ورقہ 359

6731
کدی نچلا بیٹھ اُڈیکے مت باہروں پھر آوے
ویکھے راہ چوطرف کھلوتا نال آواز بُلاوے
6732
ڈھونڈ اُڈیک رہیا ہر پاسوں سیف ملوک نہ آیا
آہو خاطف لوڑن ڈھونڈن سرگرداں منہ دھایا
6733
آہو خاطف روندا پٹدا لوڑ رہیا سے کوُہاں
ہو بیتاب ڈھٹھا پھر اوڑک ڈھونڈ تھکا سبھ جوُہاں
6734
پریاں دور نگاہاں دھریاں لوڑن سجو ساہیاں
جت پاسوں کوئی آوے جاوے پچھن پاندھی راہیاں
6735
ہر جوُہے ہر باغ مقامے لوڑ کرن ہر پاسے
ویکھن کھوج شزادے والا ڈھونڈن لاہ وسواسے
6736
جتھے توڑی طاقت آہی بھج چُکیاں اوہ پریاں
کجھ نشانی پتہ نہ لگا پھر پھر ہُٹیاں ہریاں
6737
جان قلزم دے رستے پیاں پری ملی اک راہوں
اس کولوں ایہ پچھن لگیاں آئی ایں توں اگاہوں
6738
اک شاہزادہ آدم زادہ کدھرے ڈٹھا ہوئی
باغ ارم تھیں اساں کھڑایا پتہ نہ لگدا کوئی
6739
اگوں اوس پری نے کہیا دس تسانوں پاواں
ڈٹھا میں فلانے ویلے آدم اک سچاواں
6740
چہلاں پریاں چائیں چائیں قلزم پاسے کھڑیا
اتنی خبر مینوں بھی اگے پتہ نہیں کجھ اڑیا
6741
ایہو خبر لئی تے مُڑیاں پریاں نال چالاکی
شاہپالے نوں جا سنائی بُجھ لگی غمناکی
6742
مائی نال خفا ہو لڑدا کے کیتو نادانی
کھُری پچھے ہے کہن سیانے اوڑک مت زنانی
6743
اوہ پردیسی آدم زادہ لڑکا اک اکلا
دیواں دے گھر سٹ کے آئی ایں عقل کیتوئی بھلاّ؟
6744
میں اگے سُن بیٹھا گلاں دیو قلزم دے سارے
اس آدم نوں پِھرن ڈھونڈیندے بن کے ویری بھارے
6745
چھ ہزار پری نت پھردی اس آدم دی لوڑے
جس بہرام شاہزادہ کُٹھا باپ اوہدا کد چھوڑے
6746
جے اوہ ہاشم نوں ہتھ لگا مار نیاں وچ دیسی
بیٹے دا غم ڈاڈھا اس نوں بدلہ کدوں چھڈیسی
6747
جِنھاں قلزم پاسے کھڑیا دشمن ہوس اسدے
ہئے ہئے اوہ نہ مردا توڑے اسیں اوہدے تھاں مردے
6748
ہن کوئی کرو صلاح سیانی ڈھلی گل نہ چھوڑو
سیف ملوک مڑ آوے کیوےں جھب مصلاحت جوڑو
6749
مجلس اندر غوغا ہویا محلیں گیا اوازہ
اگے شاہ پری دے دل وچ فکر آہا نت تازہ

لفظالی:
نچلا= پر سکون، مت ، شاید، منہ دھایا= جدھر منہ آیا ادھر ای نس دوڑیا،کُوہاں =کھوہیاں ، جُوہاں = آبادیوں باہر قدرتی رُکھ تے ہر یا ولاں، سجو ساہیاں=ہُٹیاں ۔ گھرکیاں،ہُٹیاں = تھک ترٹ کے ماندیاں پے گیاں ، ہریاں = اپنی ناکامی دا اعلان کرگیاں ، اگاہوں= اگلے پاسیوں ، دس پانا=اطلاع دینا، سچاواں= واقعی ۔ سچ تے مبنی، چہلاں = چالیھیاں،بُجھ= معلوم کرکے، چائیں چائیں = بڑے ارمانوں سے ، اڑیا= اٹکیا ۔ ٹھہریا، اوڑک = آخر کار، کھُری پچھے مت ہونا= پیر دی اڈی مگر عقل ہونا۔ کم کرن مگروں عقل سمجھ آونا تے پچھتانا، عقل کیتوئی بھلّا= بھلا عقل کیتی اے(بے عقلی کیتی او) لوڑے = تلاش وچ ، کُٹھا =قتل کیتا ، نیاں وچ= عدل دے تقاضے وچ، توڑے= بھانویں ، کیویں = جویں وی ہو سکدا جے، مصلاحت=مشورہ ۔ متا آوازہ=شور،ہئے ہئے= ہائے ہائے،