ورقہ 18

اگلیاں خواباں وانگ نہ دسیں ایہہ نصیحت میری
بھائی تیرے مارن کارن مت کر بہن دلیری
یوسف عرض کرے یاحضرت رنج کیویں اوہ دیسن
آخر اوہ پیغمبر زادے کیونکر مَکر کریسن
پھر یعقوب کہے فرزندا تیری سمجھ نہ آئی
ہے شیطان بندے دا دُشمن سخت جیہدی بُریائی
پھیر دِلاں ول بدیاں کھڑدا فرق پلک وچ پاوے
یاراں کولوں یار پیارے پل وچ جُدا کراوے
یوسف کنب رہیا چُپ سُن کے ہور نہ عذر لیایا
ایہہ ُسفنا پھِر پاس کسے دے مُولِ نہ آکھ سُنایا
سُن یوسف دی خواب پیغمبر سی ظاہر فرمایا
ایویں رب نوازش کرسی جیئوں تیں نظری آیا
تے تینوں تاویل حدیثاں اللہ پاک سِکھاوے
خواباں دی تعبیراں والا علم تیرے ہتھ آوے
تیں پر نعمت پوری کرسی تے آلے یعقوبی
جیئوں اسحاق خلیل اللہ نُوں ملی شرف تے خوبی
تینوں ربّ پیغمبر کرسی پاویں رُتبہ بھارا
سرداراں وچ سرور ہوسیں اندر دلاں پیارا
مارواں یوسف دی مترئی شمعونے دی مائی
ایہہ گلاں سبھ اُس نے سُنیاں بھائیاں خبر پُچائی
سُن بھائیاں دِل حسد تپائے تے گرمی وچ آئے
اس لڑکے نے مکر اُٹھائے ساڈے جِگر جلائے
جھوٹھے سُفنے جوڑ سُنائے پیئو نے سچ منائے
اسیں بہادر دُور ہٹائے لَے لڑکے گل لائے
بنیامین سَنے خود پیئو نُوں یوسف بہت پیارا
اسیں نہ پنجاں وچ پنجاہاں قدر گیا اُٹھ سارا
یوسف اِس نُوں بہت پیارا نال جیہدے ورتارا
تے اُسدا دیدار گُزارا بِن دِیدار نہ چارہ