ورقہ 376

7050
توں بھی راج نہ ملیّں آندا لدّھا اوسے گھر تھیں
مینوں بھی جے چاء نوازے عجب نہیں اس در تھیں
7051
شکر گذار رہیں شاہپالا راج پچا ملک دا
چھوڑ تکبر مُنہ پر پیندا جے کوئی اُچاّ تُھکدا
7052
میں بھی دیو ناقُوّت ناہیں افسر وچ دلیراں
جس پاسے شمشےر چلاواں ڈھیر لگاواں شیراں
7053
کے ہویا جے لشکر تیرا ودھ حساب شماروں
میرے دیو بہادر ایسے اک اک سخت ہزاروں
7054
تینوں مان دلے وچ بھارا کرساں خرچ خزانہ
مینوں قوت باہاں اندر لڑساں وانگ جواناں
7055
دوئے شیر اسیں گج اُٹھے جس نوں زور زیادہ
سوئیو مار کھڑے گا ایتھوں سُن شاہپال شہزادہ
7056
آدم ذات کمینی اتوں تدھ خصومت چائی
جس دن موت سپے دی آوے بہندا آن کُجائی
7057
آوہ آدم سی خونی ساڈا نسدا چھپدا وگدا
دشمن ہتھ لگا پھڑ آندا تیرا سی کے لگدا
7058
خونی مارن روا شرح وچ عیب نہیں کجھ کیتا
تدھ کے لہنا نال اساڈے ہٹ کے بیٹھ چُپیتا
7059
اک خونی دے مارن کارن میں پر چڑھ چڑھ آویں
لکھ بیدوسے خون ہوون گے رب تھیں نہ شرماویں
7060
خاکی بندہ جنس نہ ساڈی کون کوئی پردیسی
اسیں تسیں ہاں ناری بھائی ایہ تینوں کے دیسی
7061
اس ناجنس اکُلے پچھے بُرا کُلے دا منگیں
ناروں خاک اگیرے ہوئی کہو کھاں کیہڑے رنگیں
7062
ایہنیں ضدیں چھڈساں ناہیں خون کیتا اس میرا
ایہہ ساڈا کجھ لگداناہیں ہوگ جوائی تیرا
7063
توں ہیں مرد کچہری اندر رن وچ مردی میری
جس دن ہتھ اساڈے تکسیں مٹسی اچوی تیری
7064
تدھ کے جاتا ہور نہ کوئی توہیں توہیں جائیوں
بھلیوں بھلی دِسے گی تاہییںجس ویلے چڑھ آئیوں
7065
میرے جیسے مار مریلے نہ دس مہرہ بازی
کم تیرا منصوبہ میرا پِڑ وچ تیر اندازی
7066
نیویں ہویاں ہو نہ اُچاّ اگوں مارنہ لافاں
شارستان پچا نچلاّ پٹ نہیں کوہ قافاں
7067
پَتھرا نال ٹھکور نہ شیشہ کے کرلیسیں کھٹی
لے لے اگ نہ آدھنگانے داروگر دی ہٹی
7068
موجاں مان تخت تے بیٹھا چھڈ دے کھیہڑا میرا
لوڑ لِسّا کوئی جے کر آیا جنگ اُتے دل تیرا

لفظالی:
اوسے گھر تھیں = خدا تعالیٰ دی جناب وچوں ، پچا= سانبھی رکھ ( الٹی قے والے کم نہ کر ) ناقوّت= کمزور ۔ لِسا،افسر= تاج سرکردہ، خصومت چائی=دُشمنی وِڈی، سپے= سپ،کُجائی = کُتھاں۔ نامناسب تھاں تے، وگدا = روٹین دے کم کردا، لہنا= قرض لئی رقم جو کسے دے ذمے ادا کرنی ہووے، چڑھ چڑھ آونا= باربار حملہ کرنا، بے دوسے = بے گناہ ہے معصوم ، خون ہوونا= قتل ہوونا، اکُلے= کل بنس دی لڑی توں باہر، کون کوئی = جس بندے دے سماجی مقام تے ذات پات دا پتہ نہ ہووے، کُلے= کل بنس۔ خاندان، اگیرے= افضل ، کہیڑے رنگیں= کیہڑاAspectتےShade of meaning نال، ہوگ = ہووے گا، رن = میدان جنگ، مردی= مردانگی بہادری، اچوی= بے چینی، بھلیوں بھلی = خدا نے بہتر توں وی بہتر مخلوق بنائی اے، چڑھ آونا= حملہ کرنا، مُہرہ بازی= چال بازی حےلے دھوکھے، دارو گر= آتش بازی دا سامان بناون والا، نچلا= ارام سکون نال ، لسا لوڑ= کوئی ماڑا جیہا لبھ لے، کھیہڑا= رستہ،