچ شاہزادے نوں پاکے
اوس درگے وچ وگایا بیٹھا تھلے جا کے

لفظالی:
سرپر= لازمی، دوس = دوش ۔ الزام،تر کھے کم شیطانی=جلدی والے کم شیطانی ہوندے نیں ٹ ک 373،ورتب بھلیرے =ودھیرے چنگے سلوک،طوق=لکڑی دا اوہ چوکھٹا جو قیدی مجرم دے گل وچ لمکایا جاندا سی ۔سر طوق اندر پھسیا ہوندا سی ایس توں مجرم نوں لوکاں دیاں نظراں وچ ڈیگنا مقصود سی،سنگل=ہتھاں دی ہتھکڑی تے پیراں دی بیڑی ایرانی بادشاہ جمشید نے ای بنوائی سی،بندخانہ =جیل ،تقصیری=قصور وار،مجرم،باطن=اندر ،اُپائ=علاج۔چارہ،بانہہ لوڑنا=زندہ قیدی دی بخریت واپسی چاہنا،جمائی=داماد،کوٹ=قلعے ،تار=تاریک۔انھیرا،زنار=اوہ دھاگا یا زنجیرجہیڑی یہودی عیسائی تے ہندو گل وچ پاندے نیں تے مجوسی لک دو ائی نبھدے نیں،اسلامی نظریے نال اسلام نوں نور تے کفر نوں انھیرا آکھیا گیا اے،دھولمچھی=ہندو دیو مالائی عقیدے سیتی دھرتی دے تھلے پاتال وچ پانی اے پانی اتے مچھی تے مچھی اُتے اک چٹا بلداے جہیڑا سِنگاں اتے دھرتی ٹھلہی کھلا اے۔مطلب اے پئی کھوہ دا تھلاانت دا ڈوہنگھا سی،درگ=انھا غار، خزندے=ڈنگ مارن والے جانور، گندھی=بدبودار،جیاجون =چھو ٹی موٹی مخلوق