ورقہ 350

6560
دُکھ میرے کے آکھن جوگے کد آون وچ لیکھے
تَد پتیجے یار محمد جیکر اکھیں ویکھے
6561
کِتھے یار کِتھے میں قیدی کِتھے صاعد بھائی
کون ونڈے اج دُکھ محمد حال نہ تکدا کائی
6562
سیف ملوک درُگے اندر بہت ہویا دُکھیارا
اگ فراق کیتا دل پُرزے نہ سُجھدا چھٹکارا
6563
پل پل سال مثال گزارے اک اک روز حشردا
رین لنگھائے وین کریندا نہ جیوے نہ مردا
6564
انت حساب دکھاں دا ناہیں لوں لوں ہویا شکستہ
دل بستہ تن خستہ بستہ نالے بستہ رستہ
6565
نال تیمم کرے عبادت پڑھدا نفل نمازاں
مُکّن کد غماں دیاں راتیں ہویاں دور درازاں
6566
کالی رات وچھوڑے والی ڈھُکی وچ درُگےّ
ہتھیں پیریں سنگل بیڑی کٹن عاشق لُگےّ
6567
کون سنے تے کہیڑا پُچھے جے سو کرے ککارا
صبروں باجھ علاج نہ کوئی صبر کرے بے چارہ
6568
کُوکے موت نہیں میں جوگی کس دی آئی لے لاں
جاگدیاں نت کٹی لیلاں جیوں مجنوں بن لیلاں
6569
آئی رات اک رحمت والی وانگر لیل قدردے
انبر سبز بغیچہ کیتا تازہ نور بدر دے
6570
نیلے چھتر اسمان کھلارے چھبےّ لاء سُنہری
فرش فلک دے اُتے تارے نچّن وچ کچہری
6571
نسدا پھرے شےطان دُراڈا کھاوے خوف شہابی
لاَ حَوْلَ وَِلَا پُکارن چوکید ار جنابی
6572
رات کیتی کستوری ہُلےّ سبھ ہوا جہانی
لعلاں وانگر چن چمکدا صاف زمین نورانی
6573
باغاں اندر چھاں رُکھاں دی نقش نگار بنائے
کالی چھاں چٹا وچ چانن خوش مرگان وچھائے
6574
ماہی مُرغ اسودے ہوئے وحشی شیر ارامی
خوش ہوا سُکھائی سبھناں ستے سُکھ تمامی
6575
باراں اندر بستر کیتے رل شیراں تے ہرناں
ساہ کُتےّ رل سُتے آہے وَیر نہیں اج کرنا
6576
کُچھڑ وچ سوالے چُوہے بلیّ جیوں مشتاقاں
باز تتر اک اڈّے اُتےّ بیٹھے نال اتفاقاں
6577
نیندر کٹھے کر سواندی چوراں چوکیداراں
غفلت نشہ رقیباں چڑھیا یار سُتےّ سنگ یاراں
6578
سیف ملوک درُگے اندر بیٹھ اکلاّ جاگے
رب دی دتی سخت مصیبت پیا سرے تے جھاگے

لفظالی:
مثال=سال وانگوں ، شکستہ = ٹٹا بھجا سٹ خورا، دل بستہ= بُجھا ہویا دل ۔ خوشی توں وانجھیا ہویا، تن خستہ = سریر ٹُٹا بھجا جو ذرا سختی نہ جھلےّ ،نالے بستہ رستہ= دل بجھیا ہویا وی اے تے نالے آزا د وی اے اک تھاں تے بجھا ہویا اے باقی دنیا توں لاٹنک، آزاد اے، کٹن = بھوگن ۔ بیتاون ، لُگے = اکلے تن تنہا، آئی = قضا۔ موت، لیل قدر = لیلۃ القدر۔شب قدر، سنہری چھبےّ = تارے، کچہری = الٰہی دربار، شہابی = شہاب دا ، شہاب=ڈگن والا تارا ، آکھدے نین شیطان نوں الٰہی دربار وچوں ردیا گیا اے، چوکیدار جنابی = دربار الٰہی دے دربان لا حول پڑھ کے اوہنوں دوررکھدے نیں ،کیتی = کئی ۔ کنے ای۔ چوکھے ، مرگان=کالے چٹے ہرن دی ڈب کھڑبی کھل، آسودہ= چپ چان سکون وچ، ماہی مرغ=مچھیاں تے پنچھی ، آرامی = آرام وچ، ساہ= سیہا۔ خرگوش، اڈا = اُچے وانس تے بنیا پنچھیا ں دا ٹکانا،