ورقہ 379

7105
لکھ پری وچ گنتر آئی چہل ہزار عفریتاں
کیتوس سبھ اسبا ب اکٹھا کر جھگڑے دیاں نیتاں
7106
سنگلا دیپوں نکل ہاشم آن لتھا وچ پڑدے
نر شاہپال بہادر اودھروں چڑھیا گھوڑے چِڑدے
7107
دوئے گھٹاں برابر ہویاں آ ہمو سامنے ڈیرے
ہاشم دی جِند وڑ وڑ نکلے مُنہ کیویں ہن پھیرے
7108
میر وزیر سبھو رل بیٹھے پچھدا شاہ صلاحاں
تسیں اساڈے بیڑے اندر ہر اک مثل ملاحاں
7109
دسو کے تدبیر کچیوے مشکل بنیاں کاراں
چڑھ آیا شاہپال بہادر کردا ماراں ماراں
7110
ہٹ ٹراں نامرد کہاواں جے چک کراں حلیمی
جنگ کراں تاں ہووے بے ادبی اوہ سلطان قدیمی
7111
نبی سلیماں دا اوہ پوتا جے اج اسنوں ماراں
روح اوہناں دا رِنج ہوویگا لکھیاں وچ بدکاراں
7112
نالے خوف دلے وچ آوے لشکر اس دا بھارا
مارمندال متے پِڑ جتے کر ویکھو کوئی چارہ
7113
فکر دوڑا اندیشہ کر کے خوب جواب سناؤ
دیر کرن دا وقت نہ رہیا کجھ بندبست بناؤ
7114
دانشمند سلامی ہوئے سن فرمان شہانہ
دین دعائیں ہوئے زیادہ شان مکان شہانہ
7115
باغ اقبال تیرے دا ساوا رہے ہمیش بہاریں
دائم تخت مبارک ہووے دوتی دشمن ماریں
7116
فکر اندیشے تیرے اُچےّ ناقص عقل اساڈا
سوئیو کم مبارک ہوون جو دل کہے تساڈا
7117
لیکن حکم قبول سرے پر جو آکھو سو کرنا
عقل اساڈا ایہ فرماندا اکثر بہتر جرنا
7118
اوّل صلح بنایا لوڑو جے اوہ من کھلووے
نہیں تاں جنگ کراں گے خاصہ جو ہووے سو ہووے
7119
صلح ہوئے تاں بہتر سبھ تھیں نہیں تاں چڑھ کے مارو
جے کُجھ رب کرے اوہ ہوسی مردی دلوں نہ ہارو
7120
ایلچی گھل کے پتہ کراؤ کس مطلب شاہ آیا
جے اس سیف ملوکے کارن ایہ ہنگامہ چایا
7121
آکھ گھلو اوہ آوندیاں ہیں قتل کیتا بن خبروں
جے توں طلب کریں اج شاہا کیونکر کڈھیےئ قبروں
7122
جے شاہپال اسے کم چڑھیا لاہ امید مڑے گا
عذر تواضع اسیں کراں گے کیوں تا جنگ جُڑے گا
7123
جے کجھ ہور اوہناں دل غصہ تاں بھی دس گھلن گے
اپنا آ ہر اسیں بھی کرساں جے کجھ وس چلن گے

لفظالی:
گنتر= گنتی،چہل= چالیھ، پڑ وچ آن لتھا= میدان جنگ وچ ڈیرے لائے ، چِڑ= اپنے پیارے نوں دُکھ دیون والے شخص دے خلاف انتقامی جذبہ جندوڑ وڑ نکلے= جان لکن چھپن لئی تھاں لبھدی پھر دی اے ۔ لوک لجیا پاروں سامنے و ی آونا پیندا اے،چُک= چُٹکی کو۔ ذرا جنی، رِنج= ناراض، لکھیاں=میرے لکھے جاون نال، مندا لنا= مدھو لنا۔رگڑنا ۔ مندا حال کرنا، چارہ= تدبیر ۔علاج، اندیشہ= ڈوہنگھی سوچ، ساوا = ہرا ، دوتی= دشمن دا ساتھی۔ مخبر۔ بد خواہ ۔ جاسوس، جرنا= برداشت کرنا۔جھلنا، مردی= مردانگی ۔ بہادری ، ہِیں = ہی دا مقامی تلفظ، بن خبروں = تہاڈے ۔ نال تعلق ہوون دی خبر توں پہلاں ، چڑھیا= حملہ آور ہویا، عذر تواضع= عاجزی نال معذرت، آہر= تیاری۔ مستعدی، تاجنگ= جنگ لئی ، جُڑے گا = سامنے آوے گا،