ورقہ 373

6995
کیا قلزم کیا قلزم والے جے میں لشکر چاڑھاں
لشکر فوج سمیت ولایت گاہ مروڑ لتاڑاں
6996
توڑے توں بھی لکھ فولادی کر ہتھیار لیاندے
موم ہوسن تک اگ غضب دی کتے نہ دِسسن جاندے
6997
تیر انداز نہ تکے اگے تاں تُدھ تُندی چائی
ہون لگوں سر صدّق آپے مِل مت رب بچائی
6998
بھن کماناں اگ وچ سٹ کے تیراں دے پر پٹ کے
لاہ زرہ لاء ململ آء مِل پاء گلے وچ پٹکے
6999
نہیں تاں ایسے کن پھڑاساں جانیں گا میں کِیہ ساں
ٹھنڈا ویکھ نہ ہوویں گیرا تپیا تاں رت پِیساں
7000
ہوندے زور جراں میں قوت صلحوں مُکھ نہ موڑاں
حاضر ہولے چیز اساڈی جو کجھ منگاں لوڑاں
7001
سیف ملوکے نوں پھڑ بانہوں لے آپاس اساڈے
توں نہیں پیؤ دا دا تیرا مڈھوں داس اساڈے
7002
تندی تیزی نت نہ پچدی کر لے رات دہاڑی
کس تھیں لہے کمان اساڈی رب اُتیرے چاڑھی
7003
ڈاڈھے نال نہ تگڑے ہویئے ڈھہ تُرئیے کر نرمی
ہاشم سخت سزا لئیں گا کرن لگوں بے شرمی
7004
جے میں بی اس گل پر آئیوس کون ہوئی گا ساتھی
پیراں ہیٹھ ملیدہ کرساں توں کیڑا میں ہاتھی
7005
جیہڑا ملک تینوں رب دتا بہ کے کھا بہاریں
شیراں نوں انگشت دسالیں کھُرکیں سر انگاریں
7006
کاویں ویکھ ہنساں نوں چھڈی چال مُڈھاں دی جوسی
نہ اوہ آئی نہ ایہہ رہیوس رہ گئی نری ٹپوسی
7007
خبر نہیں رب کس نوں دیسی تاج تخت سلطانی
طالع کس دے مدد کریسن یاری ہوگ اسمانی
7008
آہڑک بہڑے وانگر بڑھکیں کیوں چائیا سنگ مٹی
جے شیراں دا دھپا لگا اچمی جاسی مٹی
7009
میں اج ہاں سر بادشہاں دا تسیں مثل ہتھ پَیراں
سر اپنے نوں آپ مریندا کون کوئی وچ خیراں
7010
تینوں ہے مغروری چایا ویکھن دئی نہ اگاّ
کُکڑ بانگ نماشےں دتی جانوں کُسن لگا
7011
غضب میرے اک توہیں ناہیں کئیں دلیر کھپائے
پیؤ دادے تھیں اسیں بہادر بادشہاں دے جائے
7012
میں سلیمان نبی دا پوتا آدی دا شاہزادہ
دیوتیاں وچ جنگ بہادر میں تھیں کون زیادہ
7013
تساں جیہاں تھیں میں کیوں ڈرساں جے رب کیتی یاری
بھیڈاں تھیں بگھیاڑ نہ ڈر دے گوروں شیر شکاری

لفظالی:
نہ تکے اگے تاں تُندی چائی= توں اگے نہیں ویکھے ایس لئی اینی بھُو چُکی ہوئی آ، مِل مت۔۔۔۔۔۔ = ہتھیار سٹ کے صلح لئی اگلوانڈھی آمل شاید تینوں رب بچا ای لئے،تیراں دے پر= تیراں نوں اُڈان والے کھمبھ،لا ململ =ململ پہن کے، گلے وچ پٹکے= گل وچ پٹکا غلامی دی پہلی علامت اے یاکسے کولوں معافی منگن ویلے گل وچ پٹکا پایا جاندا اے،ہون لگوں سر صدق= توں اپنے آپ توں آپ ای قُربان ہون لگا ایں ، داس = غلام، کمان چڑھنا=گُڈی چڑھنا، ملیدہ = مالیدہ ۔ چوری ۔ بھورا بھورا، ڈھ ٹرنا= نیویں دھون کر کے عاجزی نال چلیے۔، کھرکیں سر انگاریں = انگیاریاں دا سر کھرکنا ایں اپنے ہتھاں دی خیر منگ، کاویں = اک کاں نے، اسمانی یاری ہونا= غیبی امداد ہونا، آہڑک = اڑک ۔ ہالی نکلن توں پہلاں دی حالت،سنگ مٹی= اپنے سنگاں نال مٹی کیوں چُکی او، اچمی=بے چینی، خیراں = خیر خیریت نال ، اگا = انجام، آدی= جدی پشتی۔ آدتوں ، جائے = جنے ہوئے ، گوراں = گور خراں توں ، گورخر= جنگلی کھوتے،