ورقہ 349

6541
کجھ گناہ بے ادبی ہوئی قید ہویوس اس راہوں
چاہ تیری دی بھاہ قبولی کون کڈھے ہُن چاہوں
6542
ہتھیں پیریں سنگل بیڑی آویکھاں میں قیدی
دُکھ جھلاں تے مکھ نہ موڑاں تیرے ول امیدی
6543
جے میں لکھ بے ادبی کیتی کیتا اپنا بھرنا
توں حاکم میں رعیت تیری کر لے جے کجھ کرنا
6544
ہر گز چِت نہ لیا پیارے کیتا سخن دلیری
رحم کریں ہن عاجز ہویا قید بُری تک میری
6545
جے میں سو گستاخی کیتی ظلم تیرے کُجھ جھلےّ
اجے نہیں گستاخی مُکیّ نہ کر ستم اولّے
6546
ایسے طرح نہ رکھ ہمیشہ مار اِکے کر یاری
یا تلواری دے منہ دے کھاں یا منہ دس اکواری
6547
جے میں نال تساڈے مندا جانے رب دلیلاں
بے دوسے سردوس قبولے اگوں شرم اصیلاں
6548
جیوندیاں تدھ یاد نہ کیتا مویاں دلاسا دیسیں
ہے امید تیرے تے سجنا! مت سر ہتھ دھریسیں
6549
ہتھیں مار ہوواں قربانی کم تیرے سر لگے
کھوہ پیا ایہ جیون میرا مرن بھلا تدھ اگے
6550
پاس تیرے ہن پُہچن اوکھا گلساں وچ درُگاں
درد میرا سردردی تینوں کیونکر نیڑے پُگاّں
6551
نِموّ جھان بُکل وچ بیٹھا ڈردا سیس نہ چاواں
دُور بھلا مت کول ہوواں تاں تینوں ہرج پچاواں
6552
خوشی رہو تم یار پیارے دُور اسیں دکھیارے
سُکھ نصیب تیرے میں چائے بھر دُکھاں دے کھارے
6553
دُکھ سدا سُکھ گاہ بگاہاں دُکھاں توں سُکھ وارے
دُکھ قبول محمدبخشا راضی رہن پیارے
6554
ہے سجنا! ہن پُہچ شتابی واگ چلی چھُٹ ہتھوں
ایہو خوف آہا دل میرے ایس بیگانی ستھوں
6555
تدھ کہیا سی نہ ڈر مولے کرساں میں اُپرالا
ہُن اس سخت مصیبت اندر ہویوس مرنے والا
6556
حسن جمال تیرا کس کاری عاشق سِکدا مرسی
جاں دیدے نابینے ہوئے پھر سرمہ کے کرسی
6557
دنبہ جد بگھیاڑاں کھادا آجڑیاں کے کرنا
کانگے نینہہ گھراں دی پٹی کس اُتے چھت دھرنا
6558
جاں کھیتی دا ککھ نہ رہیا نہ سُکاّ نہ ہریا
کس کم دھوپ پکاون والی کس کم بدّل برھیا
6559
سجنا! سار نہ لئی آ میری آ ویکھاں کے رُولا
نک وچ آئے ساس محمد درسن دس مقبولا

لفظالی:
راہوں= قاعدے قانون ۔ رسم رواج توں ، بھاہ = اگ، چاہوں = کھوہ توں ، تلواری = جلاد، مندا= بُرا ، مت سر ہتھ دھریسیں = شائد توں میری سر پرستی کریں گا، دُرگاں = انھیرے غاراں، کم = مارن دا کم ۔ قتل، پُگاں = پُہنچاں ، کھوہ پیا ایہہ جیون میرا= میری زندگی بھاڑمیں جائے، مت = شایئد، ہرج پہنچاواں = میرے کولوں کوئی گستاخی سر زد نہ ہو جاوے ، کھارے = ٹوکرے، گاہ بگاہاں = کدے کدے ، ستھوں= پرہے پہنچائتاں توں ، اُپرالا=امدادی جتن۔ اُپائ،سِکدا = ملن دی اڈیک وچ تڑفدا، آجڑی= عیالی۔ گڈریا، کانگے= وڈے ہڑھ نے ، برھیا = ورھیا، درسن دس= درشن دِکھا،