ورقہ 360

6750
دادی مہر افروزے تائیں جلدی کول بلائیوس
کیسا شور کچہری اُٹھیا دل میرا گھبرائیوس
6751
جیؤ میرا سن غوغا اوتھے بے آرام ہویا ہے
سچو سچ دسال شتابی کے کمام ہویا ہے
6752
ایہناں گلاں دا سُن کے رولا نہیں تحمل رہیا
دس حقیقت کے کجھ گزری پُہتا کے سنیہا
6753
مہر افروزے سچ نہ دسیا اوّل رہی بُھلاندی
شاہ پری دا چِت نہ ٹھہرے چھڈ خیال نہ جاندی
6754
جدوں بدیع جمالے مُڑ مُڑ مہر افروز اکائی
کہیوس دھیےئ کے میں دساں چیز اک وڈھی کھڑائی
6755
باغ ارم وچ چھڈیا آہا سیف ملوک شزادہ
ہن اوہ گم ہویا نہیں لبھدا کیتی لوڑ زیادہ
6756
قلزم پاسے کھڑیا دیواں پیندی دس ہوائی
گیا گُماتا رب ملائے ہور علاج نہ کائی
6757
وچ سمندر جھڑیا موتیں کیکر مُڑ ہتھ آوے
شیشہ وٹیاں اندر ڈھہٹھا ثابت رب بچاوے
6758
سُن ایہ گل بدیع جمالے پاڑ گُمایا جھگا
شرم حیا کھلوون کیکر جھل عشقے دا اَگا
6759
پٹیاں پٹ زمیں پر سٹیاں چکیں باہاں کٹیاں
کٹیاں ایڈ مہماں اس نے بھلیاں کھٹیاں وٹیاں
6760
پنجے مار چھلےّ سبھ چہرہ پا سِرے پر سجیّ
کپڑے سِجےّ دیدے سُجےّ رو رواجے نہ رجی
6761
دھونسے مار چڑھے غم لشکر نٹھے صبر سہارے
آہیں ڈھاہیں نال نہ رجدی ننگ ناموس اُتارے
6762
پھُلاں کارن جھول کھلاری اگوں پئے انگارے
آیا گھروں سہاگ کھڑایا بھاگ تتی دے ہارے
6763
لگی سانگ بندوق کلیجے بانہہ سرے پر کوکے
یاد کرے فریاداں کر کے دلبر سیف ملوکے
6764
تتی جلدی بلدی کھوہڑی کھاؤں کھاؤں کر کے
دادی تائیں آکھن لگی بولی ہاں میں مر کے
6765
جاتا میں غمخوار تسانوں ماں پیو بھین بھراؤں
مہر محبت تیری جاتی وافر ہر ہر تھاؤں
6766
مرضی دان مزاج میرے دی لاڈ میرے سیں جھلدی
چاہ مراد دلے دی ساری بن منگے نت گھلدی
6767
ڈردی نے میں ماں پیو اگے بیدن کہیانہ دل دا
دردی سمجھ تسانوں دسیا مت شوہ ہووے ملدا
6768
اپنے اُتے جاتا آہا مشفق بہت جہانوں
جانوں ودھ امان پیاری سونپی تد تسانوں

لفظالی:
بلائیوس= اوہنے بُلایا، گھبرائیوس = شور نے میرا دل گبھرایاا ے، کمام= کم کار، تحمل = جرن دا حوصلہ ، چت= دل ، نہ ٹھہرے= سکون نہیں سی، اکائی=تنگ کیتا، لوڑ = تلاش ، ہوائی =غیر معتبر، دس= اطلاع، گماتا= گواتا، جھڑیا= ڈگا، وٹیاں = پتھراں ، جھگا= قمیض چولی، عشقے داگّا جھل کے=عشق دا مقابلہ کرکے ، دھونسے= نقارے ، جھول = جھولی، تتی= بد قسمت، سجی= سواہ، سجے = اتھرواں نال گِلے ہوئے، سانگ= وگاہتا مارن والا نیزہJavelin، کھوہڑنا= رقت نال رندھے گلے نوں کھنگھ کے صاف کرنا، جاتی= جانی۔ سمجھی ، مرضی دان = مزاج شناس، بیدن= روگ، مت=شاید، امان=امانت،