ورقہ 367

6883
سن بیٹی دے گرم سنیہے فکر پیا شاہپالے
بھین گھلی جا خوب تسلی دے بدیع جمالے
6884
سرو بانو کر پیر شتابی شاہ پری ول آئی
دین لگی دلبریاں بہ کے سن بھائی دی جائی
6885
اوس بندے نوں دتی مولیٰ ایسی قابل کاری
ہوگ خلاص دیواں تھیں آپے نال عقل دی یاری
6886
دوجا خوف دیواں نوں مارے شاہپالے دے زوروں
شیراں نال دلیری شوخی کد ہو سکدی گوروں
6887
نہ کر خفگی تنگی کوئی رب چھڈاون ہارا
ایہ آیا کہ آیا دھئیے سیف ملوک پیارا
6888
نالے آپ خداوند کہیا سچی خبر کتابوں
رنج کسے دے کراں نہ ضائعا اپنے عدل حسابوں
6889
نیکو کاراں دے رنج مولیٰ جان نہ دیندا ایویں
دھیئے رکھ تسلی اس تے مرگ شزادہ کیویں
6890
پندرہ برس ہوئے اس شوہدے حرص تیری وچ پھردے
بازی لاء محبت والی جُوئے کھیڈے سردے
6891
صحیح راج کریندے چائی پنڈ ملامت
ہر ہر روز گزارے اس نے وانگر روز قیامت
6892
ہن جے آن تیرے گھر پہتا آس پُگی جو آہی
کیکر رنج کرے گا ضائع سچا قول الٰہی
6993
حق کسے دا بھنے ناہیں رب عدالت کردا
خاطر جمع تسلی رکھیں سیف ملوک نہ مردا
6894
باپ تیرے دی ہُنے کراساں لشکر سنے تیاری
قلزم دی سبھ دھرتی تائیں مار کرے تہ باری
6895
ہاشم شاہ نوں مار گُماسی سخت تنبیہاں دے کے
یا اوہ آء اگیرے ملسی شاہزادے نوں لے کے
6896
باپ تیرا جد قہریں آوے سب قلزم پٹ سٹسی
پریاں دیونہ چھڈ سی کوئی سبھناں دے سر کٹسی
6897
سیف ملوک ہو ویگا قیدی کیونکر مارسکن گے
آپے آپ کرن گے حاضر جان ایہ زور تکن گے
6898
سرو بانو ایہہ گلاں کر کے دتی ذرہ تسلی
عنبر اتے گلاب ملایا منہ پر پکھی جھلیّ
6899
رتی ہوش پری نوں آئی اُٹھی تلیاں مل کے
مست خمار اُداس نمانی نین پون ڈل ڈل کے
6900
آہیں ڈھاہیں واہو داہیں ساہ گھٹن ہڈکورے
پِٹ پِٹ داغ لگے منہ متھے نیل پئے رنگ گورے
6901
پرسئے نال ہوئی سی میلی خاکوں بھری پوشاکی
پٹے ترُٹے وال متھے دے جُثےّ بہت ہلاکی

لفظالی:
گرم سنہیے= جوشیلا پیغام، دلبریاں دینا= حوصلہ دینا۔ دلیری دینا، بھائی دی جائی= بھتیجی ، قابل کاری= قابلیت ، گوروں = گور خراں توں جنگلی کھوتیاں توں ، خفگی=گھُٹن غم غصے دی حالت، سچی خبر کتابوں = ٹ ک ق م سورۃ التوبہ120:، رنج= مصیبت۔ کم وچ اٹھایا گیا دکھ کیتی کتری، حق بھننا= حق مارنا، تہ باری کرنا= پھہ دینا۔ چِتھ کچل دینا، تنبیہاں دینا= اصل سزاتوں پہلا وارننگ دینا، اگیرے آ ملنا= اطاعت من کے استقبال آ کرنا، منہ پر۔۔۔۔۔۔ = ہوش وچ لیاون واسطے، ڈل ڈل کے پینا= مائع شے دا کنڈھیاںنال وج کے بھانڈیوں باہر آونا، اکھاں دا اتھرواں نال بھریا ہوونا،ہڈ کورے= ہٹکورے ' سسکیاں ، نیل = سٹ والی تھاں تے رت جمن نال پیا نیلا نشان ، پرسے= پسینہ ۔ مڑھکا، ہلاکی= ہلاکت دیاں نشانیاں،