ورقہ 371

6959
شاہپالے نوں سن سن صفتاں پئی محبت اسدی
کیویں اکھیں نظری آوے دل سِکدا جِند کھُسدی
6960
شاہزادے دے سچے عشقے اثر اوتھے ونج کیتا
قدرت دے ہتھ نال الٰہی پھڑ سوئی دِل سیتا
6961
سرو بانو تے مہر افروزے دتے تاء گلاّں دے
آتش بھڑک لگی شاہپالے جیوں بھڑکار جھلاّں دے
6962
ایسی لنب غصےّ دی اُٹھی سڑن لگا سر سینہ
بھُج گیاں سبھ ہور صلاحاں گرم ہویا جد کینہ
6963
جنبش جُثےّ جوش مغز وچ چکیں باہاں چبدا
منشی سد لکھائیوس رقعہ بھریا قہر غضب دا
6964
منشی تیز نویس شتابی پُہتا وچ حضورے
زرّیں رقم جیہا خوش کاتب حرف اوہدا تک جھُورے
6965
کاغذ اُتے کالی کانی کیتی اوس روانی
لکھے سخن کھرے جو دسے شاہ شاہپال زبانی
6966
لکھیا خط عجائب پتلی سوہنی صاف نوشتوں
حرفاں دی پھلواڑ بنائی باغ بہار بہشتوں
6967
ہر ہر سخن میانوں باہر فولادی تلواراں
سخنوں سخت زبان محمد کر دی ماراں ماراں
6968
خط تیار ہویا جس ویلے لگی مُہر شہانی
اوہو آہو خاطف ٹُریا جس تن رڑکے کانی
6969
سے کوہاں دا پینڈا کر کے قلزم اندر آیا
ہاشم دے دربارے جا کے ایلچی سیس نمایا
6970
ادب سلام بجا لیاندے جیونکر ایلچی کر دے
تھیلی کھول رکھی لے منشی پڑھ پڑھ کنبن ڈردے
6971
آ ساقی بھردے پیالا اوہ جمشیدے والا
کالی راتیں چانن لگے واہ خورشیدے والا
6972
ایسا مدھ جدھے چمکاروں ایہ شب کا گوں کالی
بن کے خاص عقیقی تارا گگن چڑھے فی الحالی

شاہپال بہادر دا ہاشم ول خط

6973
اوّل نام ربے دا لِکھاں نامے دا سرنامہ
ننگا رُوح بندے دا کجیؤس بخش جُثےّ دا جامہ
6974
ہر دانش تھیں بخرا دتوس نالے دین ایمانوں
روزی دیندا حل کریندا مشکل سخت کمانوں
6975
اسماناں دی رونق کردا روشن تارے لاکے
دھرتی آدم نال سُہاوے آدم نوں حبُ پاکے

لفظالی:
دل سکدا= دل ملن لئی تڑفدا، جِند کھُسدی = جان نکل جا رہی سی۔ روح بے تاب سی، ونج= جاکے، بھڑکار جھلاں دے= جنگل بیلے وچ اگ بھڑکن دی آواز، تیز نویس منشی= سٹینو۔ چھیتی چھیتی لکھن والامحرر۔ زریں رقم ایرانی خوش نویس ہدایت اللہ زریںرقم (تاج الدین تے آپ 1910وچ پیدا ہوئے سن)،جھُورے= افسوس کرے پئی میں شاگردی کیوں نہیں کیتی، نوشتوں = تحریر نال ، کانی= تیر ، رڑ کے = وچ ای کھُبھےّ ہوون دا احساس دیوے، نمایا= نوایاجھکایا، جمشید ے والا= جام جمشید وچ دنیاوے حالات دسدے سن، مدھ = شرا ب ۔ نشہ، کاگوں = کاں توں ، گگن= اسمان ، فی الحال= ہُنے ای ، عقیقی تارا= رتے رنگ دا قیمتی پتھر، بخش جُثے دا جامہ= جہنے روح نوں سریر دا کپڑا پاکے کج دتااے ، بخرا= حصہ، حل کر دیندا۔۔۔۔۔۔= کمان توں سخت مُشکل نوں ڈھلا کر دیندا اے، سہاوے= سجاوے،جُنبش جُثے=سریر وچ ہلچل، جوش مغز وچ=دماغ وچ اُبال ہائی بلڈ پریشر،جھل=زیر درختی پاروں سنگھنا جنگل ،آدم نوں حُب پا کے=آدم دے دل وچ حواتے بچیاں دی محبت نے دھرتی نوں رونق بخشی اے،صلاحاں= بھلائی بہتری دے مشورے،