ورقہ 380

7124
ایلچی ہتھ منگاؤ خبراں ایویں بھلا نہ چڑھنا
صلح ہووے تاں واہ بھلیرا جنگ ہووے تاں لڑنا
7125
ہاشم شاہ نے ایلچی بھیجے ول شہپال بہادر
کِت سببوّں لشکر لے کے آیا شاہ اکابر
7126
جیکر طلب ولایت والی آپ ہوویں انصافی
ایڈے ملکوں میں اک کوچہ توں شاہی کوہ قافی
7127
میں بیٹھا اک ٹاپو اندر صبر قناعت کر کے
نال تیرے کوئی شرکت ناہیں توں بھی بہو کھاں جرکے
7128
حضرت نبی سلیماں والی ہتھ تیرے سبھ شاہی
میں اک گوشہ ملیا جیونکر لئے جگیر سپاہی
7129
جے کوئی ہور تساڈا مطلب تاںاوہ بھی بتلاؤ
کراں صلاح علاج اوہدے دی خیری مُڑ گھر جاؤ
7130
جیکر میں تھیں ہوون والی غرض تساڈی ہوئی
حاضرآن کریساں نہیں تاں قرض نہ دینا کوئی
7131
ایلچی آن پُچایاں عرضاں جیوں ہاشم فرمایاں
کہن لگا شاہپال بہادر بخشاں تُدھ خطایاں
7132
باغ ارم تھیں آدم زادہ جو تساں پھڑ آندا
موڑ دئے تاں بچسی ہاشم نہیں تاں ملک کھڑا ندا
7133
ایلچی عرض کریندا شاہا کے اک آدم زادہ
بے وفا نکارے پچھے چاہئیں شور زیادہ
7134
اتنی گل اُتوں کے آیوں لشکر چاڑھ مریلے
اوہ تے جس دم آندا آہا قتل کیتا اس ویلے
7135
جان بد خبر شہزادے والی کن پئی شاہپالے
ہو بے ہوش ڈھٹھا اس غم دے کر کے جان حوالے
7136
مُکّے وٹ وٹ مارے چھاتی دھرتی مارے اڈیاں
آپ مہارا نیر اکھیں تھیں درداں کُوہلاں چھڈیاں
7137
عنبر دا چھنکار کرایا ہور گلاب عطردا
میر وزیر ملیندے تلیاں اِیلچی ڈر ڈر مردا
7138
جس دم ہوش سنبھالی شاہے بیٹھارکھ دلیری
مارے سرد اوساس پکارے بھٹھ حیاتی میری
7139
ہائے افسوس جوان اجیہا عاقل فاضل کامل
خوش آواز ظریف تے سوہنا ہر ہر ہنروں عامل
7140
میں بھیڑے نوں نظر نہ آیا کامل شوق تکن دا
وچ فراق اوہدے ہُن مرساں نہیں صواد بچن دا
7141
لشکر فوج سمیت مراں گا ہاشم دے سنگ لڑکے
سیف ملوک اُتوں سبھ وارے کے کرنے گھر کھڑکے
7142
پھر سو گند اٹھائیوس بھاری غصےّ جان جلائی
قسم مینوں اس رب سچے دی جس وچ غلط نہ کائی

لفظالی:
چڑھنا= حملہ کرنا، انصافی= منصف ۔نیائیں ، کوچہ = کٹڑا۔چھوٹی بند گلی، جر کے = قناعت کر کے، خیری = خیرخیریت نال، کھڑاندا= گوابہ گا، مریلے=قاتل ۔ مار دین والے، ڈھٹھا= ڈِگا ، آپ مہارا= اپنی مرضی دا مالک، کُوہلاں= پہاڑ وچوں نکلن والیاں ندیاں ، عنبر= اک سمندری جاندار دے فضلے توں بنی سکی سمندر جھگ جو بہت خوشبو دار ہوندی اے، اوساس= ہوکے۔ ہاہواں، بھٹھ = بھاڑ میں جائے، ظریف = ذہین ۔ کئی فناں دا ماہر ۔ سُگھڑ، سنگ= نال، سوگند= قسم ، جس وچ غلط نہ کائی = ٹ ک لا مبدل لکلمٰت اللّٰہ6/34، گھر کھڑ کے = گھر واپس لے جاکے،