ورقہ 378

7086
فوجاں ہاٹھاں کانگاں وانگر گج کڑک کے چڑھیاں
قلزم دے دریاوے تائیں گاہن شتابی وڑیاں
7087
کر کے نظر ڈٹھا شاہپالے لشکر بنیا تنیا
شارستان ہوئی پُر ساری وانگر فصلاں گھنیاں
7088
آتش وانگ سپاہ النبا قلزم ول چلائے
جس راہ جاندے جوہ جو ہیرا سبھ کجھ جلدا جائے
7089
قلزم دے دریاوے توڑی شارستانوں لے کے
نیر تپے تے دھرتی ہلےّ جس راہ چلن پے کے
7090
شارستان وچوں چڑھ آیا کانگ جویں دریاواں
دھوڑوں دھندو کار غباروں راہ نہ لبھدا واواں
7091
بوٹی گھاہ زمیں پر ہوئی پیراں ہیٹھ ملیدہ
دھرتی ہیٹھ گئی چھپ کدھرے دولت ہار پوشیدہ
7092
توڑے پَیر شہاں دا یارو بہت مبارک بھلاّ
جتھے جاوے کرے خرابی دھرت دیوے تھرتھلا
7093
جاں قلزم دے نیڑے آیا شاہپالے دا ڈیرا
ملکاں وچ قیامت آئی اٹھیا شور گھنیرا
7094
ہاشم شاہ نوں اجے نہ خبراں اگ بلی سر میرے
شاہ شاہپال بہادر چڑھیا کر کے تاء ودھیرے
7095
تخت اُتے سی عیشاں اندر بیٹھا وانگر شاہاں
اچن چیت کوکاؤ آئے سر پر دھریاں باہاں
7096
آن اوہناں فریاد پکاری سُن توں ہاشم شاہا
چڑھ آیا طوفان تیرے تے نہیں نسن دا راہا
7097
شاہپالے دے لشکر آئے تھاں نہ دسدا خالی
زرہ پوش سپاہیاں کولوں زِمیں ہوئی سبھ کالی
7098
اکس وزیر صلاح دسالی راتوں رات اٹھ بھجو
بے خبراں نوں بھانج پوے گی شبخونے چل وجو
7099
ہاشم کہیا چوری پینا کم نہ بادشہاں دا
جو ہونی سو ہوسی اوڑک لڑساں نکل باندا
7100
دوجے کہیا فوج اوہناں دی انت حسابوں باہر
ویکھدیاں دل دہشت کھاندا کیکر لڑسیں ظاہر
7101
ہاشم نال دلیری کہندا اک بگھیاڑ شکاری
بہتیاں بھیڈاں تھیں کد ڈردا سو مثال ہماری
7102
ہاشم دی سن ایڈ دلیری تکڑے ہوئے سپاہی
غل پیا سبھ قلزم اندر ٹر آئی ہے شاہی
7103
ہاشم قلزم دے سلطانے پتہ پیا اس گل دا
اس بھی فوج اکٹھی کیتی حکم جتھے تک چلدا
7104
لشکر جمع ہویا جس ویلے شاہے لیا الیما
منشی انت سنبھالن لگے چڑھیے طرف غنیماں

لفظالی:
ہاٹھاں =بدل دیاں گھٹاواں ، کانگ= بے اوڑکا ہڑھ، دریاوا= بحیرہ ۔ چھوٹا سمندر (قلزم ٹاپو سنے) جُوہ= قدرتی گھاہ بوٹ تے رُکھاں والی زمین، جوہیرا= چھوٹی جنگلی چراگاہ، راہ نہ لبھدا وا واں= لشکر اینا سنگھنا سی کہ ہوا نوں وچوںلنگن دا راہ نہیں سی لبھدا، کوکاؤ= کُوک مار کے خبردار کرن والے جاسوس ، بھانج = ہاریاں ہویاں دی جان بچاؤ دوڑ، باندا= واندا۔ لُگا ۔اکلا۔ ظاہر ہوکے نتر کے، الیما= جنگ وچ شامل ہوون دا کوئی نشان جیہڑا سپاہی اپنی وردی تے نالے گھوڑے دیاں جاداں تے رنگ برنگی اُن بنھ کے لاندا سی، مکمل جنگی تیاری بارے شاہی پڑتال تے ذاتی معائنہ ٹ ک اَعْلَمَہ ' المنجد ، گاہنا=پیراں تھلے مدھنا، نیر تپے= پانی گرم ہوگئے، مالیدہ= چُورا چُورا۔ بھورا بھورا، منشی انت سنبھالن لگے= منشی کُل میزان دا جوڑ کرن لگے تے نتیجہ کڈھیا پئی فوج کافی اے ہن دشمناں تے ہلا کر دیئے، غنیماں= دشمناں، تا = جوش ۔ غصہ، دسالنا= دکھانا۔ پیش کرنا،