ورقہ 369

6921
چھپدے کد دِلاں دے سودے ہوندی خبر دلالاں
باندا ہویا بھید مُلک تے تک تک بُریاں چالاں
6922
ملکاں وچ کہانی ہوئی گھر گھر گلاں ٹُریاں
جے سو بھید چھپایا لوڑن عشق دَسے کر کھُریاں
6923
جھولی پا انگار محمد کوئی پچا نہ سکے
عشقاں مُشکاں تے دریاواں کون چھپائے ڈکے
6924
کر کے صبر پچایا لوڑے پری دوا غماں دی
جِت ول واء پُرے دی جاوے دُھماں گھتدی جاندی
6925
عشقے اندر صبر نہ رچدا سورج مَیل نہ لگدی
سُکا رُوں نہیں کر سکدا پردہ پوشی اگ دی
6926
نیناں وچ کئیں غم غمزے غمزے کم غمازی
کیونکر چھپی رہے محمد بانس چڑھے دی بازی
6927
زلف اندر سے سنگل کُنڈے کر دے قید دلاں نوں
پَیر عشق وچ پاء محمد کون بچے خفقانوں
6928
نویں پریت اصیلاں والی مِل کے یار وچھُناّ
آپ مہمےّ ٹور کھڑایا چِت پری دا بھُناّ
6929
جے سو پھولن غم دے پھولاں ورقاں داغ لگاواں
درد منداں دے درد نہ مکدے جے لکھ گاون گاواں
6930
پھڑ ہتھیار محمدبخشا بن کے مرد سپاہی
چڑھ نالے شاہپال شاہے دے ہو قلزم ول راہی
6931
انگلیاں کر وانگ کماناں سِدھاّ تیر قلم دا
کاغذ دے میدانے اُتے سایہ ڈال علم دا
6932
چڑھ گھوڑے لک بنھ شتابی پہن سفر دی بردی
چل دربار شہانے چل کے دس دلیری مردی
6933
وانگ وزیراں دے صلاحاں کر کے جِبھ ملائم
شاہپالے نوں ہاشم شاہ دے جنگ اتے کر قائم
6934
اوّل لِکھ رقعہ مت صُلحوں ہو جاون چھُٹکارے
نہیں تاں تیغ زبان تیری دی گگن دئے چمکارے
6935
سخن بندوقے داروں دیوے ساز سیاہی والا
کانی نال پرو قطاراں رن کراں سب کالا
6936
ہاڑ اندر کر کھاڑ چوطرفی صف پر صف لٹاواں
دشمن دی ماں بھین محمد مکھی ہار پِٹاواں
6937
صفدر مدد کرے ہر ویلے جو شہنشاہ شاہاں
زور اوہناں دے نال محمد دیو دشمن نوں گاہاں
6938
سرو بانو تے مہر افروزے چنتا چخا جلایاں
نال فکر دے اُٹھ شتابی شاہپالے ول آیاں
6939
گوشے سد کے آکھن لگیاںسُن شاہا کن دھرکے
ایہو کم وڈا تُدھ آیا نہ ہٹ رہنا ڈر کے

لفظالی:
دلالاں= عشق دے ونج وچ اکھاں دلال ہوندیاں نیں ، باندا= ظاہر، کھُریاں کرنا= تیز نسنا، شُوٹ لاونا، پچانا= ظاہر نہ ہون دینا، مُشکاں = کستوری دیان خوشبواں ، غمازی= چغل خوری، غمزے = اکھ دے اشارے جیہڑے دل دی حالت دسن، بازی = کھیل ۔ (بازی گری دا)، خفقان = سوداء ۔ سودا تے وحشت پاروں دل دی تیز دھڑکن۔ اختلاجی کیفیت، وچُھنا= وچھڑیا، چِت بھُنا= دِل بھُج گیا، پھولن = پھول کے ظاہر کرن دا کم، ورقاں داغ لگاواں=لِکھاں ، چڑھ= سوار ہو کے حملہ کر، َعَلم = جھنڈا ، بردی= وردی ۔ یونیفارم، مردی= مردمی ۔ بہادری ، مت = شاید، چھُٹکارے= رہائی ، گگن= اسمان ، داروں = بارود ، ساز= سامان جنگی ، رن = میدان جنگ، ہاڑ= ہنوں۔جاڑھ، کھاڑ = کھاڑی۔ خندق، ماں بھین= جنگی جوش وچ گالی دتی گئی اے ، پٹاواں= مرواواں، صفدر = حضرت علی کرم اللہ وجہ،۔ حیدر۔ دشمن دیاں صفاں پاڑ دین والا،گاہاں= پیراں تھلے کُچلاں ، چنتا= فکر اندیشہ ،