ورقہ 375

7033
لے کانی مسوانی منشی نال طبیعت دانی
لکھ جواب شتاب ٹکایا سُن سُن سخن زبانی
7034
پاء لفافے تھیلی اندر ڈال رقعہ بند کیتا
آہو خاطف دے ہتھ دتا لے کے گیا چُپیتا
7035
شاہپالے ول ہو سلامی تھیلی چا ء گزرانی
منشی کھول وکھاندا جاندا سخن پرتیّ گانی
7036
گھڑی تروٹک جھب دے ساقی درد منداں دا داروں
دے شراب اجیہا جس دی مستی ودھ شماروں
7037
اس پانی دے زوروں میں بی اگ دی پوجا چاواں
گرو گرُاں دا جو فرماوے سبھ بجا لیاواں
ہاشم شاہ ولّوں شاہ شاہپال نوں خط دا جواب چوکھے غصے نال جنگ لئی چڑھ آنا
7038
سر اکھیں مُنہ خط پر منیا سر خط دا جو ناواں
شالہ اوسے نام سچے توں میں بی صدقے جاواں
7039
مِٹی وچوں کڈھ وکھاندا سوہنے پھُل ہزاراں
خاکوں چاء اُچیرے کردا سرو بلند چناراں
7040
ویکھو کیڈ بلندی دتیوس ایڈ اسمان بلنداں
نور اپنے تھیں روشن کیتوس دِیدے دانشمنداں
7041
جمل جہان کیتا اس پیدا بے پرواہ جہانوں
لاچاری وچ چارے کردا رکھدا اساں جیہاں نوں
7042
دھرتی خاک نمانی اتوں انبر نت گھُماندا
لاکھ سمندر تے ڈل اندر مٹی مُٹھ بچاندا
7043
اوہو صاحب ملکاں والا اسیں تسیں سبھ بندے
ہر اک دا رکھوالا آپے کیا چنگے کیا مندے
7044
اِکوّ خاوند سرجنہارا کوئی نہ اس دے جیہا
رکھن مارن والا اوہو ہوروں خوف کویہا
7045
ہر ڈاڈھے تھیں ڈاڈھا آپے ودھ شمار حسابوں
بے نیاز اوہو جگ سارا منگن ہار جنابوں
7046
اسیں تسیں ہر کم کمائیے نال اسباب ہتھیاروں
اس نے جے کجھ پیدا کیتا بِن اسبابوں یاروں
7047
حکمت حکم اوہدے تھیں بھریا ایہ تمام پسارا
حکموں ظاہر حکمت اوہلے کے جانے جگ سارا
7048
دل رُشنائی نور اکھیں وچ جُثےّ زور اسے تھیں
مینوں تینوں شاہی لدھی ہوئی غور اسے تھیں
7049
حکم اوہدے تھیں کوئی نہ نسدا اسیں حکم دے بندے
جاں دم کڈھ لئے تاں پل وچ مُک جاون سبھ دھندے

لفظالی:
مقابلے دے پہلوان دے زور دا اندازہ ہو جاندا اے،پِڑدینا= میدان دینا، سائیں = مالک، اگاں پچھا سودھنا=کیتے دے انجام بارے سوچنا،
کانی= قلم ،مسوانی= دوات، گزرانی= پیش کیتی، سخن پروتی گانی= ہار وانگوں پروئے ہوئے لفظ،تروٹک گھڑی = نشے دے گھاٹے دا سماں، داروں=علاج ، اگ دی پوجا چاواں =درد دی اگ سیکاں، گرد گُراں دا= پیران پیر ۔ پیر پیران ۔ حضرت عشق، خاکوں چائ= مٹی وچوں چُک کے، جُمل= سارا، چارے= علاج، رکھدا= بچاندا، مٹی مُٹھ= امن امان نال مٹی مٹھ = مشت خاک، خاوند = مالک، سرجنہارا= خالق، کویہا= کیسا کوئی نہیں، ڈاڈھا= جابر غالب ، جنابوں= اوہدی کچہری وچوں ، کمائیے= سرانجام دیے، یار =مدد گار، پسارا= کھلاراUniverse، حکموں ظاہر۔۔۔۔۔۔= حکم ولوّں ظاہر اے حکمت ولوں، غور ہوئی= دھیان توجہ مہربانی،بندے=غلام گولے،