ورقہ 354

6636
کُل میری نوں وٹا لگے نیچ بناں ہر اِک تھیں
کُل دیواں وچ پھکا ہوواں کے حاصل اس پِھک تھیں
6637
بھلی صلاح دسالیں مائے کریں خراب اسانوں
ہور کوئی آکھ بچے تاں جاناں آکھاں کے تسانوں
6638
رب پناہ دئے اس کموں ننگ ناموس نہ لاہے
پُت بھُلا توں مائی اچھی ٹوریں اوجھڑ راہے
6639
جے قسمت نے ایہو کرنی زور نہیں کجھ میرا
اکھیں ویکھ ازماساں تاں بھی اوہ کوئی آندا تیرا
6640
اوہ آدم ازمائے باجھوں عقل نہیں گل مندا
کُفواپنی چھڈ غیر کُفاں دا کیہڑا سوہرا بندا
6641
شہرت تے بدنامی جوگا مینوں کریں نشانہ
تاڑی مار تماشا ویکھو مارو تیر جہاناں
6642
بے وفا ہمیشہ لکھن آدمیاں نوں پریاں
بھُل خطایاں خاکی لوکاںبنھ پنڈاں سر دھریاں
6643
دوجا توں جو آکھیں اس نوں سُچاّ اُچاّ ذاتوں
رستم اسفند یار بناویں زوراوری صفاتوں
6644
ہور اوہدی جو کہی آساری سفر مصیبت بھاری
اسفند باش قلعے دی فتحا ملکہ دی غم خواری
6645
صورت تے تدھ ڈٹھی اکھیں ایہ گلاں سبھ سُنیاں
سنیاں تے کے باور مائے کوڑ بہوں وچ دُنیاں
6646
ہر کوئی سیر کہاوے آپوں کیہڑا پاء سداندا
رستم بہت کہاون موہوں پر ہتھ کون دکھاندا
6647
جو رستم سدواندا مُونہوں کد اوہ ایسا ہوسی
جدوں کسے آزمائش کیتی پیا سروسر روسی
6648
کس گواہی دتی تینوں ہے ایہہ مرد اجیہا
یاتوں ڈُلھ پئی سُن مُونہوں جے کجھ اس نے کہیا
6649
چھڈ خیال نکما مائے نہ کر کھہڑا میرا
نہ ایہ گل پسندے آوے حکم نہ مُڑدا تیرا
6650
مہر افروز کہیا شاہپالا کیوں تدھ چڑہن سرنڈے
لاہ دلے دے چشمے اتوں غصے دے ککھ کنڈے
6651
کن دلے دے دھرکے سُن کھاں تاں آکھاں گل سچی
مینوں بھی ایہ گلاں سُن کے پوندآہی اگ مچی
6652
غصے ہو عفریتے تائیں جھڑکاں دے دبکایا
مارن لگی ساں اس دیوے جیہڑا چالیایا
6653
جاں اس صفت ثناء سنائی دتی عقل گواہی
ویکھ لیےّ اوہ آدم زادہ کیسا مرد سپاہی
6654
مجلس سنے اسانوں لگی ویکھدیاں حیرانی
ودھ ڈٹھی سو حصہ صورت جو سی سُنی زبانی

لفظالی:
کُل = جد۔ خاندان بنس، وٹا لگنا= کسے عیب نقص پاروں قدر قیمت عزت د اگھٹ جانا، پھِکا= بد عہد ۔نِکَلّا، پھِک= بد مزگی، دسالیں = دسیں ، اوجھڑ= عام جاتے پچھاتے راہ رستے نوں چھڈ کے اوکھا پُٹھا راہ، کُفو=حسب نسب حیثیت سنے ہر پاسیوں سانویں ،غیر کفو= جو کفو نہیں ناجنس، رستم=سہراب دا پیو ایرانی شاہ نامے دا مشہور ہیرو، مارو تیر جہاناں = سب خلقت دے طعنیاں جوگا کرن لگے او، اسفند یار= فارس دے پہلے خاندانی بادشاہ گستاسپ دا پتر، ڈُلھ= کسے دی شخصیت توں چھیتی متاثر ہونا محبت وچ گرفتار ہونا، ہتھ وکھانا= پہلوانی دا ہُنر عملی طور تے وکھانا۔ دا پیچ کر کے وکھانا، سرنڈے چڑھنا= غصے نال اعصابی تناؤ ہونا، کھیہڑا = رستہ، میرا کھیہڑا نہ کر= میرے مگر نہ پو، کلھ (١) لڑائی جھگڑا فساد(٢) نارد دی استری جیہڑی فساد دی جڑھ سی،لکھن = ویکھ کے سمجھنا، خاکی لوکاں = آدم دی اولاد نے،