ورقہ 377

7069
توں سلیمان نبی دی جائی چھیڑ نہ دیو ہتیارا
دیو انگوٹھی اس دی ڈوبی تاں بنیا بھٹیارا
7070
واگاں موڑ اساڈے ولوّں میں بھی مفت نہ دھسدا
کوہ قافاں سیمرغ تیرے تھیں پھاہیاں وچ نہ پھسدا
7071
ہتھوں غور اساڈی کرتوں وڈا ہیں کئیں جائیں
نیک نہیں آزردہ کردے خلقت رب دی تائیں
7072
جے توں دانشمند کہاویں میں بھی نہیں ایانا
جے سُجا گے تیرے طالع میں بھی یاور جاناں
7073
القصہ ڈھک دیساں ناہیں نہ اول اُٹھ چڑھساں
صلح کریں تاں راضی شاہا جنگ کریں تاں لڑساں
7074
دوہاں گلاں تھیں جو تدھ بھاوے کر اللہ بسم اللہ
ڈِھل کہی منہ طرف اساڈی دھر اللہ بسم اللہ

شاہ شاہپال تے ہاشم شاہ دی ہر علاقے دی فوج جمع کر کے جنگ لئی تیاّری

7075
جاں ایہ سخت جواب سنائے منشی نے خط پڑھ کے
اڈِّیوں لنب گئی لگ چوٹی غضبوں بھانبڑ بھڑکے
7076
وال کِکّر دے کنڈے ہوئے لوں لوں چڑھے سرنڈے
لاہ دھڑ کے ہڈ کر کے آ کر شاہ پراں پر چھنڈے
7077
گج اُٹھیا شاہپال بہادر نعرہ مار قہر دا
کنب گیا سب باغ ارم دا کوٹ بازار شہر دا
7078
سب سنسار ندی دے ڈر کے طرف سمندر نٹھے
ناہر شیر پلنگ جنگل دے سن نعرہ سب ترٹھے
7079
پاڑھے ہرن ڈھہٹھے چھڈ پیہڑے نیل گائے گھب ڈھہٹھے
دیو عفریت اتے جن پریاں لشکر ہوئے اکٹھے
7080
حکم دتا شاہپال بہادر فوجاں جمع کراؤ
کوہ قافاں تے کوٹاں وچوں لشکر سبھ منگاؤ
7081
ہاٹھاں کٹک اکٹھے ہوئے منشی لین تلاشی
وچ حساب نہ آون فوجاں خلقت بے تحاشی
7082
آ لتھیاں کوہ قافاں وانگر فوجاں گرد چوپھیرے
کوہ قافاں نوں پُٹن والے راشک دیو وڈیرے
7083
سیکڑیاں جد قانوں گوآں قلماں بہت گھسایاں
جو جو جنگ بہادر فوجاں گنتر اندر آیاں
7084
لکھ چوداں نر دیو بہادر ترے لکھ فوج عفریتوں
سٹھ ہزار ہویا جنّ حاضر نمک حلالی نیتوں
7085
ایہ کجھ نامی لوک سپاہی ہور بے انت شماراں
بنھ ہتھیار سوار چڑھے سن بھکھن مثل انگاراں

لفظالی:
سلیمان نبی دی جائی= سلیمان نبی دا جانشین ایں ، ہتیارا= ظالم، نردیو= انسا نی شکل دے دیو، ناہر= شیر دی قسم ، پلنگ چیتے ، دیو انگوٹھی۔۔۔۔۔۔ = حضرت سلیمان دی انگوٹھی جہدے نال اوہدی ہیبت دی شاہی سی اوہ اک جن نے ای ڈوبی سی تاں اوہ تختوں لتھے تے اک بھٹیاری دا بھٹھ جھوکن دی نوکری کیتی، قانوں گو= حساب کرن والے منشی، مفت نہ دھسدا= ایویں خواہ مخواہ تیرے علاقے وچ دھسن دی مینوں وی کوئی لوڑ نہیں ، ہتھوں غور اساڈی۔۔۔۔۔۔= سگوں ساڈ ا دھیان رکھ رعایت شفقت تے بھلائی کر، سُجاگے= چوکھے بیدار، القصہ= مکدی گل انج اے، ڈھک دیسان ناہیں = میں قیدی کوئی نہیں دیونا، دھڑکا= ڈر خوف، راشک= راکش، بھاوے= من نوں چنگی لگے ، لوُں لوُں چڑھے سرنڈے= رُوئیں روئیں نوںغُصہ چڑھیا ہویا اے، شاہ پراں پر چھنڈے= شاہی بازاں نے شکار تے جھپٹن دی پوری تیاری کیتی، پیہڑے= رستے ٹکانے، ہاٹھاں= بدل ورگی فوج، کٹک= لشکرجیہڑا مال ڈنگر نوں وی وڈھی ٹُکی آوے، گھب ڈھٹھے= حمل ڈِگ پئے،