ورقہ 356

6674
علم قیافے اندر ڈٹھا رمل نجوم حسابوں
ایہ جوان شہزادہ سُچاّ پرکھی ذات شرابوں
6675
دسدا ہے ایہ لعل بدخشاں گوہر شاہنشاہی
دُوروں آکھ دوہایاں دیندے سبھ عنوان گواہی
6676
صورت سیرت علم ہدایت عقل ادب اقبالوں
ظاہر پیا شہزادہ دسداہر نقشوں ہر چالوں
6677
صورت ڈٹھی مجلس کیتی پرکھ لیا تدبیروں
دانشمند مُنکھ پچھانن صورت دی تصویروں
6678
اشرفاء اصیل پچھاتا ہے تحقیق شزادہ
ایڈ دلیری ہمت جس دی شیروں زور زیادہ
6679
غیر کفاں تے کف دی لالا نہیں سیانپ کائی
اربع عناصر تھیں سبھ ہوئی آدم جن لوکائی
6680
نہ ایہ پریاں خاکوں خالی آدم پاک نہ ناروں
مڈھوں اکو جنس محمد فرق پئے وچکاروں
6681
اگ جنھاں وچ پئی زیادہ ناری اُنہاں کہایا
خاک جنہاں وچ وافر آئی خاکی نام دھرایا
6682
اینہاں دوہاں وچ ناتا ہووے جے قسمت دے زوروں
آدم اُوچ نہیں کجھ وٹا عیب ٹھگوں یا چوروں
6683
ساک بدیع جمال پری دا دے شاہزادے تائیں
نہیں تاں بہت افسوس کریں گا جاسی وقت اضاعیں
6684
سیف ملوک بدیع جمالے جے تدھ نہ پر نایا
پچھو تاسیں پھیر نہ پاسیں ویلا وقت وہایا
6685
خاطر جمع جمعیت کر کے لاہ اندیشہ لایا
اوہ مہمان خدا دا گھلیا جو در تیرے آیا
6686
اپنے کول بلاکے اس نوں کر کے غور دلاسا
مدّھ پلا پرّکھ شرافت کیا تولا کیا ماسا
6687
جے معلوم اصیل کیتوئی ناتا دے نوازیں
دوہاں دلاں سِکندیاں تائیں میل موافق سازیں
6688
مت انکار کریں اس کموں دُونا دینا آوی
ڈاڈھا ہے سلطان عشق دا سخت سزا سہاوی
6689
پیش آوی کوئی ہور خرابی بھاؤ پوی بدنامی
شہرت ہوئی جہانے اندر ہسّن خاصی عامی
6690
عشق زوراور شیر شکاری اس دا ہاڑ نہ خالی
چھیڑ کھہیڑنہ کریئے مارے انگل جس دسالی
6691
کوئی ہتھیار نہ پوہندا اس نوں نہ پھٹ لگدا کاری
مار اپنا چھڈ جاندا ناہیں چڑھیا کرے خواری
6692
مہر افروز صلاح دسالی شاہپالے دل لگی
مت موڑاں تاں مُڑے نہ مُڑکے اُلٹی سیفی وگی

لفظالی:
قیافہ= جلد ۔ اکھاں دے رنگ تل بھوری ورگیاں علامتاں مُکھ رکھ کے بندے بارے گویڑ لان دا علم ، رمل= کسے شخص دا ناں ماں پیو دا ناں پُچھ کے ہندسے خطاں دے حساب نال قسمت دسن دا علم ، نجوم = ہر شخص اک ستارے نال متعلق اے اوہ ستارا ہن کیہڑے اک خاص برج وچ اے تے کدوں فلانے راس وچ آئے گا تے اوہدے حساب نال دن چنگے یا مندے آ جان گے اجیہا علم نجوم اے، پرکھی ذات شرابوں= مشہور اے پئی کسے دی جات کُجات دی پچھان کرنی ہووے تاں اوہنوں شراب پیا دیو بھارا گورا ہو کے جھل لئے تاں اصیل اے جے خرمستی کرے تاں بد اصل اے، اشرفا= شریفاں وچوں ، اصیل = مول مڈھ توں خاندانی، کفو غیر کفاں = ٹ ک ٣٦١، سہاوی = جھلائے گا، شہرت = بدنامی ، ہاڑ = درندے دا دند جیہڑا ہڈی وچ پھس جاندا اے،وٹا = سکے دے کسے عیب پاروں ۔قیمت وچ کمی، شہر ت = بد نامی۔ توہین ۔ ہتک، انگل جس دسالی= جہنے اوہدے ول انگلی وی کیتی ، مار= اوہ شے جہدا شکار کرنا متھیا ہووے، چڑھیا = حملہ آور ہویا، سیفی وگنا= ٹ ک ٣٦٠،