ورقہ 366

6864
اس ویلے مڑ پیش نہ جاسی لکھ ہاڑھا سو حیلہ
نال افسوس حیران ہوئے گا پان جیہا رنگ پیلا
6865
فرزنداں دے دُکھ نہ مٹدے آکھیں آپ زبانوں
سنیاجدوں بدیع جمالے کرسی کوچ جہانوں
6866
کنّ آواز پیوس جس ویلے سیف ملوک نہ مڑدا
مرویسی جے جیوڑا اس دا اگے انت ہُسڑدا
6867
یوسف ثانی لائیوس کانی ہے فریاد کریندی
اس دے عشق زلیخا کیتی دم دم یاد کریندی
6868
حال بدیع جمال پری دا سارا کھول سنایا
بیٹی تیری دا شاہپالا ساس لباں پر آیا
6869
کن بُلیل پوے گی اس نوں جان بد خبر سجن دی
تلخ غموں جند شیریں ویسی وانگر کوہ شکن دی
6870
ایہو نیک صلاح تسانوں کرو شتاب تیاری
سیف ملوک مڑاؤ خیریں کر کے ہمت یاری
6871
ترکھے کم شیطانی ہوندے کہن حکیم سیانے
ڈِھل مناسب اوتھے جتھے کجھ زیان نہ آنے
6872
جاں اُٹھ اگ گھراں نوں لگے جلدی جل نہ پائیے
جلدی مال متاع تمامی آپوں بھی جل جائیے
6873
ایہو گلاں کر دے آہے مائی پُت فکر وچ
آیا کوئی سنیہا لے کے آن کھلوتا در وچ
6874
شاہپالے ول ہو سلامی کر کے صفت دعائیں
کہندا حکم ہووے جند بخشوتاں میں عرض سنائیں
6875
شاہ شاہپال اشارت کیتی دس تیرا کم کیہا
کہیوس میں بدیع جمالے گھلیا دے سنیہا
6876
پھُپھی ول روانہ کیتوس مینوں اندر خانے
سروبانو نوں دے سنیہا گل اوہدی شاہ مانے
6877
آن لدھے ایہ بی بی ہوریں وچ حضور شہانے
جے آکھن تاں دیاں سنیہے نہیں تاں چلن خانے
6878
سرو بانو نے کہیا اگوں میں معلوم سنیہا
دس ایتھے کوئی غیر نہ سُندا اکو ٹبرّ ایہا
6879
ایلچی کہیا سنیہا ایہو ظاہر آکھ سناواں
کہیا بدیع جمال پری نے رو رو کے ول مانواں
6880
حیف مینوں جے اوہ شاہزادہ زندہ پرت نہ آیا
مرساں کھا کٹاری میں بھی ظاہر آکھ سُنایا
6881
اوس بندے نے میرے پچھے جھلے ایڈ کشالے
اکھیں ڈِٹھے باجھ پیارے قول روحاں دے پالے
6882
میرے پچھے جان ونجائیوس جے کُٹھا پھَڑ دیواں
ایسے مرد وفائی پچھے میں کیوں جند نہ دیواں

لفظالی:
اڑھا= منت ترلا، پان جیہا رنگ پیلا= پان دا پتاہرا ہوندااے جے پانی وچ نہ رہے تے رنگ پیلا ہو جاندا اے، ہُسڑنا= وچھوڑے پاروںاودرنا، کانی لانا= تیر مارنا، زلیخاکیتی= حال بی بی زلیخا وانگوں کر دتا اے، ساس = ساہ، بلیل = نِمّھی جیہی آواز نال کوئی خبر، بدخبر= بھیڑی خبر، کوہ شکن= فرہاد ، ترکھے= چھیتی چھیتی کیتے گئے ٹ ک العجلت من شیطان وتانی من الرحمان، زیان = نقصان نہ ہوے، جل = پانی، آن لدھے= آکے لبھے نیں ، حیف مینوں ہوے گی= میرے لئی شرم تے افسوس دا مقام اے، کٹاری کھانا= اپنے آپ نوں چھوٹی تلوار ڈھڈ وچ مار کے ہلاک کرنا، کُشالے= لمیاں بیماریاں قضیے جھگڑے دُکھ مصیبتاں، قول روحاں ۔۔۔۔۔۔ = ساڈیاں روحاں پیاردا اقرار کیتا سی بَلیٰ آکھیا سی ، قول پالنا= وعدے تے پورا اترنا، کُٹھا= کوہیا۔ قتل کیتا،