ورقہ 352

6598
جا تس ایہ خیال نہ پکا کے تارے میں سیواں
ایہناں کولوں کم نہ ہوندا سو وڈیائی دیواں
6599
ایہ آپوں وچ قید حکم دے ٹُردے اُٹھ نکیلے
رات دنے آرام نہ کردے سرگرداں ہر ویلے
6600
رُنا پھیر نمانا ہوکے خاص ربےّ دے درتے
دائم جس دے لطف کریمی بے پرواہی ورتے
6601
عرض کرے شاہزادہ رباّ تدھ بن نہیں پناہاں
زہرے مشتریاں سبھ گولے توں شہنشاہ شاہاں
6602
ناموراں دیاں ناماں اتے نام تیرا سرنامہ
کُنہ تیری وچ راہ نہ پایا کیا خاصاں کیا عاماں
6603
علم تیرا ہے پڑھنوں اگے کسے نہ پڑھیا سارا
بھیں دریا احسان تیرے دا بے حد انت شمارا
6604
توں مقصوداں دے بند کھولیں دیویں آپ مراداں
اُچے تدھ ہی اُچے کیتے شاد کریں ناشاداں
6605
بند آزاد تیرے سب بندے ہور نہ رب کسے دا
لوح قلم تے امبر دھرتی توں رب سب کسے دا
6606
لہندا چڑھدا دکھن پربت ہور نِمان اُچاناں
زور تیرے دے اگے رباّ ہر اک ہے نترانا
6607
جو دانشور اکھیں والا ونج تیرے تک پُہتا
اَنھاں ڈورا ہویا شتابی حسن ڈٹھوس جاں بہتا
6608
جو کُتےّ در تیرے اُتےّ اوہناں ذاتاں پاکاں
تینوں جس پچھاتا ناہیں سر اس دے تے خاکاں
6609
خاکی بدن میرا رب سائنیا! گل کے آب ہویا ہے
ویکھاں حال غریب بندے دا کیڈ خراب ہویا ہے
6610
سٹ نہ مینوں عاجز ہویوس تدھ بن کون غریباں
رحمت کُنوں وانج نہ مُولے چا نواز نصیباں
6611
مِینہ وساء عنایت والا کالکھ ساری دھووے
کالی رات ہجر دی میری جھبدے روشن ہووے
6612
آوے نیک دہاڑا میرا چھڈن بخت بہانے
جس دم نظر کرم دی ہووے آون بھلے زمانے
6613
صبر کریں نامید نہ ہوویں لیسیں اجر جنابوں
مَٹھےّ کم ہوون رحمانی بہتر کار شتابوں
6614
پئی دُعا قبول حضوروں رحم ہویا سرکاری
عُسروں یُسرکرن تے آیا چلی مصیبت ساری
6615
دکھیے نین ہوئے نندرائے خواب مبارک ڈٹھی
بند خلاص ملے گا جانی کُھل پئی آہُن چٹھی
6616
سُدھ ہویائے برج ستارہ گئی نحوست راسوں
زاری سُنی خداوندساری فضل ہویا اس پاسوں

لفظالی:
جاتوس= اوہنے جان لیا ، تارے سیونا= تاریاں دی پرستش کرنا۔ اوہناں کولوں مدد منگنا، وڈیائی =صفت ۔ عظمت ، اُٹھ نکیلے= جویں اُوٹھ دے مالک ہتھ اوہدی نکیل ہوندی اے ایویں ای ستارے خدا ئی حکم دے تابع نیں ، لطف= مہر ۔ کرم، ورتے = عمل وچ آرہی اے، گولے= بردے ۔ غلام ، کنہ=راز ۔ وچلا بھیت، راہ نہ پایا= بھیت تائیں اپڑ نہیں سکے، بھیں = بھی واقعی ۔ یقینا ، نمان = نوان ، ڈورا= بولا، نترانا= بے ستا۔ نطاقتا۔ جو کجھ نہ کر سکے ، اکھیں والا=صاحب بصیرت ، ہویوس = میں ہو گیاہاں ، غریباں = پردیسیاں، رحمت کنوں وانج نہ مولے= رحمت سے ہر گز محروم نہ کر ، لیسیں= توں لےں گا، عُسروںیُسر = ٹ ک ق م الم نشرح : 6,5، کھُل پئی آہن چٹھی= رہائی دا پروانہ جاری ہو گیا ای، ستارا سدھ ہونا= چنگے ستارے دا صحےح برج وچ بھاگاں والا ہونا، راسوں = راس توں ، راس اسمان دا بارھواں حصہ جہدے وچ ستارا داخل ہو کے قسمت نوں چنگا یا مندا کردیندااے ،