ورقہ 348

6522
کہسن واہ یرانہ تیرا یاد نہ کیتوئی جانی
یار بنا مڑ سار نہ لیوّ مار کرائیوئی فانی
6523
توڑے میں نہ تکساں جا کے خلقت ہور تکیسی
جگ بدنام کرے گا تینوں بولی لوک مریسی
6524
کس مذہب وچ جائز آیا بھجن قول قراروں
اُوْفُوْ بِعَھْدِیْ پرئیے مکھ نہ موڑیں یاروں
6525
ویکھاں یار قرار چمن دا کے گُلاں پھَل پائے
نازک بدن اُتے اُٹھ خاراں نیزے آن لگائے
6526
ویکھ شراب شرابی تائیں سٹ سٹ کے مُنہ بھندا
تاہیں نام حرام دھرائیوس پاک شئیں دا بندا
6527
ویکھاں رات پیالا چن دا جس ویلے بھن سَٹدی
عالم تے منہ کالکھ لیندی کے رُشنائی گھٹدی
6528
کے امید تیرے سنگ رکھان کس ہکھی خوش ہوواں
عمر چلی تدھ قول نہ پالے پیا نصیبے روواں
6529
ایسا مرد نہیں میں کچا تیری بے پرواہیؤں
یاد تیری تھیں غافل ہوواں نساں تیغوں واہیؤں
6530
عشق تیرے دے رستے اندر جے لکھ سختی سہساں
رنج ہوکے اک قدم نہ ہٹساں پھیر اوتے ول ڈھہساں
6531
کون تکے اس ویلے آکے حالت میری مندی
اک فراق دویا تن گھائل قید ہویا وچ بندی
6532
نہ منہ یار کہاون جوگا کراں سنگار جے لاکھاں
نہ دل ایہ گواہی دیندا بے وفا تدھ آکھاں
6533
عاجز کیتا خو تیری نے نام تیرا کے دھرئیے
نہ جانی نہ دشمن جانی دوئے کہندے ڈرئیے
6534
جے لکھ ظلم کرو پھر رکھساں جانی نال تسانوں
نام بدیع جمال جِنھاں دا خون حلال تنہاں نوں
6535
خوب شکل محبوب اجیہا مشکل تروڑن یاری
سَو سَو واری راہ اوہدے تے بہتر ہے جند واری
6536
گلے اْلاہمے آکھ شزادہ مڑ کے پچھو تاوے
نال خیال جمال پری دے حال احوال سناوے
6537
کہندا ہے بدیع جمالے میں تُدھ پیا وچھوڑا
میں رنجور تیرے غم اندر تدھ بھی نہ غم تھوڑا
6538
پیر شہید کرے کوئی مدّد لاوے تیر نشانے
اس قیدوں تے درد فراقوں کڈھے کسے بہانے
6539
ٹھنڈی واء تساڈے ول دی اس کھوہ وچ نہ لگدی
جس واؤ وچ بوء نہ تیری ساڑے وانگر اگ دی
6540
متھا مار زمیں پر پٹکے ڈھہندا کھلا کھلوتا
کہندا یار وچھنا تدھ تھیں درداں وچ پروتا

لفظالی:
سار نہ لینا= خیر خبر نہ لینا، لوک= پنڈ ۔ پنڈ والے ، قول قراروں بھجنا = عہد کر کے مُکر جانا، اُوفُوا بعہدی = ق م سورۃ البقرہ ٤٠، سٹ سٹ کے منہ بھنا= نشے نال بے ہوش کر کے مُنہ پرنے ڈیگدا ، اٹھ = پیدا ہو کے، تاہیں = تدے ای تے ، کے = کنی، رُشنائی= (١)جَس ۔ نیک نامی (٢) چانن، ہکھی = اُمید ۔ آس ، تیغوں واہیوں = تلوار چلاون توں ، رِنج ہوکے= ناراض ہو کے ، اوتے ول = اوسے پاسے، ڈِھہساں = ڈگاں گا، دُویا=دُوجا،جے= بھانویں ، نال خیال= تصوروچ ، ویکھاں= ویکھ کھاں، پیر شہید= حضرت پیر ے شاہ غازی جیہڑے چوراں نال لڑدے شہید ہو گئے سن، ول دی = طرف دی ، وچھنا= وچھڑیا گیا ہاں۔،گُلّاں= گلاب دے پھُلاں ،پروتا= پرویا ہویا،