ورقہ 355

6655
سیرت عقل اواز ہدایت بنھنی زور جوانی
آدم کے اک نظری آیا مظہر روپ حقانی
6656
آدم پری فرشتہ کوئی ایسا نظر نہ آیا
مجلس تے اقبال اوہدے دا پھریا سارے سایا
6657
صفتاں عمر تکاں تد میرا تک تک جیوڑا لوبھے
ایہ بدیع جمال میری دا کنت ہوئے تد سوبھے
6658
ہر دا قابل نظری آیا ایڈے مُل تاں پائے
مت یاری لاہور کسے دی اُٹھ پشورے جائے
6659
اس جیہا کوئی تارا کڈھے مول نہ انبر سردا
کد جموّں کے بیٹا ایسا ثانی ہار گُہردا
6660
اِسےّ نال ویا ہیے بیٹی لائق ایہ اس گل دے
تول برابر کتیے موتیں کنڈے چاڑھ عقل دے
6661
میں ہن اپنی عقلوں جوڑی ایہناں دوہاں دی جوڑی
اکھیں ویکھ آزماؤ اوّل بہتر ہے گل لوڑی
6662
ذات صفات پچھانو اس دی ویکھو صورت سیرت
چلدے راہ منکھ پرّکھیں تینوں ایڈ بصیرت
6663
اکھیں ویکھ پرکھّ شاہزادہ مت تیرا دل جمےّ
کر ناتا تدھ نظری آوے جے لائق اس کمےّ
6664
ایہ گلاں کرمہر افروزے ظاہر کڈھ وکھائے
خط بدیع جمال پری دے جو اس ول سن آئے
6665
واچ رقعے شاہپال بہادر چُپ کیتا شرمایا
جھٹ گھڑی کوئی فکر دلیلاں کر کے قیدبہایا
6666
نال فکر دے پیلے ہوئے دیدے غضبوں رتے
گرمی چھوڑ پیاوچ نرمی بھل گئے سبھ چتےّ
6667
بیٹی میری عاشق ہوئی اکھیں ڈِٹھے ور دی
پیش نہیں ہن جاندی مولے غیرت غصہّ مردی
6668
جے میں ایہ صلاح نہ منیّ خالی نہیں فسادوں
مائی بھی دلگیر ہوئیگی نہیں وساہ اولادوں
6669
زچ ہویا شاہپال بے چارہ راہ نہ لبھدا کائی
مہر افروزے کولوں پْچھدا دس کوئی ڈھب مائی
6670
دانشمند وڈیری تو ہیں ماں پیو دی جائی
نہیں خطا نصیحت تیری کئیں واری ازمائی
6671
ہر افروز کہیا میں بڈھی عمر میری سے برساں
ٹھنڈیوں تتیوں پے پے نکلی پڑھ چکی کئیں درساں
6672
نیکی بدی زمانے اندر تک تک وقت لنگھایا
مٹھا کوڑا پھل جگت دا چکھ چکھ کے ازمایا
6673
ویکھدیاں سر چٹا ہویا بازی گری فلک دی
اک تقدیر الٰہی اگے کوئی تدبیر نہ پکدی

لفظالی:
ہدایت= اخلاق و آداب ، بنھنی= سریر دی کایا۔ ساخت ، مظہر روپ حقانی= اوہدے وچوں اللہ دی سوہنی قدرت دسدی اے، ایڈے مُل= اینی وڈی قیمت، لاہور کسے = کسے ہور نال یار ی لا کے ، مول نہ انبر سردا= اسمان ہر گز اینی توفیق نہیں رکھدا، مُنکھ = انسان ،تینوں ایڈ بصیرت= تینوں باطنی اکھ نال ویکھن دی اینی صلاحیت نہیں ، اکھیں ویکھ = کجھ چر کول رکھ کے ایہدے آداب اخلاق ویکھ، مت= شاید، واچنا= پڑھنا، دلیلاں ، سوچاں ، دیدے غضبوں رتے= غصے نال ہوئیاں لال سُرخ اکھاں، مردی= مردانگی ۔ بہادری ، زچ وچ = شطرنج وچ کسے پاسے چال چلن توں مجبور ہوجاونا، چتے=ضداں ۔ بھوآں، ور=بر۔ شادی لئی پسند کیتا گیا مُنکھ، وساہ = اعتما د ۔ کئی درساں = پڑھ چکی ہاں ۔ بڑا زمانہ ویکھیا اے زمانہ استاد اے بندے نوں کئی سبق پڑھا چھڈدا اے، نہیں خطا۔۔۔۔۔۔= تیری نصیحت کدی غلط نہیں نکلی ،ٹھنڈیوں تتیوں پے پے نکلی= سرد و گرم زمانہ چشیدہ ہوں ، سڑ چٹا ہویا= دھولے عمرتے تجربے نال آئے نیں اسمان دی ہر چال سمجھنی ہاں،تدبیر پکنا=حیلہ کار گر ہونا،