ورقہ 353

6617
سیف ملوک شزادہ اُٹھ کے پڑھن لگا شکرانے
سو سو شکر زبانوں آکھے کرے ادا دو گانے
6618
اَٹھے پہر عبادت اندر رہندا نت کھلوتا
عشق حقیقی ہویا مجازوں ہر میلوں دل دھوتا
6619
ایہ مشغول عبادت اندر گلاں کول نہ کرئیے
توڑے قید سنگل وچ ہوون پھیر شِیہناں تھیں ڈرئیے
6620
عاشق قید محمدبخشا پَیر نہ بدّھے تیرے
کر کجھ آہر چھڈون والا کریں ایتھے کے پھیرے
6621
خدمتگار وفائی تاہییئں ہاں وہلا کر دھائی
خبر قضیّے دی کس کھڑنی کول تونہیں اس جائی
6622
شارستان اندر چل جلدی شاہپالے دے گھر نوں
عاشق دی اس حالت والی خبر ہووے دلبر نوں
6623
سیف ملوکے کول اکلا رہ کے کے کماواں
فوجاں چاڑھ لیاواں توڑوں تاں قیدوں چھُڑکاواں
6624
مہر افروز گئی جس ویلے کول شہے شاہپالے
گوشے گل سناون کارن جا کر وکھ بہالے
6625
سیف ملوکے دی گل ساری اوّل آخر توڑی
کھول دسی شاہپالے اگے صفت کیتی بے اوڑی
6626
سُن گلاں شاہپال شزادہ بہت تعجب ہویا
آدمیےئ نوں عشق پری دا کیکر اُٹھ کھلویا
6627
متھے وٹ اکھیں وچ لالی چڑھیوس غضب ہنیری
تتّا بول مائی نوں کہندا کے مت ماری تیری
6628
اس آدم نے جادو پائے یا کوئی جڑی کھلائی
یا کوئی منتر جنتر کیتا تیری ہوش بھُلائی
6629
یا کوئی پڑھی عزیمت اس نے یا کوئی سیفی ڈالی
یا سِر تیرے اُتوں پھیری لکڑ چا بنگالی
6630
توں جے ایہ منصوبہ کر کے آدم نال لیائییں
نہ کجھ عقل قیاس کیتوئی اینویں ہی ٹر آئییں
6631
جو گل تدھ فرمائی مینوں باہر علم حسابوں
دس مائی ایہ مسئلہ پُٹھا پرھیوئی کس کتابوں؟
6632
آدمیاں تے پریاں اندر ساک اگے کد ہوئے
موتیں تے گل ڈوڈے مائے کس نے جوڑ پروئے
6633
دوئے ذاتیں وکھو وکھی مولیٰ آپ بنائیاں
اوّل دے دن رلیاں ناہیں کس تھیں جان رلائیاں
6634
وڈے وڈیرے وڈکے ساڈے دیو ہوئے ہر تھاویں
کسے نہیں ایہ رسم قبولی شرع نویں توں پاویں
6635
ایہ گل مول نہیں دل لگدی رسم نویںکد بھاوے
قوم دئیاں دی مندا چنگا آکھن جو دل آوے

لفظالی:
شکرانے = شکرگذاری دے نفل جو دو دو رکعتاں وچ نیتے جاندے نیں ، دوگانہ= دونفل، شینہاں = شیراں ، آہر= جتن۔ اُپرالا ، وہلا= چھیتی چھیتی کر کے، اس جائی= ایس تھاں تے ، چھُڑکاواں = رہا کراواں، وکھ = علیحدہ ، بے اوڑی= بے اوڑکی' بے انتہا، آدمیے= آدم دی نسل وچوں خاکی بندے نوں ، وٹ= شکن غصے دی تیوڑی ، تتا = غصے دے جوش نال، مت = عقل ، جڑی = پریم بوٹی، منتر = کلام ۔ جادو اثر والے بول، جنتر= کوئی شے جو ٹونے وجہوں ورتی جاوے، عزیمت= موکلاں نوں حاضر کرن والی طلسماتی دُعا، سیفی= دعائے سیفی جس دے عا مل دے قبضے وچ ستر ہزار جن تے ستر ہزار فرشتے ہوندے نیں ایس دعا دا اثر اٹل تلوار ورگا ہوندا اے، بنگالی لکڑ= بنگال دا جادو مشہور اے بنگال دے جادو گر کسے دے سرتے لکڑ پھیرن نال اپنا کم کر جاندے نیں ، گل ڈوڈے= کول ڈوڈے دی چپنی وچوں نکلے بی، شرع = راہ ۔ ریت،