ورقہ 362

6788
اپنی ہتھیں پیر کہُاڑا مارلیا میں تتیّ
شربت صاف وصل دے اندر زہر پُڑی میں گھتیّ
6789
آپ پیارا ودعا کیتا تاں پیڑاں سرسہیاں
مفت نعامت اگّوں چائی کد پچے میں جہیاں
6790
ہائے افسوس زیان اجیہا نہیں پچایا جاندا
سیف ملوک ملے ہُن کتھوں گم کیتا جس آندا
6791
کیسی نال میرے تدھ کیتی ہے ویری اسمانا
بھورے کتدی ہسدی وتدی خوشیاں نال گُماناں
6792
عیشاں لاڈ کریندی تتی اچن چیت ایانی
بُری مصیبت اندر پائیو جیونکر ِتل وچ گھانی
6793
خبر نہیں کے حق تیرے وچ بُرا بندی تھیں ہویا
تاں توں کھول غماں دا بوہا قہر میرے سر ڈھویا
6794
اوّل یار وکھائیوئی مینوں اندر باغ بہاراں
کھَس میرا دل دتوئی اس نوں لگے فکر ہزاراں
6795
سُکھیا جان ہوئی دُکھیاری عشق جدوں گھٹ آیا
پھُل نہ جھلدی بال ایانی تدھ ایہ بھار سہایا
6796
جھنڈ اوہدی دے کنڈل اندر کر اوّل دل قیدی
لاء وچھوڑا وِل دا چوڑا رکھیوئی پھیر امیدی
6797
اوڑک کھس لیوئی جانی مار میرے تن کانی
رج نہ ڈٹھا مُکھ نہ کیتے سُخن کلام زبانی
6798
شارستانے سارے اندر نشر ہوئی میں لَٹی
گھر گھر قصّے ستھ کچہری جگ بدنامی کھٹی
6799
کھٹی ہوئیوس مان پیؤ ولّوں لاج کُلے دی لاہی
میں ناری نے ناری ہوکے خاکوں ملی سیاہی
6800
ہار پھُلاں دے ہار گلے وچ پائی سہی بدنامی
دل آرام نہ دتوئی پھر بی دن دن بے آرامی
6801
شہرت اتے ملامت جھلیّ نام دھرایا جھلیّ
جھلی نہ تدُھ عرض بندی دی آس مراد نہ گھلی
6802
سینے داغ لگائیوئی اُلٹا ہتھوں ساڑن لگا
دم دم قہر میرے پر ورتے مشکل سُجھدا اگا
6803
کچرک تیک وچھوڑے اندر میری جان جلیسیں
بہت انصاف دتوئی اگے ہور اجے کے دیسیں
6804
جیکر یار ملانا ناہیوں وار میری جند تائیں
دلبر دا سر صدقہ کر کے کر کھاں مار اضاعیں
6805
بخش بندی بہوں عاجز ہویاں من سوال ربانا
نہیںتاں ہو اُداسی تریا سُکدا ساس نمانا
6806
ہئے ہئے رباّ آفت بجلی سر پئی تاں جاتی
سیف ملوکے باجھ اسانوں ہوئی حرام حیاتی

لفظالی:
اگوں چائی= اپنے سا منیوںبغیر محنت دے لبھی، زیان= نقصان ، کد پچے میں جیہاں = میرے ورگیاں نوں ہضم نہیں ہونی، نہیں پچایا جاندا= میں صبر شکر کر کے نہیں بہ سکدی، بھورے کتدی= چو باریاں دے تہ خانیاں وچ کڑیاں ٹھنڈ ہوون پاروں چرخے ڈاہندیاں سن، گماناں= نازاں ، گھانی= کولھو وچ پا کے پیڑن لئی بیاں دی مقررہ مقدار، بندی = کنیز ۔گولی ( کسر نفسی لئی اپنے آپ نوں آکھیا سو)گھٹ= ول ، جھنڈ= سر دے وال۔ زلف ، چوڑا=چُڑھ چُڑھ کے مرن دی لمی دُکھ دین والی بیماری، اوڑک = آخر کار، کانی= تیر ، لٹی= آوارہ ۔ لوفر ۔ ہر یاری، ستھ= پرہے پنچایت، کھٹی ہوئیوس=میں ماپیاں دا دل کھٹا کیتا اے،کُل = خاندان بنس، خاکوں ملی سیاہی= خاکی آدم نال یرانہ لاکے بدنامی کھٹی، ہار= شکست، شہرت= بھیڑی مشہوری، ہتھوں= سگوں ، جاتی= سمجھی۔ پچھاتی،سُجھدا= نظر آوندا، کچرک= کناں کو چر، وار=قربان کر دے، پھُلاں ہار = پھلاں وانگوں ، ربانا= اللہ واسطے،